ಹಿಮಾಲಯದಲ್ಲಿ ಭಾರತದ ಐತಿಹಾಸಿಕ ಸಾಧನೆ! ವಿಶ್ವದ ಅತಿ ಎತ್ತರದ ಜೊಜಿಲಾ ಸುರಂಗ ಮಾರ್ಗದ ಅಂತಿಮ ಬ್ರೇಕ್‌ಥ್ರೂ ಯಶಸ್ವಿ!

ಭಾರತೀಯ ಮೂಲಸೌಕರ್ಯ ಮತ್ತು ಇಂಜಿನಿಯರಿಂಗ್ ಇತಿಹಾಸದಲ್ಲೇ ಅತ್ಯಂತ ಹೆಮ್ಮೆಯ ಹಾಗೂ ಮೈಲಿಗಲ್ಲಿನ ಕ್ಷಣವೊಂದು ದಾಖಲಾಗಿದೆ. ಜಮ್ಮು-ಕಾಶ್ಮೀರ ಮತ್ತು ಲಡಾಖ್ ನಡುವೆ ಸರ್ವಋತು ಸಂಪರ್ಕ ಕಲ್ಪಿಸುವ ಮಹತ್ವಾಕಾಂಕ್ಷೆಯ 13.153 ಕಿಲೋಮೀಟರ್ ಉದ್ದದ ‘ಜೊಜಿಲಾ ಸುರಂಗ ಮಾರ್ಗ’ದ (Zojila Tunnel) ಅಂತಿಮ ಹಂತದ ಸುರಂಗ ಕೊರೆಯುವ ಕಾರ್ಯ (Final Breakthrough) ಯಶಸ್ವಿಯಾಗಿದೆ.

ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವ ನಿತಿನ್ ಗಡ್ಕರಿ ಅವರು ಅಂತಿಮ ಬ್ಲಾಸ್ಟಿಂಗ್ ಪ್ರಕ್ರಿಯೆಗೆ ಚಾಲನೆ ನೀಡುವ ಮೂಲಕ ಈ ಐತಿಹಾಸಿಕ ಕ್ಷಣಕ್ಕೆ ಸಾಕ್ಷಿಯಾಗಿದ್ದಾರೆ. ಹೈದರಾಬಾದ್ ಮೂಲದ ಖ್ಯಾತ ಮೂಲಸೌಕರ್ಯ ಸಂಸ್ಥೆಯಾದ ಮೇಘಾ ಇಂಜಿನಿಯರಿಂಗ್ ಆಂಡ್ ಇನ್‌ಫ್ರಾಸ್ಟ್ರಕ್ಚರ್ಸ್ ಲಿಮಿಟೆಡ್ (MEIL) ಹಿಮಾಲಯದ ಅತ್ಯಂತ ಕಠಿಣ ಭೂಪ್ರದೇಶದಲ್ಲಿ ಈ ಅದ್ಭುತವನ್ನು ಸೃಷ್ಟಿಸಿ ಇತಿಹಾಸ ಬರೆದಿದೆ.

जम्मू-कश्मीर और लदाख के बीच ऑल-वेदर कनेक्टिविटी का और भारत के इन्फ्रास्ट्रक्चर विकास यात्रा का महत्वपूर्ण अध्याय : जोजिला टनल – मुख्य सुरंग का ऐतिहासिक ब्रेकथ्रू!#ZojilaTunnel #AllWeatherRoad #TunnelBreakthrough #PragatiKaHighway #GatiShakti #BuildingTheNation@manojsinha_… pic.twitter.com/RqJ2kEgB8v

— Nitin Gadkari (@nitin_gadkari) June 9, 2026

ವಿಶ್ವದ ಅತಿ ಎತ್ತರದ ದ್ವಿಮುಖ ಸುರಂಗ ಮಾರ್ಗ!

ಸಮುದ್ರ ಮಟ್ಟದಿಂದ ಬರೋಬ್ಬರಿ 11,578 ಅಡಿ ಎತ್ತರದಲ್ಲಿ ನಿರ್ಮಾಣವಾಗುತ್ತಿರುವ ಈ ಜೊಜಿಲಾ ಸುರಂಗ ಮಾರ್ಗವು, ಇಷ್ಟು ಎತ್ತರದ ಪ್ರದೇಶದಲ್ಲಿ ನಿರ್ಮಾಣಗೊಂಡ ವಿಶ್ವದ ಅತಿ ಉದ್ದದ ಸಿಂಗಲ್-ಟ್ಯೂಬ್ ದ್ವಿಮುಖ (Single-Tube Bi-Directional) ರಸ್ತೆ ಸುರಂಗ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಇದು ಕೇವಲ ಒಂದು ಸುರಂಗವಲ್ಲ, ಬದಲಿಗೆ ಪ್ರತಿಕೂಲ ಹವಾಮಾನ ಹಾಗೂ ಭೌಗೋಳಿಕ ಸವಾಲುಗಳ ವಿರುದ್ಧ ಭಾರತೀಯ ಇಂಜಿನಿಯರ್‌ಗಳು ಸಾಧಿಸಿದ ಮಹತ್ತರ ವಿಜಯವಾಗಿದೆ.

ಶ್ರೀನಗರ – ಲಡಾಖ್ ಪ್ರವಾಸ ಇನ್ಮುಂದೆ ಅತ್ಯಂತ ಸುಲಭ

ಪ್ರಸ್ತುತ ಚಳಿಗಾಲದಲ್ಲಿ ಭಾರಿ ಹಿಮಪಾತ ಮತ್ತು ಹಿಮಕುಸಿತದ ಹಿನ್ನೆಲೆಯಲ್ಲಿ ಜೊಜಿಲಾ ಪಾಸ್ (Zojila Pass) ವರ್ಷದಲ್ಲಿ ಸುಮಾರು 4 ರಿಂದ 5 ತಿಂಗಳುಗಳ ಕಾಲ ಸಂಪೂರ್ಣವಾಗಿ ಮುಚ್ಚಲ್ಪಡುತ್ತದೆ. ಇದರಿಂದಾಗಿ ಲಡಾಖ್ ಪ್ರದೇಶವು ದೇಶದ ಇತರ ಭಾಗಗಳಿಂದ ಸಂಪೂರ್ಣವಾಗಿ ಕಡಿತಗೊಳ್ಳುತ್ತಿತ್ತು.

ಆದರೆ ಈ ಸುರಂಗ ಮಾರ್ಗ ಕಾರ್ಯಾರಂಭ ಮಾಡಿದರೆ, ಶ್ರೀನಗರ ಮತ್ತು ಲಡಾಖ್ ನಡುವೆ 365 ದಿನಗಳೂ ಯಾವುದೇ ಅಡೆತಡೆಯಿಲ್ಲದೆ ವಾಹನ ಸಂಚಾರ ಸಾಧ್ಯವಾಗಲಿದೆ. ಅಷ್ಟೇ ಅಲ್ಲದೆ, ಪ್ರಸ್ತುತ ಜೊಜಿಲಾ ಪಾಸ್ ದಾಟಲು ಬೇಕಾಗುವ 3ವರೆ ಗಂಟೆಗಳ ಪ್ರಯಾಣದ ಸಮಯವು ಕೇವಲ 15 ರಿಂದ 20 ನಿಮಿಷಗಳಿಗೆ ಇಳಿಕೆಯಾಗಲಿದೆ. ಇದು ಪ್ರವಾಸೋದ್ಯಮ, ಸ್ಥಳೀಯ ವ್ಯಾಪಾರ ಮತ್ತು ಭಾರತೀಯ ಸೇನೆಯ ಕಾರ್ಯತಂತ್ರದ ಚಲನಶೀಲತೆಗೆ (Strategic Mobility) ದಿಕ್ಸೂಚಿಯಾಗಲಿದೆ.

ಯೋಜನೆಯ ಒಟ್ಟು ವೆಚ್ಚ ಎಷ್ಟು?

ಈ ಬೃಹತ್ ಮತ್ತು ಅತ್ಯಂತ ಸಂಕೀರ್ಣವಾದ ಯೋಜನೆಯ ಒಟ್ಟು ಅಂದಾಜು ವೆಚ್ಚ ಸುಮಾರು 6,809.69 ಕೋಟಿ ರೂಪಾಯಿಗಳು. ನ್ಯೂ ಆಸ್ಟ್ರಿಯನ್ ಟನೆಲಿಂಗ್ ಮೆಥಡ್ (NATM) ಎಂಬ ಅತ್ಯಾಧುನಿಕ ತಂತ್ರಜ್ಞಾನವನ್ನು ಬಳಸಿ ಹಿಮಾಲಯದ ದುರ್ಬಲ ಕಲ್ಲುಗಳನ್ನು ಕೊರೆದು ಈ ಸುರಂಗವನ್ನು ನಿರ್ಮಿಸಲಾಗಿದೆ. ಇಷ್ಟೇ ಅಲ್ಲದೆ ಈ ಯೋಜನೆಯು ಹೆದ್ದಾರಿಗಳು, ಮೂರು ಪ್ರಮುಖ ಸೇತುವೆಗಳು ಮತ್ತು ಹಿಮಪಾತ ತಡೆಯುವ ಗ್ಯಾಲರಿಗಳನ್ನು ಒಳಗೊಂಡಿದೆ.

ಕಾಮಗಾರಿ ಯಾವಾಗ ಪೂರ್ಣಗೊಳ್ಳಲಿದೆ?

ಈಗಾಗಲೇ ಯೋಜನೆಯ ಶೇಕಡಾ 85 ರಷ್ಟು ಸಿವಿಲ್ ಕಾಮಗಾರಿಗಳು ಪೂರ್ಣಗೊಂಡಿದ್ದು, ಅಂತಿಮ ಬ್ರೇಕ್‌ಥ್ರೂ ಪ್ರಕ್ರಿಯೆಯು ನಿಗದಿತ ಸಮಯಕ್ಕಿಂತ ಮುಂಚಿತವಾಗಿಯೇ ಯಶಸ್ವಿಯಾಗಿದೆ. ಸುರಂಗದ ಒಳಗಿನ ಲೈನಿಂಗ್, ವಾತಾಯನ ವ್ಯವಸ್ಥೆ (Ventilation) ಮತ್ತು ಎಲೆಕ್ಟ್ರಿಕಲ್ ಕಾಮಗಾರಿಗಳು ಇನ್ನು ಬಾಕಿ ಇವೆ. ಅಧಿಕೃತ ಮೂಲಗಳ ಪ್ರಕಾರ, ಈ ಯೋಜನೆಯು 2028 ರ ಫೆಬ್ರವರಿ ವೇಳೆಗೆ ಸಂಪೂರ್ಣವಾಗಿ ಸಾರ್ವಜನಿಕ ಬಳಕೆಗೆ ಮುಕ್ತವಾಗುವ ಸಾಧ್ಯತೆಯಿದೆ.

ಭಾರತದ ಗಡಿ ಭದ್ರತೆಯನ್ನು ಬಲಪಡಿಸುವ ಮತ್ತು ಲಡಾಖ್ ಜನರ ದಶಕಗಳ ಕನಸನ್ನು ನನಸು ಮಾಡುವಲ್ಲಿ ಯಶಸ್ವಿಯಾಗಿರುವ MEIL ಸಂಸ್ಥೆ ಹಾಗೂ ಭಾರತೀಯ ಇಂಜಿನಿಯರ್‌ಗಳ ಶ್ರಮ ನಿಜಕ್ಕೂ ಪ್ರತಿಯೊಬ್ಬ ಭಾರತೀಯನೂ ಹೆಮ್ಮೆ ಪಡುವಂತಹದ್ದಾಗಿದೆ.

ಇತ್ತೀಚಿನ ಲೇಖನಕ್ಕಾಗಿ ಇಲ್ಲಿ ಕ್ಲಿಕ್ ಮಾಡಿ:

ಬೆಂಗಳೂರು ಜನತೆಗೆ ಬಿಗ್ ರಿಲೀಫ್: ವಸತಿ ಕಟ್ಟಡಗಳ ವಿದ್ಯುತ್ ಸಂಪರ್ಕ ನಿಯಮದಲ್ಲಿ ಸರ್ಕಾರದಿಂದ ಮಹತ್ವದ ವಿಶೇಷ ರಿಯಾಯಿತಿ ಘೋಷಣೆ!