ಬೆಂಗಳೂರಿಗರೇ ಗಮನಿಸಿ: 13,262 ಕೋಟಿ ರೂ. ವೆಚ್ಚದ 11 ಬೃಹತ್ ಎಲಿವೇಟೆಡ್ ಕಾರಿಡಾರ್ಗಳಿಗೆ ರಾಜ್ಯ ಸಂಪುಟದ ಐತಿಹಾಸಿಕ ಅಸ್ತು.
ಬೆಂಗಳೂರು: ಸಿಲಿಕಾನ್ ಸಿಟಿಯ ಬೆನ್ನೇರಿರುವ ಟ್ರಾಫಿಕ್ ಭೂತಕ್ಕೆ ಅಂತ್ಯ ಹಾಡಲು ರಾಜ್ಯ ಸರ್ಕಾರ ಈಗ ಅತಿದೊಡ್ಡ ‘ಬ್ರಹ್ಮಾಸ್ತ್ರ’ ಪ್ರಯೋಗಿಸಿದೆ. ಬೆಂಗಳೂರಿನ ವಿವಿಧ ಭಾಗಗಳಲ್ಲಿ ಸಂಚಾರ ದಟ್ಟಣೆ ಕಡಿಮೆ ಮಾಡುವ ನಿಟ್ಟಿನಲ್ಲಿ 13,262.70 ಕೋಟಿ ರೂಪಾಯಿ ಅಂದಾಜು ವೆಚ್ಚದ 11 ಹೊಸ ಎಲಿವೇಟೆಡ್ ಕಾರಿಡಾರ್ಗಳ ನಿರ್ಮಾಣಕ್ಕೆ ಗುರುವಾರ ನಡೆದ ಸಚಿವ ಸಂಪುಟ ಸಭೆಯು ಆಡಳಿತಾತ್ಮಕ ಅನುಮೋದನೆ ನೀಡಿದೆ. ಈ ಮಹತ್ವಾಕಾಂಕ್ಷಿ ಯೋಜನೆಯು ಸುಮಾರು 75.60 ಕಿ.ಮೀ ಉದ್ದದ ವ್ಯಾಪ್ತಿಯನ್ನು ಹೊಂದಿದ್ದು, ನಗರದ ಸಂಚಾರ ವ್ಯವಸ್ಥೆಯನ್ನೇ ಬದಲಿಸಲಿದೆ.
ಮೂರು ಪ್ಯಾಕೇಜ್ಗಳಲ್ಲಿ ಬೃಹತ್ ಯೋಜನೆ ಬೆಂಗಳೂರು ಸ್ಮಾರ್ಟ್ ಇನ್ಫ್ರಾಸ್ಟ್ರಕ್ಚರ್ ಲಿಮಿಟೆಡ್ (BSMILE) ಮೂಲಕ ಈ ಯೋಜನೆ ಅನುಷ್ಠಾನಗೊಳ್ಳಲಿದೆ. 11 ಕಾರಿಡಾರ್ಗಳನ್ನು ಪ್ರಮುಖವಾಗಿ ಮೂರು ವಿಭಾಗಗಳಾಗಿ ವಿಂಗಡಿಸಲಾಗಿದ್ದು, ಸಾರ್ವಜನಿಕ ಮತ್ತು ಖಾಸಗಿ ಸಹಭಾಗಿತ್ವದ (PPP) ಅಡಿಯಲ್ಲಿ ಹೆಚ್ಚಿನ ಕಾಮಗಾರಿಗಳು ನಡೆಯಲಿವೆ. 9 ಕಾರಿಡಾರ್ಗಳು ಪಿಪಿಪಿ ಮಾದರಿಯಲ್ಲಿದ್ದರೆ, 2 ಪ್ರಮುಖ ಮೇಲ್ಸೇತುವೆಗಳು ಬಿಒಟಿ (Build-Operate-Transfer) ಮಾದರಿಯಲ್ಲಿ ನಿರ್ಮಾಣಗೊಳ್ಳಲಿವೆ.
ಪ್ರಮುಖ ಮಾರ್ಗಗಳು ಮತ್ತು ಉದ್ದೇಶ:
- ಯಶವಂತಪುರದಿಂದ ಕೆ.ಆರ್. ಪುರಂ (28 ಕಿ.ಮೀ): ಇದು ನಗರದ ಅತ್ಯಂತ ಉದ್ದದ ಎಲಿವೇಟೆಡ್ ಕಾರಿಡಾರ್ ಆಗಲಿದ್ದು, ಉತ್ತರ ಮತ್ತು ಪೂರ್ವ ಬೆಂಗಳೂರನ್ನು ಬೆಸೆಯಲಿದೆ.
- ರಾಗಿಗುಡ್ಡದಿಂದ ತಾಳಗಟ್ಟಪುರ (18.5 ಕಿ.ಮೀ): ಕನಕಪುರ ರಸ್ತೆಯ ಸಂಚಾರ ದಟ್ಟಣೆಗೆ ಇದು ಶಾಶ್ವತ ಪರಿಹಾರ ನೀಡಲಿದೆ.
- ಐಒಸಿ ಜಂಕ್ಷನ್ ಮತ್ತು ಬೈಯಪ್ಪನಹಳ್ಳಿ: ಇಲ್ಲಿ 436 ಕೋಟಿ ರೂ. ವೆಚ್ಚದಲ್ಲಿ ಎಲಿವೇಟೆಡ್ ರೋಟರಿ ಫ್ಲೈ ಓವರ್ ಮತ್ತು ರೈಲ್ವೆ ಮೇಲ್ಸೇತುವೆ ನಿರ್ಮಾಣವಾಗಲಿದೆ.
- ಇತರೆ ಪ್ರಮುಖ ಭಾಗಗಳು: ಹೆಬ್ಬಾಳ, ಸಿಲ್ಕ್ ಬೋರ್ಡ್, ಟೌನ್ ಹಾಲ್ ಹಾಗೂ ಮೈಸೂರು ರಸ್ತೆಯ ನಾಯಂಡಹಳ್ಳಿ ಭಾಗದ ಪ್ರಮುಖ ಜಂಕ್ಷನ್ಗಳಲ್ಲಿ ಹೊಸ ಮೇಲ್ಸೇತುವೆಗಳು ಬರಲಿವೆ.
ಜಿಬಿಎ ವ್ಯಾಪ್ತಿಯಲ್ಲಿ ಅಭಿವೃದ್ಧಿ: ಗ್ರೇಟರ್ ಬೆಂಗಳೂರು ಪ್ರಾಧಿಕಾರದ (GBA) ಐದು ಪಾಲಿಕೆ ವ್ಯಾಪ್ತಿಗಳಲ್ಲಿ ಈ ಯೋಜನೆಗಳು ಹರಡಿಕೊಂಡಿವೆ. ಕೇವಲ ರಸ್ತೆ ಅಗಲೀಕರಣದಿಂದ ಟ್ರಾಫಿಕ್ ಸಮಸ್ಯೆ ಬಗೆಹರಿಯದ ಕಾರಣ, ‘ಎಂಡ್-ಟು-ಎಂಡ್’ ಕನೆಕ್ಟಿವಿಟಿ ನೀಡಲು ಸರ್ಕಾರ ಈ ಎಲಿವೇಟೆಡ್ ಕಾರಿಡಾರ್ಗಳಿಗೆ ಆದ್ಯತೆ ನೀಡಿದೆ. ಅಂತರರಾಷ್ಟ್ರೀಯ ಮಟ್ಟದಲ್ಲಿ ಐಟಿ-ಬಿಟಿ ರಾಜಧಾನಿಯಾಗಿರುವ ಬೆಂಗಳೂರಿನ ಬ್ರ್ಯಾಂಡ್ ಮೌಲ್ಯವನ್ನು ಉಳಿಸಿಕೊಳ್ಳಲು ಈ ಮೂಲಸೌಕರ್ಯ ಕ್ರಾಂತಿ ಅನಿವಾರ್ಯ ಎಂದು ಕಾನೂನು ಸಚಿವ ಎಚ್.ಕೆ. ಪಾಟೀಲ್ ತಿಳಿಸಿದ್ದಾರೆ.
Recent Articles
ರಾಹುಲ್ ಗಾಂಧಿಗೆ ಬಿಗ್ ಶಾಕ್: ದ್ವಿಪೌರತ್ವ ವಿವಾದದಲ್ಲಿ ಎಫ್ಐಆರ್ ದಾಖಲಿಸಲು ಹೈಕೋರ್ಟ್ ಖಡಕ್ ಸೂಚನೆ!
