ಖಾನ್ ಸರ್ ಕೋಚಿಂಗ್ ಸೆಂಟರ್‌ಗೆ ಬೀಗ! ಲಕ್ನೋ ಅಗ್ನಿ ದುರಂತದ ಬೆನ್ನಲ್ಲೇ ಪ್ರಯಾಗ್‌ರಾಜ್‌ನಲ್ಲಿ ಯೋಗಿ ಸರ್ಕಾರದ ಖಡಕ್ ಆಕ್ಷನ್.

ಉತ್ತರ ಪ್ರದೇಶದ ಲಕ್ನೋದ ಅಲಿಗಂಜ್ ಪ್ರದೇಶದ ಕೋಚಿಂಗ್ ಸೆಂಟರ್‌ನಲ್ಲಿ ಇತ್ತೀಚೆಗೆ ಸಂಭವಿಸಿದ ಭೀಕರ ಅಗ್ನಿ ದುರಂತದಲ್ಲಿ 15 ಅಮಾಯಕ ಜೀವಗಳು ಬಲಿಯಾಗಿದ್ದವು. ಈ ಘಟನೆಯು ಇಡೀ ರಾಜ್ಯವನ್ನೇ ನಡುಗಿಸಿದ್ದು, ಶೈಕ್ಷಣಿಕ ಸಂಸ್ಥೆಗಳಲ್ಲಿನ ಸುರಕ್ಷತಾ ನಿಯಮಗಳ ಬಗ್ಗೆ ತೀವ್ರ ಆತಂಕ ಮೂಡಿಸಿದೆ. ಇದರ ಬೆನ್ನಲ್ಲೇ ಎಚ್ಚೆತ್ತುಕೊಂಡಿರುವ ಯೋಗಿ ಆದಿತ್ಯನಾಥ್ ಸರ್ಕಾರ, ರಾಜ್ಯಾದ್ಯಂತ ನಿಯಮ ಉಲ್ಲಂಘಿಸುವ ಕೋಚಿಂಗ್ ಸೆಂಟರ್‌ಗಳ ವಿರುದ್ಧ ದಂಡಯಾತ್ರೆ ಆರಂಭಿಸಿದೆ. ಈ ಕಠಿಣ ಕ್ರಮದ ಭಾಗವಾಗಿ, ದೇಶದ ಪ್ರಸಿದ್ಧ ಶಿಕ್ಷಕ ಖಾನ್ ಸರ್ ಅವರಿಗೆ ಸೇರಿದ ಪ್ರಯಾಗ್‌ರಾಜ್‌ನ ‘ಖಾನ್ ಗ್ಲೋಬಲ್ ಕ್ಲಾಸಸ್’ ಸಂಸ್ಥೆಯನ್ನು ಅಧಿಕಾರಿಗಳು ಸೀಲ್ ಮಾಡಿದ್ದಾರೆ.

ಲಕ್ನೋದಲ್ಲಿ ಭೀಕರ ಅಗ್ನಿ ದುರಂತ 15 ವಿದ್ಯಾರ್ಥಿಗಳು ಸಜೀವ ದಹನ: ಜೀವ ಉಳಿಸಿಕೊಳ್ಳಲು ಮಹಡಿಯಿಂದ ಜಿಗಿದ ಯುವಕರು, ಗೋಡೆ ಒಡೆದು ಹೆಣಗಳ ಹೊರತೆಗೆದ ರಕ್ಷಣಾ ಪಡೆ.

ಲೈವ್ ಕಾರ್ಯಾಚರಣೆ: ವಿದ್ಯಾರ್ಥಿಗಳನ್ನು ಹೊರಗೆ ಕಳುಹಿಸಿ ಸೀಲ್ ಹಾಕಿದ ಪಿಡಿಎ!

ಪ್ರಯಾಗ್‌ರಾಜ್ ಅಭಿವೃದ್ಧಿ ಪ್ರಾಧಿಕಾರದ (PDA) ಉಪಾಧ್ಯಕ್ಷರಾದ ರಿಷಿ ರಾಜ್ ಅವರ ಕಟ್ಟುನಿಟ್ಟಿನ ಆದೇಶದ ಮೇರೆಗೆ ಈ ಕಾರ್ಯಾಚರಣೆ ನಡೆಸಲಾಗಿದೆ. ನಿಯಮಬಾಹಿರವಾಗಿ ನಡೆಯುತ್ತಿರುವ ಕೋಚಿಂಗ್ ಸಂಸ್ಥೆಗಳ ಸುರಕ್ಷತೆ ಮತ್ತು ಕಟ್ಟಡದ ನಿಬಂಧನೆಗಳ ಪರಿಶೀಲನೆಗಾಗಿ ಈ ತನಿಖೆ ಹಮ್ಮಿಕೊಳ್ಳಲಾಗಿತ್ತು. ಮಂಗಳವಾರ ವಲಯ ಅಧಿಕಾರಿ ಗಂಗೇಶ್ ಕುಮಾರ್ ಸಿಂಗ್ ನೇತೃತ್ವದ ಪಿಡಿಎ ಜಾರಿ ತಂಡವು ಸಿವಿಲ್ ಲೈನ್ಸ್‌ನಲ್ಲಿರುವ ಖಾನ್ ಸರ್ ಅವರ ಕೇಂದ್ರಕ್ಕೆ ದಾಳಿ ನಡೆಸಿತು.

ದಾಳಿಯ ಸಮಯದಲ್ಲಿ ತರಗತಿಯಲ್ಲಿದ್ದ ವಿದ್ಯಾರ್ಥಿಗಳನ್ನು ತಕ್ಷಣವೇ ಆವರಣದಿಂದ ಹೊರಗೆ ಕಳುಹಿಸಲಾಯಿತು. ಕಚೇರಿಯನ್ನು ಸಂಪೂರ್ಣವಾಗಿ ಮುಚ್ಚಿದ ನಂತರ ಇಡೀ ಕಟ್ಟಡಕ್ಕೆ ಅಧಿಕಾರಿಗಳು ಸೀಲ್ ಹಾಕಿದರು. ಅಲ್ಲದೆ, ಕಟ್ಟಡದ ಹೊರಭಾಗದಲ್ಲಿ ಎಚ್ಚರಿಕೆ ನೋಟಿಸ್ ಒಂದನ್ನು ಅಂಟಿಸಲಾಗಿದೆ. ಒಂದು ವೇಳೆ ಅಧಿಕಾರಿಗಳ ಅನುಮತಿ ಇಲ್ಲದೆ ಸೀಲ್ ಮುರಿಯಲು ಪ್ರಯತ್ನಿಸಿದರೆ ಅಥವಾ ಮತ್ತೆ ತರಗತಿಗಳನ್ನು ಆರಂಭಿಸಿದರೆ ಪ್ರಥಮ ಮಾಹಿತಿ ವರದಿ (FIR) ದಾಖಲಿಸಿ ಕಠಿಣ ಕಾನೂನು ಕ್ರಮ ಕೈಗೊಳ್ಳಲಾಗುವುದು ಎಂದು ನೋಟಿಸ್‌ನಲ್ಲಿ ಸ್ಪಷ್ಟವಾಗಿ ಎಚ್ಚರಿಸಲಾಗಿದೆ.

PC:PTI.

ವಾಣಿಜ್ಯ ಪರವಾನಗಿ ಇದೆ, ಆದರೆ ಸಮುದಾಯ ಸೌಲಭ್ಯದ ಅನುಮತಿ ಎಲ್ಲಿದೆ?

ಪಿಡಿಎ ಅಧಿಕಾರಿಗಳ ಪ್ರಕಾರ, ಖಾನ್ ಗ್ಲೋಬಲ್ ಕ್ಲಾಸಸ್ ನಡೆಯುತ್ತಿದ್ದ ಕಟ್ಟಡಕ್ಕೆ ವಾಣಿಜ್ಯ ಬಳಕೆಯ (Commercial Use) ಅನುಮೋದನೆ ಇತ್ತು. ಆದರೆ, ನಿಯಮಗಳ ಪ್ರಕಾರ ಕೋಚಿಂಗ್ ಇನ್‌ಸ್ಟಿಟ್ಯೂಟ್‌ಗಳು ‘ಸಮುದಾಯ ಸೇವಾ ಸೌಲಭ್ಯ’ (Community Service Facilities) ವರ್ಗದ ಅಡಿಯಲ್ಲಿ ಬರುತ್ತವೆ. ಇದಕ್ಕಾಗಿ ಪ್ರತ್ಯೇಕ ಭೂ-ಬಳಕೆ ಮತ್ತು ಸುರಕ್ಷತಾ ಅನುಮತಿಯನ್ನು ಪಡೆಯುವುದು ಕಡ್ಡಾಯವಾಗಿದೆ. ಖಾನ್ ಸರ್ ಅವರ ಸಂಸ್ಥೆಯು ಈ ಅಗತ್ಯ ನಿಯಮವನ್ನು ಪಾಲಿಸದ ಹಿನ್ನೆಲೆಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.

ರಾಜ್ಯಾದ್ಯಂತ 100ಕ್ಕೂ ಹೆಚ್ಚು ಕೋಚಿಂಗ್ ಸೆಂಟರ್‌ಗಳು ಕ್ಲೋಸ್!

ಲಕ್ನೋ ದುರಂತದ ನಂತರ ಉತ್ತರ ಪ್ರದೇಶದ ಮೂಲೆ ಮೂಲೆಗಳಲ್ಲೂ ತಪಾಸಣೆ ತೀವ್ರಗೊಂಡಿದೆ. ವರದಿಗಳ ಪ್ರಕಾರ, ಕೇವಲ ಪ್ರಯಾಗ್‌ರಾಜ್ ಮಾತ್ರವಲ್ಲದೆ ರಾಜ್ಯದ ವಿವಿಧ ಭಾಗಗಳಲ್ಲಿ ನಿಯಮ ಉಲ್ಲಂಘಿಸಿದ 100ಕ್ಕೂ ಹೆಚ್ಚು ಕೋಚಿಂಗ್ ಸಂಸ್ಥೆಗಳನ್ನು ಸೀಲ್ ಮಾಡಲಾಗಿದೆ.

ವಿವಿಧ ಜಿಲ್ಲೆಗಳಲ್ಲಿ ಸೀಲ್ ಮಾಡಲಾದ ಸಂಸ್ಥೆಗಳ ವಿವರ ಹೀಗಿದೆ:

ಘಾಜಿಯಾಬಾದ್: 59
ಶಾಮ್ಲಿ: 46
ಬಾಗ್‌ಪತ್: 40
ಬಿಜ್ನೋರ್: 28
ರಾಯ್‌ಬರೇಲಿ: 12
ಅಯೋಧ್ಯೆ: 07
ಹಾಪುರ್: 06

ಖಾನ್ ಸರ್ ಅವರ ಹೈ-ಪ್ರೊಫೈಲ್ ಕೋಚಿಂಗ್ ಸೆಂಟರ್ ಸೀಲ್ ಆಗುತ್ತಿದ್ದಂತೆ ಪ್ರಯಾಗ್‌ರಾಜ್‌ನ ಇತರ ಕೋಚಿಂಗ್ ಸೆಂಟರ್ ಮಾಲೀಕರಲ್ಲಿ ತೀವ್ರ ಆತಂಕ ಶುರುವಾಗಿದೆ. ಹಲವು ಆಪರೇಟರ್‌ಗಳು ಈಗ ಸ್ಥಳೀಯ ಸುರಕ್ಷತಾ ನಿಯಮಗಳು ಮತ್ತು ಅಗ್ನಿಶಾಮಕ ಇಲಾಖೆಯ ನಿರಾಕ್ಷೇಪಣಾ ಪತ್ರಗಳನ್ನು (NOC) ಮರುಪರಿಶೀಲಿಸಲು ಧಾವಿಸುತ್ತಿದ್ದಾರೆ. ವಿದ್ಯಾರ್ಥಿಗಳ ಜೀವದ ಜೊತೆ ಆಟವಾಡುವ ಯಾವುದೇ ಸಂಸ್ಥೆಗಳನ್ನು ಬಿಡುವುದಿಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದು, ಮುಂದಿನ ದಿನಗಳಲ್ಲಿ ಇನ್ನು ಎಷ್ಟು ಸಂಸ್ಥೆಗಳಿಗೆ ಬೀಗ ಬೀಳಲಿದೆ ಎಂಬುದನ್ನು ಕಾದು ನೋಡಬೇಕಿದೆ.

ಇತ್ತೀಚಿನ ಲೇಖನಕ್ಕಾಗಿ ಇಲ್ಲಿ ಕ್ಲಿಕ್ ಮಾಡಿ:

ಪ್ರಧಾನ ಮಂತ್ರಿ ರಾಷ್ಟ್ರೀಯ ಬಾಲ ಪುರಸ್ಕಾರ 2026: ಅಪ್ರತಿಮ ಸಾಧನೆ ಗೈದ ಬಾಲಪ್ರತಿಭೆಗಳಿಗೆ ದೇಶದ ಅತ್ಯುನ್ನತ ಗೌರವ! ಅರ್ಹತೆ ಹಾಗೂ ಅರ್ಜಿ ಸಲ್ಲಿಕೆ ಸಂಪೂರ್ಣ ಮಾಹಿತಿ ಇಲ್ಲಿದೆ.