ದಕ್ಷಿಣ ಭಾರತದ 5 ರೈಲ್ವೆ ಯೋಜನೆಗಳಿಗೆ ಕೇಂದ್ರ ಸಂಪುಟ ಅಂಕಿತ: ಕರ್ನಾಟಕ ಸೇರಿದಂತೆ 4 ರಾಜ್ಯಗಳಲ್ಲಿ 540 ಕಿಮೀ ರೈಲು ಹಳಿ ವಿಸ್ತರಣೆ; ₹10,021 ಕೋಟಿ ಮಂಜೂರು.

ಬೆಂಗಳೂರು: ದಕ್ಷಿಣ ಭಾರತದ ಪ್ರಮುಖ ರಾಜ್ಯಗಳ ಸಾರಿಗೆ ವ್ಯವಸ್ಥೆಯಲ್ಲಿ ಹೊಸ ಸಂಚಲನ ಮೂಡಿಸಲು ಕೇಂದ್ರ ಸರ್ಕಾರ ಮುಂದಾಗಿದೆ. ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರ ಅಧ್ಯಕ್ಷತೆಯಲ್ಲಿ ನಡೆದ ಆರ್ಥಿಕ ವ್ಯವಹಾರಗಳ ಸಚಿವ ಸಂಪುಟ ಸಮಿತಿಯು (CCEA) ದಕ್ಷಿಣ ಭಾರತದ ನಾಲ್ಕು ರಾಜ್ಯಗಳ ವ್ಯಾಪ್ತಿಯಲ್ಲಿ ರೈಲ್ವೆ ಮೂಲಸೌಕರ್ಯವನ್ನು ಮೇಲ್ದರ್ಜೆಗೇರಿಸಲು ₹10,021 ಕೋಟಿ ವೆಚ್ಚದ ಐದು ಪ್ರಮುಖ ರೈಲ್ವೆ ಯೋಜನೆಗಳಿಗೆ ಅನುಮೋದನೆ ನೀಡಿದೆ.

ಈ ಯೋಜನೆಯು ಕರ್ನಾಟಕ, ತಮಿಳುನಾಡು, ಆಂಧ್ರಪ್ರದೇಶ ಮತ್ತು ತೆಲಂಗಾಣ ರಾಜ್ಯಗಳನ್ನು ಒಳಗೊಂಡಿದ್ದು, ಒಟ್ಟು 540 ಕಿಲೋಮೀಟರ್ ಹೆಚ್ಚುವರಿ ರೈಲು ಮಾರ್ಗವನ್ನು ಸೃಷ್ಟಿಸಲಿದೆ. 2029-30ರ ವೇಳೆಗೆ ಈ ಎಲ್ಲಾ ಯೋಜನೆಗಳು ಪೂರ್ಣಗೊಳ್ಳುವ ನಿರೀಕ್ಷೆಯಿದೆ.

ಬೆಂಗಳೂರು ಪ್ರಯಾಣಿಕರಿಗೆ ಬಿಗ್ ರಿಲೀಫ್: ವೈಟ್‌ಫೀಲ್ಡ್ – ಬಂಗಾರಪೇಟೆ ಕ್ವಾಡ್ರಪ್ಲಿಂಗ್

ಈ ಬೃಹತ್ ಅನುಮೋದನೆಯಲ್ಲಿ ಬೆಂಗಳೂರು ಮೂಲಸೌಕರ್ಯಕ್ಕೆ ಸಂಬಂಧಿಸಿದ ಪ್ರಮುಖ ಯೋಜನೆಯೊಂದಿದೆ. ಬೆಂಗಳೂರಿನ ಸಬರ್ಬನ್ ಸಂಪರ್ಕಕ್ಕೆ ಅತ್ಯಂತ ಅಗತ್ಯವಿದ್ದ 47 ಕಿಲೋಮೀಟರ್ ಉದ್ದದ ವೈಟ್‌ಫೀಲ್ಡ್-ಬಂಗಾರಪೇಟೆ ಮಾರ್ಗದ ಚತುಷ್ಪಥ (Quadrupling) ಯೋಜನೆಗೆ ಹಸಿರು ನಿಶಾನೆ ಸಿಕ್ಕಿದೆ. ಪ್ರಸ್ತುತ ಇರುವ ಎರಡು ಲೈನ್‌ಗಳ ಜೊತೆಗೆ ಹೆಚ್ಚುವರಿಯಾಗಿ 3ನೇ ಮತ್ತು 4ನೇ ರೈಲು ಮಾರ್ಗಗಳನ್ನು ನಿರ್ಮಿಸಲಾಗುವುದು.

ಈ ಯೋಜನೆಯಿಂದಾಗಿ ದೇವನಹಳ್ಳಿ, ಮಾಲೂರು, ಟೇಕಲ್ ಮತ್ತು ಬಂಗಾರಪೇಟೆಯಿಂದ ದಿನನಿತ್ಯ ಉದ್ಯೋಗ ಹಾಗೂ ವ್ಯಾಪಾರಕ್ಕಾಗಿ ಬೆಂಗಳೂರಿಗೆ ಆಗಮಿಸುವ ಸಾವಿರಾರು ಪ್ರಯಾಣಿಕರಿಗೆ ನೇರ ಅನುಕೂಲವಾಗಲಿದೆ. ರೈಲುಗಳ ವಿಳಂಬ ತಪ್ಪುವುದಲ್ಲದೆ, ಸರಕು ಸಾಗಣೆ ಮತ್ತು ದೀರ್ಘದೂರದ ಪ್ರಯಾಣಿಕ ರೈಲುಗಳ ಸಂಚಾರ ಕ್ಷಮತೆ ಗಣನೀಯವಾಗಿ ಹೆಚ್ಚಾಗಲಿದೆ.

PC: Bharat Tech & Infra.

ಇದಲ್ಲದೆ, ಬೆಂಗಳೂರು ಕ್ಯಾಂಟೋನ್ಮೆಂಟ್-ವೈಟ್‌ಫೀಲ್ಡ್ ಚತುಷ್ಪಥ ಕಾಮಗಾರಿಯೂ ವೇಗವಾಗಿ ನಡೆಯುತ್ತಿದ್ದು, 2018-19ರಲ್ಲಿ ₹493 ಕೋಟಿಗೆ ಮಂಜೂರಾಗಿದ್ದ ಈ ಯೋಜನೆಯ ವೆಚ್ಚ ಈಗ ₹667 ಕೋಟಿಗೆ ಏರಿಕೆಯಾಗಿದೆ. ಈ ಮಾರ್ಗದ ಕಾಮಗಾರಿಯು 2027ರ ಫೆಬ್ರವರಿ ವೇಳೆಗೆ ಪೂರ್ಣಗೊಳ್ಳುವ ಭರವಸೆಯಿದೆ.

ಮಂಜೂರಾದ ಇತರ 4 ಪ್ರಮುಖ ರೈಲ್ವೆ ಯೋಜನೆಗಳು:

1. ಅರಕ್ಕೋಣಂ – ರೇಣಿಗುಂಟ: 77 ಕಿಮೀ ಉದ್ದದ ಚತುಷ್ಪಥ (Quadrupling) ಮಾರ್ಗ.
2. ಹೊಸೂರು – ಓಮಲೂರು: 147 ಕಿಮೀ ಉದ್ದದ ದ್ವಿಪಥ (Doubling) ಕಾಮಗಾರಿ.
3. ಸೇಲಂ – ಕರೂರು – ದಿಂಡಿಗಲ್: 159 ಕಿಮೀ ಉದ್ದದ ಹಳಿ ದ್ವಿಪಥ ಯೋಜನೆ.
4. ಸಿಖಂದರಾಬಾದ್ (ಘಾಟ್‌ಕೇಸರ್) – ಕಾಜಿಪೇಟ್: 110 ಕಿಮೀ ಉದ್ದದ ಮಲ್ಟಿ-ಟ್ರ್ಯಾಕಿಂಗ್ ಯೋಜನೆ.

17 ಜಿಲ್ಲೆಗಳು, 2,121 ಹಳ್ಳಿಗಳಿಗೆ ಅನುಕೂಲ

ಕೇಂದ್ರ ಸರ್ಕಾರದ ಮಾಹಿತಿಯಂತೆ, ಈ ಐದು ಯೋಜನೆಗಳು ಒಟ್ಟು 17 ಜಿಲ್ಲೆಗಳ ವ್ಯಾಪ್ತಿಗೆ ಬರಲಿದ್ದು, ಸುಮಾರು 52 ಲಕ್ಷ ಜನಸಂಖ್ಯೆ ಹೊಂದಿರುವ 2,121 ಗ್ರಾಮಗಳಿಗೆ ನೇರ ಸಂಪರ್ಕ ಮತ್ತು ಸಾರಿಗೆ ಅನುಕೂಲವನ್ನು ಕಲ್ಪಿಸಲಿವೆ.

ಪಿಎಂ ಗತಿ ಶಕ್ತಿ ರಾಷ್ಟ್ರೀಯ ಮಾಸ್ಟರ್ ಪ್ಲಾನ್ ಅಡಿಯಲ್ಲಿ ಈ ಯೋಜನೆಗಳನ್ನು ರೂಪಿಸಲಾಗಿದ್ದು, ಇವು ಬಹುಮಾದರಿ ಸಂಪರ್ಕ (Multimodal Connectivity) ಮತ್ತು ಲಾಜಿಸ್ಟಿಕ್ಸ್ ದಕ್ಷತೆಯನ್ನು ಹೆಚ್ಚಿಸಲಿವೆ. ಇಂಧನ ಆಮದು ಕಡಿತ, ಇಂಗಾಲದ ಹೊರಸೂಸುವಿಕೆ (Carbon Emissions) ಕಡಿಮೆ ಮಾಡುವುದು ಮತ್ತು ದೇಶದ ಸಾರಿಗೆ ವೆಚ್ಚವನ್ನು ತಗ್ಗಿಸುವ ನಿಟ್ಟಿನಲ್ಲಿ ಈ ರೈಲ್ವೆ ಯೋಜನೆಗಳು ಅತ್ಯಂತ ನಿರ್ಣಾಯಕ ಪಾತ್ರ ವಹಿಸಲಿವೆ.

ಇತ್ತೀಚಿನ ಲೇಖನಕ್ಕಾಗಿ ಇಲ್ಲಿ ಕ್ಲಿಕ್ ಮಾಡಿ:

ಭಾರತ ರತ್ನ ವಿಜ್ಞಾನಿ ಪ್ರೊ. ಸಿ.ಎನ್.ಆರ್. ರಾವ್ ಅವರಿಗೆ ನೋಟಿಸ್ ಜಾರಿ? ಚುನಾವಣಾ ಆಯೋಗ ನೀಡಿದ ಬಿಗ್ ಅಪ್‌ಡೇಟ್ ಇಲ್ಲಿದೆ.

ದಕ್ಷ ಕಾರ್ಯಾಚರಣೆ, ಅಪಾರ ಸಾಧನೆ: ದಕ್ಷಿಣ ಪಶ್ಚಿಮ ರೈಲ್ವೆಯ RPF ತಂಡದಿಂದ 33 ಮಕ್ಕಳ ರಕ್ಷಣೆ, ₹12.5 ಕೋಟಿ ಮೌಲ್ಯದ ಮಾದಕ ದ್ರವ್ಯ ಜಪ್ತಿ.

ಬಾಗಲಕೋಟೆ ಶಾಲಾ ದುರಂತ: ಸರ್ಕಾರಿ ಶಾಲೆಯ ಮೇಲ್ಛಾವಣಿ ಪ್ಲ್ಯಾಸ್ಟರ್‌ ಕುಸಿತ – ಮುಖ್ಯೋಪಾಧ್ಯಾಯ ಹಾಗೂ ಮೂವರು ಇಂಜಿನಿಯರ್‌ಗಳು ಸಸ್ಪೆಂಡ್.