ಮಾಜಿ ಸಹಪಾಠಿಯ ಬ್ಲ್ಯಾಕ್‌ಮೇಲ್‌ಗೆ ಹೆದರಿ ಬೆಂಗಳೂರಿನ ಅಗರ ಕೆರೆಗೆ ಹಾರಿದ ಶಿವಮೊಗ್ಗದ 22 ವರ್ಷದ ಯುವತಿ.

ಬೆಂಗಳೂರಿನ ಎಚ್‌ಎಸ್‌ಆರ್ ಲೇಔಟ್‌ನಲ್ಲಿ ವರದಿಯಾಗಿದ್ದು, ಮಾಜಿ ಸಹಪಾಠಿಯೊಬ್ಬನ ನಿರಂತರ ಕಿರುಕುಳ ಹಾಗೂ ಬ್ಲ್ಯಾಕ್‌ಮೇಲ್‌ಗೆ ಮನನೊಂದು 22 ವರ್ಷದ ಯುವತಿಯೊಬ್ಬಳು ಅಗರ ಕೆರೆಗೆ ಹಾರಿ ಆತ್ಮಹತ್ಯೆ ಮಾಡಿಕೊಂಡಿದ್ದಾಳೆ.

ಮೃತ ಯುವತಿಯನ್ನು ಶಿವಮೊಗ್ಗ ಜಿಲ್ಲೆಯ ಸಾಗರ ತಾಲೂಕಿನ ಮೂಲದ ವಾಣಿಶ್ರೀ ಎಲ್. ಎಂದು ಗುರುತಿಸಲಾಗಿದೆ. ಈಕೆ ಕಳೆದ ಆರು ತಿಂಗಳಿಂದ ಬೆಂಗಳೂರಿನ ಎಚ್‌ಎಸ್‌ಆರ್ ಲೇಔಟ್‌ನಲ್ಲಿರುವ ಪಿಜಿಯೊಂದರಲ್ಲಿ ತಂಗಿದ್ದು, ನಗರದ ಪ್ರಸಿದ್ಧ ಜ್ಯುವೆಲ್ಲರಿ ಶೋರೂಂ ಒಂದರಲ್ಲಿ ಉದ್ಯೋಗಿಯಾಗಿದ್ದರು.

ಕಿರುಕುಳ ಮತ್ತು ಕೊನೆಯ ಹೆಜ್ಜೆ

ಪೊಲೀಸ್ ಮೂಲಗಳ ಪ್ರಕಾರ, ಭಾನುವಾರ ವಾಣಿಶ್ರೀ ದಿಢೀರನೆ ನಾಪತ್ತೆಯಾಗಿದ್ದರು. ವಾಣಿಶ್ರೀ ಜೊತೆ ಪಿಜಿಯಲ್ಲಿದ್ದ ಕೊಠಡಿ ಗೆಳತಿ ಆಕೆಯ ಸಹೋದರಿ ಪೂಜಾ ಅವರಿಗೆ ಕರೆ ಮಾಡಿ ವಿಷಯ ತಿಳಿಸಿದ್ದಾರೆ. ತಕ್ಷಣ ಜಾಗೃತರಾದ ಕುಟುಂಬಸ್ಥರು ಎಚ್‌ಎಸ್‌ಆರ್ ಲೇಔಟ್ ಪೊಲೀಸ್ ಠಾಣೆಗೆ ದೂರು ನೀಡಲು ಮುಂದಾಗಿದ್ದಾರೆ.

ದೂರಿನ ಆಧಾರದ ಮೇಲೆ ಪೊಲೀಸರು ಮತ್ತು ಕುಟುಂಬದವರು ಆಕೆಯ ಮೊಬೈಲ್ ಲೊಕೇಶನ್ ಹಾಗೂ ಹುಡುಕಾಟ ನಡೆಸಿದಾಗ ಅಗರ ಕೆರೆಯ ದಂಡೆಯ ಮೇಲೆ ವಾಣಿಶ್ರೀ ಅವರ ಚಪ್ಪಲಿಗಳು ಪತ್ತೆಯಾಗಿವೆ. ತಕ್ಷಣವೇ ಕಾರ್ಯಪ್ರವೃತ್ತರಾದ ಅಗ್ನಿಶಾಮಕ ಸಿಬ್ಬಂದಿ ಮತ್ತು ತುರ್ತು ಸೇವಾ ಸಿಬ್ಬಂದಿ ಕೆರೆಯಲ್ಲಿ ಕಾರ್ಯಾಚರಣೆ ನಡೆಸಿ ಆಕೆಯ ಮೃತದೇಹವನ್ನು ಹೊರತೆಗೆದಿದ್ದಾರೆ.

ಘಟನಾ ಸ್ಥಳದಲ್ಲಿ ಸಿಕ್ಕ ಡೆತ್ ನೋಟ್: ಸತ್ಯ ಬಯಲು

ತನಿಖೆಯ ವೇಳೆ ಪೊಲೀಸರಿಗೆ ವಾಣಿಶ್ರೀ ಬರೆದಿಟ್ಟಿದ್ದರೆನ್ನಲಾದ ಡೆತ್ ನೋಟ್ ಲಭ್ಯವಾಗಿದೆ. ಅದರಲ್ಲಿ ತನ್ನ ಕಾಲೇಜು ದಿನಗಳ ಮಾಜಿ ಸಹಪಾಠಿ ಅಭಿನಂದನ್ ಅಥವಾ ಅಭಿಷೇಕ್ ಎಎಸ್ ಎಂಬಾತನೇ ತನ್ನ ಸಾವಿಗೆ ನೇರ ಕಾರಣ ಎಂದು ಉಲ್ಲೇಖಿಸಲಾಗಿದೆ.

“ನನ್ನ ಸಾವಿಗೆ ಅಭಿಷೇಕ್ ಸಂಪೂರ್ಣ ಹೊಣೆ. ಆತ ನನಗೆ ಸತತವಾಗಿ ಹಳೆಯ ವೀಡಿಯೋಗಳು ಹಾಗೂ ಫೋಟೋಗಳನ್ನು ವಾಟ್ಸಾಪ್ ಮೂಲಕ ಕಳುಹಿಸಿ ಬೆದರಿಕೆ ಹಾಕುತ್ತಿದ್ದಾನೆ. ದಿನನಿತ್ಯ ಕರೆ ಮಾಡಿ ಮಾನಸಿಕವಾಗಿ ತೀವ್ರ ಕಿರುಕುಳ ನೀಡುತ್ತಿದ್ದಾನೆ. ಈ ವಿಚಾರದಿಂದಾಗಿ ನನ್ನ ಕುಟುಂಬದ ಗೌರವಕ್ಕೆ ಯಾವುದೇ ರೀತಿಯ ಧಕ್ಕೆ ಬರಬಾರದು ಎಂಬ ಒಂದೇ ಕಾರಣಕ್ಕೆ ನಾನು ಈ ಕಠಿಣ ನಿರ್ಧಾರ ತೆಗೆದುಕೊಳ್ಳುತ್ತಿದ್ದೇನೆ,” ಎಂದು ಡೆತ್ ನೋಟ್‌ನಲ್ಲಿ ಕಣ್ಣೀರಿಡುತ್ತ ಬರೆದುಕೊಂಡಿದ್ದಾಳೆ.

ಆರೋಪಿಗಾಗಿ ಬಲೆ ಬೀಸಿದ ಪೊಲೀಸರು

ವಾಣಿಶ್ರೀ ನೀಡಿದ ಡೆತ್ ನೋಟ್ ಆಧಾರದ ಮೇಲೆ ಎಚ್‌ಎಸ್‌ಆರ್ ಲೇಔಟ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಘಟನೆಯ ನಂತರ ತಲೆಮರೆಸಿಕೊಂಡಿರುವ ಆರೋಪಿ ಅಭಿಷೇಕ್ ಪತ್ತೆಗಾಗಿ ಪೊಲೀಸರು ಕಟ್ಟುನಿಟ್ಟಿನ ಕಾರ್ಯಾಚರಣೆ ಆರಂಭಿಸಿದ್ದಾರೆ. ಆತನ ವಾಟ್ಸಾಪ್ ಸಂದೇಶಗಳು, ಕರೆಗಳ ವಿವರ (CDR) ಹಾಗೂ ಸಾಮಾಜಿಕ ಜಾಲತಾಣದ ಖಾತೆಗಳನ್ನು ಪೊಲೀಸರು ಪರಿಶೀಲಿಸುತ್ತಿದ್ದಾರೆ.

ಯುವತಿಯ ಅಕಾಲಿಕ ಸಾವು ಆಕೆಯ ಹುಟ್ಟೂರಾದ ಸಾಗರದಲ್ಲಿ ಹಾಗೂ ಆಕೆಯ ಕುಟುಂಬದಲ್ಲಿ ತೀವ್ರ ಶೋಕವನ್ನು ಉಂಟುಮಾಡಿದೆ. ಸಾಮಾಜಿಕ ಜಾಲತಾಣಗಳು ಹಾಗೂ ತಂತ್ರಜ್ಞಾನವನ್ನು ಬಳಸಿ ಯುವತಿಯರಿಗೆ ಕಿರುಕುಳ ನೀಡುವ ಇಂತಹ ಪ್ರಕರಣಗಳ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಬೇಕು ಎಂದು ಸಾರ್ವಜನಿಕರು ಆಗ್ರಹಿಸಿದ್ದಾರೆ.

ನೆನಪಿಡಿ: ಆತ್ಮಹತ್ಯೆ ಯಾವುದಕ್ಕೂ ಪರಿಹಾರವಲ್ಲ. ನೀವು ಅಥವಾ ನಿಮ್ಮಿಷ್ಟದವರು ಮಾನಸಿಕ ಒತ್ತಡ ಅಥವಾ ಆತಂಕ ಎದುರಿಸುತ್ತಿದ್ದರೆ, ತಕ್ಷಣ ಸಹಾಯ ಪಡೆಯಿರಿ.

• ಸರ್ಕಾರದ ಟೆಲಿ-ಮಾನಸ್ (Tele-MANAS) ಸಹಾಯವಾಣಿ: 14416 ಅಥವಾ 1800-891-4416
• ಸಹಾಯ್ (Sahai) ಸಹಾಯವಾಣಿ: 080-25497777

ಕರ್ನಾಟಕ ಮತದಾರರ ಪಟ್ಟಿ: ಸಿಇಒರಿಂದ ಕರಡು ಪಟ್ಟಿ ಬಿಡುಗಡೆ, 43 ಲಕ್ಷಕ್ಕೂ ಹೆಚ್ಚು ಜನರಿಗೆ ಶೀಘ್ರವೇ ತಲುಪಲಿದೆ ನೋಟಿಸ್.

ಚಿಕ್ಕಮಗಳೂರಿನಲ್ಲಿ ಟಿಪ್ಪು ಕಟೌಟ್: ಪಾಕಿಸ್ತಾನ್ ಹಾಡು ವೈರಲ್ ಮಾಡಿದ 23 ವರ್ಷದ ರೋಷನ್ ಬಂಧನ.

ಅಮೆಜಾನ್, ಸ್ವಿಗ್ಗಿ, ಬಿಗ್‌ಬಾಸ್ಕೆಟ್‌ಗೆ ಬಿಗ್ ಶಾಕ್: ವಿಷಕಾರಿ ಉಮ್ಮತ್ತಿ (Datura) ಮಾರಾಟ ಹಿನ್ನೆಲೆ ಆಹಾರ ಪರವಾನಗಿ ಅಮಾನತು!