2030ರ ವೇಳೆಗೆ ಹಸಿರು ಇಂಧನ ವಲಯದಲ್ಲಿ ಸೃಷ್ಟಿಯಾಗಲಿದೆ 44 ಲಕ್ಷಕ್ಕೂ ಅಧಿಕ ಬೃಹತ್ ಉದ್ಯೋಗಾವಕಾಶ!

ಭಾರತ ಸರ್ಕಾರವು ಪರಿಸರಸ್ನೇಹಿ ಮತ್ತು ನವೀಕರಿಸಬಹುದಾದ ಇಂಧನ ಉತ್ಪಾದನೆಗೆ ನೀಡುತ್ತಿರುವ ಆದ್ಯತೆಯು ಕೇವಲ ಪರಿಸರ ರಕ್ಷಣೆಯಷ್ಟೇ ಅಲ್ಲದೆ, ದೇಶದ ನಿರುದ್ಯೋಗ ಸಮಸ್ಯೆಗೆ ದೊಡ್ಡ ಮಟ್ಟದ ಪರಿಹಾರ ನೀಡಲು ಸಜ್ಜಾಗಿದೆ. ಹಸಿರು ಇಂಧನ ವಲಯದಲ್ಲಿ ಭಾರತ ಹಮ್ಮಿಕೊಂಡಿರುವ ಮಹತ್ವಾಕಾಂಕ್ಷಿ ಗುರಿಗಳು ದೇಶದಲ್ಲಿ 2030ರ ವೇಳೆಗೆ ಬರೋಬ್ಬರಿ 44 ಲಕ್ಷಕ್ಕೂ ಅಧಿಕ ಪೂರ್ಣಾವಧಿ ಉದ್ಯೋಗಗಳನ್ನು (FTE) ಸೃಷ್ಟಿಸಲಿವೆ ಎಂದು ಇತ್ತೀಚಿನ ಸ್ವತಂತ್ರ ಅಧ್ಯಯನ ವರದಿ ಬಹಿರಂಗಪಡಿಸಿದೆ.

ಕೌನ್ಸಿಲ್ ಆನ್ ಎನರ್ಜಿ, ಎನ್ವಿರಾನ್‌ಮೆಂಟ್ ಅಂಡ್ ವಾಟರ್ (CEEW) ಮತ್ತು ನ್ಯಾಚುರಲ್ ರಿಸೋರ್ಸಸ್ ಡಿಫೆನ್ಸ್ ಕೌನ್ಸಿಲ್ (NRDC) ಇಂಡಿಯಾ ಜಂಟಿಯಾಗಿ ನಡೆಸಿರುವ ‘ಡ್ರೈವಿಂಗ್ ಎನರ್ಜಿ ಟ್ರಾನ್ಸಿಶನ್: ವರ್ಕ್‌ಫೋರ್ಸ್, ಸ್ಕಿಲ್ಸ್, ಅಂಡ್ ಜೆಂಡರ್ ಇನ್ ಇಂಡಿಯಾಸ್ ರಿನ್ಯೂವಬಲ್ ಎನರ್ಜಿ ಸೆಕ್ಟರ್’ ಎಂಬ ಶೀರ್ಷಿಕೆಯ ಹೊಸ ವರದಿಯಲ್ಲಿ ಈ ಆಶಾದಾಯಕ ಮಾಹಿತಿ ಹೊರಬಿದ್ದಿದೆ.

CEEW-NRDC PRESS RELEASE

ರೂಫ್‌ಟಾಪ್ ಸೋಲಾರ್ ವಲಯವೇ ಕಿಂಗ್!

ಕೇಂದ್ರ ನವೀನ ಮತ್ತು ನವೀಕರಿಸಬಹುದಾದ ಇಂಧನ ಸಚಿವಾಲಯದ (MNRE) ತಾಂತ್ರಿಕ ಮಾರ್ಗದರ್ಶನದಲ್ಲಿ ಈ ವಿಶೇಷ ಅಧ್ಯಯನವನ್ನು ನಡೆಸಲಾಗಿದೆ. ಈ ವರದಿಯ ಪ್ರಕಾರ, ಸೌರ ಇಂಧನ, ಪವನ ವಿದ್ಯುತ್, ಜೈವಿಕ ಇಂಧನ (ಬಯೋ-ಎನರ್ಜಿ) ಮತ್ತು ಜಲವಿದ್ಯುತ್ ಯೋಜನೆಗಳ ಪೈಕಿ ಮನೆ ಹಾಗೂ ಕಚೇರಿಗಳ ಮೇಲ್ಛಾವಣಿ ಸೌರಶಕ್ತಿ ಅಳವಡಿಕೆ (Rooftop Solar) ವಲಯವು ಅತ್ಯಂತ ಹೆಚ್ಚು ಉದ್ಯೋಗಗಳನ್ನು ಸೃಷ್ಟಿಸುವ ಪ್ರಮುಖ ಚಾಲನಾ ಶಕ್ತಿಯಾಗಿ ಹೊರಹೊಮ್ಮಲಿದೆ.

2024-25ರ ಅವಧಿಯಲ್ಲಿ ವಿವಿಧ ಇಂಧನ ಕಂಪನಿಗಳ ಪ್ರಾಥಮಿಕ ಸಮೀಕ್ಷೆಯನ್ನು ಆಧರಿಸಿ ಈ ವರದಿಯನ್ನು ಸಿದ್ಧಪಡಿಸಲಾಗಿದೆ. ಘಟಕಗಳ ತಯಾರಿಕೆ, ಯೋಜನಾ ಅನುಷ್ಠಾನ ಮತ್ತು ಕಾರ್ಯಾಚರಣೆಯ ವಿವಿಧ ಹಂತಗಳಲ್ಲಿ ನೇರವಾಗಿ ಸೃಷ್ಟಿಯಾಗುವ ಉದ್ಯೋಗಗಳನ್ನು ಹೊಸ ಉದ್ಯೋಗಾಂಕಗಳ (FTE coefficients) ಮೂಲಕ ಈ ಅಧ್ಯಯನದಲ್ಲಿ ಅಂದಾಜಿಸಲಾಗಿದೆ.

ಗುರಿಗಿಂತ ಐದು ವರ್ಷ ಮುಂಚಿತವಾಗಿಯೇ ಸಾಧನೆ

ಭಾರತವು ಸದ್ಯ ನವೀಕರಿಸಬಹುದಾದ ಇಂಧನ ಸಾಮರ್ಥ್ಯದಲ್ಲಿ ಜಾಗತಿಕವಾಗಿ ಮೂರನೇ ಸ್ಥಾನದಲ್ಲಿದೆ. ವಿಶೇಷವೆಂದರೆ, ಒಟ್ಟು ವಿದ್ಯುತ್ ಉತ್ಪಾದನಾ ಸಾಮರ್ಥ್ಯದಲ್ಲಿ ಶೇಕಡಾ 50 ರಷ್ಟನ್ನು ಪಳೆಯುಳಿಕೆಯೇತರ (ನಾನ್-ಫಾಸಿಲ್) ಮೂಲಗಳಿಂದ ಹೊಂದುವ ತನ್ನ ಗುರಿಯನ್ನು ಭಾರತವು ನಿಗದಿತ ಸಮಯಕ್ಕಿಂತ 5 ವರ್ಷ ಮುಂಚಿತವಾಗಿಯೇ, ಅಂದರೆ 2025ರಲ್ಲೇ ತಲುಪಿ ಐತಿಹಾಸಿಕ ಸಾಧನೆ ಮಾಡಿದೆ.

ರಾಷ್ಟ್ರೀಯ ಹಸಿರು ಹೈಡ್ರೋಜನ್ ಮಿಷನ್ ಮತ್ತು 2030ರ ವೇಳೆಗೆ 500 ಗಿಗಾವ್ಯಾಟ್ (GW) ಪಳೆಯುಳಿಕೆಯೇತರ ಇಂಧನ ಸಾಮರ್ಥ್ಯ ಹೊಂದುವ ಭಾರತದ ಬೃಹತ್ ಯೋಜನೆಗಳು ಮುಂಬರುವ ದಿನಗಳಲ್ಲಿ ದೇಶದ ಆರ್ಥಿಕತೆ ಮತ್ತು ಉದ್ಯೋಗ ಮಾರುಕಟ್ಟೆಯ ಚಿತ್ರಣವನ್ನೇ ಬದಲಾಯಿಸಲಿವೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ಈ ವಲಯದಲ್ಲಿ ತಾಂತ್ರಿಕ ಕೌಶಲ್ಯ ಹೊಂದಿರುವ ಯುವಕ-ಯುವತಿಯರಿಗೆ ಮುಂದಿನ ದಿನಗಳಲ್ಲಿ ಅಪಾರ ಬೇಡಿಕೆ ಸೃಷ್ಟಿಯಾಗಲಿದೆ.

ಇತ್ತೀಚಿನ ಲೇಖನಕ್ಕಾಗಿ ಇಲ್ಲಿ ಕ್ಲಿಕ್ ಮಾಡಿ:

ಭಾರತೀಯ ನೌಕಾಸೇನೆ ನೇಮಕಾತಿ 2026: 10+2 ಬಿ.ಟೆಕ್ ಕೆಡೆಟ್ ಎಂಟ್ರಿ ಸ್ಕೀಮ್ ಪ್ರಕಟ; ದೇಶಸೇವೆಗೆ ಇಂದೇ ಅರ್ಜಿ ಹಾಕಿ!