ತ್ರ್ಯಂಬಕೇಶ್ವರದ ಪವಿತ್ರ ‘ಅಮೃತ ಕುಂಡ’ದಲ್ಲಿ ಪ್ರತ್ಯಕ್ಷವಾಯ್ತು ದಶಕಗಳ ಕಾಲ ಮರೆಯಾಗಿದ್ದ ರಹಸ್ಯ ಶಿವಲಿಂಗ.

ಮಹಾರಾಷ್ಟ್ರದ ನಾಸಿಕ್ ಜಿಲ್ಲೆಯ ಪ್ರಸಿದ್ಧ ಜ್ಯೋತಿರ್ಲಿಂಗ ಕ್ಷೇತ್ರವಾದ ಶ್ರೀ ತ್ರ್ಯಂಬಕೇಶ್ವರ ಮಹಾದೇವ ದೇವಸ್ಥಾನದ ಆವರಣದಲ್ಲಿ ಭಕ್ತಿಭಾವದ ಪರಾಕಾಷ್ಠೆ ಮೂಡಿಸುವಂತಹ ಅತ್ಯಂತ ಅಪರೂಪದ ಹಾಗೂ ದೈವಿಕ ಘಟನೆಯೊಂದು ಜರುಗಿದೆ. ಮುಂಬರುವ ಪವಿತ್ರ ನಾಸಿಕ್ ಕುಂಭಮೇಳದ ಪೂರ್ವಸಿದ್ಧತೆಗಾಗಿ ದೇವಸ್ಥಾನದ ಇತಿಹಾಸ ಪ್ರಸಿದ್ಧ ‘ಅಮೃತ ಕುಂಡ’ವನ್ನು ಸ್ವಚ್ಛಗೊಳಿಸುವ ಸಂದರ್ಭದಲ್ಲಿ, ದಶಕಗಳ ಕಾಲ ನೀರಿನ ಆಳದಲ್ಲಿ ಮರೆಯಾಗಿದ್ದ ರಹಸ್ಯ ಶಿವಲಿಂಗವೊಂದು ಭಕ್ತರ ಕಣ್ಣಿಗೆ ಗೋಚರಿಸಿದೆ!

ಪುರಾತನ ಕಾಲದಿಂದಲೂ ಜ್ಯೋತಿರ್ಲಿಂಗದ ಪವಿತ್ರ ಅಭಿಷೇಕಕ್ಕೆ ಬಳಸಲಾಗುವ ನೀರನ್ನು ಇದೇ ಅಮೃತ ಕುಂಡದಿಂದಲೇ ತರಲಾಗುತ್ತಿತ್ತು. ಈ ಪರಮ ಪವಿತ್ರ ಜಲರಾಶಿಯ ಗರ್ಭದಲ್ಲಿ ಅಡಗಿದ್ದ ಶಿವಲಿಂಗದ ದರ್ಶನವಾಗುತ್ತಿದ್ದಂತೆ ಇಡೀ ದೇವಸ್ಥಾನದ ಆವರಣದಲ್ಲಿ ಭಕ್ತರು ‘ಹರ ಹರ ಮಹಾದೇವ’, ‘ಬಂ ಬಂ ಭೋಲೆ’ ಎಂದು ಜಯಘೋಷ ಮೊಳಗಿಸಿದ್ದಾರೆ. ಇದು ಕೇವಲ ಒಂದು ಆಕಸ್ಮಿಕ ಆವಿಷ್ಕಾರವಲ್ಲ, ಬದಲಿಗೆ ಸಾಕ್ಷಾತ್ ಪರಶಿವನ ದೈವಿ ಲೀಲೆ ಮತ್ತು ಭಾರತೀಯ ಆಧ್ಯಾತ್ಮಿಕ ಪರಂಪರೆಯ ಜಾಗೃತಿ ಎಂದು ಭಕ್ತರು ಭಾವಪರವಶರಾಗಿದ್ದಾರೆ.

60 ಅಡಿ ಆಳದ ಕುಂಡದಲ್ಲಿ ತೆರೆದುಕೊಂಡ ಇತಿಹಾಸದ ರಹಸ್ಯ!

ಭಾರತೀಯ ಪುರಾತತ್ವ ಸರ್ವೇಕ್ಷಣಾ ಇಲಾಖೆ (ASI) ಹಾಗೂ ದೇವಸ್ಥಾನದ ಆಡಳಿತ ಮಂಡಳಿಯು ಕುಂಭಮೇಳದ ಹಿನ್ನೆಲೆಯಲ್ಲಿ ಸುಮಾರು 60 ಅಡಿ ಆಳವಿರುವ ಈ ಐತಿಹಾಸಿಕ ಅಮೃತ ಕುಂಡದ ನೀರನ್ನು ಸಂಪೂರ್ಣವಾಗಿ ಹೊರಹಾಕಿ, ತಳಭಾಗವನ್ನು ಸ್ವಚ್ಛಗೊಳಿಸುವ ಕಾರ್ಯ ಕೈಗೆತ್ತಿಕೊಂಡಿತ್ತು. ಪೇಷ್ವೆ ಕಾಲದ ಇತಿಹಾಸ ಹೊಂದಿರುವ ಈ ಕುಂಡದ ನೀರು ಸಂಪೂರ್ಣವಾಗಿ ಕಡಿಮೆಯಾಗುತ್ತಿದ್ದಂತೆ, ಅದರ ತಳಭಾಗದಲ್ಲಿ ಭವ್ಯವಾದ ಮತ್ತು ಪ್ರಾಚೀನವಾದ ಶಿವಲಿಂಗವೊಂದು ಗೋಚರಿಸಿತು.

ದಶಕಗಳಿಂದಲೂ ನೀರಿನ ಅಡಿಯಲ್ಲೇ ಗುಪ್ತವಾಗಿದ್ದ ಈ ಶಿವಲಿಂಗವು ಇಷ್ಟು ವರ್ಷಗಳ ನಂತರ ಅತ್ಯಂತ ಸ್ಪಷ್ಟ ರೂಪದಲ್ಲಿ ಗೋಚರಿಸಿರುವುದು ಇಡೀ ದೇಶದ ತೀರ್ಥಯಾತ್ರಿಕರಲ್ಲಿ ಮತ್ತು ಇತಿಹಾಸಕಾರರಲ್ಲಿ ಭಾರಿ ಕುತೂಹಲ ಮೂಡಿಸಿದೆ.

ಅಮೃತ ಕುಂಡದ ಪೌರಾಣಿಕ ಮಹತ್ವ

ಹಿಂದೂ ಧರ್ಮದ ನಂಬಿಕೆಗಳ ಪ್ರಕಾರ, ತ್ರ್ಯಂಬಕೇಶ್ವರ ಕ್ಷೇತ್ರವು ಅತ್ಯಂತ ಪ್ರಮುಖವಾದ ಪುಣ್ಯಕ್ಷೇತ್ರವಾಗಿದೆ. ಇಲ್ಲಿನ ಜ್ಯೋತಿರ್ಲಿಂಗವು ಬ್ರಹ್ಮ, ವಿಷ್ಣು ಮತ್ತು ಮಹೇಶ್ವರ ಎಂಬ ತ್ರಿಮೂರ್ತಿಗಳ ಸ್ವರೂಪವನ್ನು ಒಂದೇ ಲಿಂಗದಲ್ಲಿ ಒಳಗೊಂಡಿರುವ ಏಕೈಕ ವಿಶಿಷ್ಟ ಕ್ಷೇತ್ರವಾಗಿದೆ. ಬ್ರಹ್ಮಗಿರಿ ಪರ್ವತದ ಪಾದದ ಬಳಿ ಇರುವ ಈ ದೇವಸ್ಥಾನದ ಅಮೃತ ಕುಂಡಕ್ಕೆ ವಿಶೇಷವಾದ ಧಾರ್ಮಿಕ ಪ್ರಾಮುಖ್ಯತೆಯಿದೆ. ಈ ಕುಂಡದ ಪವಿತ್ರ ಜಲದಿಂದಲೇ ದಿನನಿತ್ಯ ದೇವರಿಗೆ ಮಹಾ ಅಭಿಷೇಕ ಹಾಗೂ ರುದ್ರಾಭಿಷೇಕಗಳನ್ನು ನೆರವೇರಿಸಲಾಗುತ್ತದೆ. ಈಗ ಅದೇ ಕುಂಡದ ಒಡಲಿನಲ್ಲಿ ಮತ್ತೊಂದು ಶಿವಲಿಂಗ ಪ್ರತ್ಯಕ್ಷವಾಗಿರುವುದು ಮುಂಬರಲಿರುವ ಸಿಂಹಸ್ಥ ಕುಂಭಮೇಳಕ್ಕೆ ಶಿವನೇ ನೀಡಿದ ದೈವಿಕ ಸಂಕೇತ ಎಂದು ಅರ್ಚಕರು ವ್ಯಾಖ್ಯಾನಿಸಿದ್ದಾರೆ.

ಭಕ್ತರಿಗೆ ಅಪರೂಪದ ‘ದೈವಿ ದರ್ಶನ’ ಭಾಗ್ಯ

ಈ ವಿಸ್ಮಯಕಾರಿ ಸುದ್ದಿ ಹರಡುತ್ತಿದ್ದಂತೆ ದೇಶದ ಮೂಲೆ ಮೂಲೆಗಳಿಂದ ಲಕ್ಷಾಂತರ ಭಕ್ತರು ಮತ್ತು ತೀರ್ಥಯಾತ್ರಿಕರು ತ್ರ್ಯಂಬಕೇಶ್ವರದತ್ತ ಮುಖ ಮಾಡುತ್ತಿದ್ದಾರೆ. ದಶಕಗಳ ಕಾಲ ಯಾರಿಗೂ ಕಾಣದಂತೆ ಗುಪ್ತವಾಗಿದ್ದ ಭಗವಾನ್ ಶಿವನ ಈ ರೂಪವನ್ನು ಕಣ್ಣುಂಬಿಕೊಳ್ಳಲು ಭಕ್ತರು ಕಾತರರಾಗಿದ್ದಾರೆ. ಪ್ರಸ್ತುತ ಸುರಕ್ಷತೆಯ ದೃಷ್ಟಿಯಿಂದ ಕುಂಡದ ಬಳಿ ಬಿಗಿ ಭದ್ರತೆ ವಹಿಸಲಾಗಿದ್ದು, ಪುರಾತತ್ವ ಇಲಾಖೆಯ ಅಧಿಕಾರಿಗಳು ಈ ಲಿಂಗದ ಪ್ರಾಚೀನತೆ ಹಾಗೂ ಇತಿಹಾಸದ ಕುರಿತು ಹೆಚ್ಚಿನ ಅಧ್ಯಯನ ನಡೆಸುತ್ತಿದ್ದಾರೆ.

ಭಾರತದ ಶ್ರೀಮಂತ ಸಾಂಸ್ಕೃತಿಕ ಪರಂಪರೆ ಮತ್ತು ಸನಾತನ ಧರ್ಮದ ಅಖಂಡ ಶಕ್ತಿಗೆ ಈ ಅಪರೂಪದ ಪ್ರಕಟಣೆ ಮತ್ತೊಂದು ಉದಾಹರಣೆಯಾಗಿ ನಿಂತಿದೆ. ಮುಂಬರುವ ಕುಂಭಮೇಳದ ಹೊಸ್ತಿಲಿನಲ್ಲಿ ನಡೆದಿರುವ ಈ ಘಟನೆ ಮಹಾರಾಷ್ಟ್ರದ ನಾಸಿಕ್ ಕ್ಷೇತ್ರಕ್ಕೆ ಮತ್ತಷ್ಟು ಆಧ್ಯಾತ್ಮಿಕ ಕಳೆಯನ್ನು ತಂದಿದೆ.

ಇತ್ತೀಚಿನ ಲೇಖನಕ್ಕಾಗಿ ಇಲ್ಲಿ ಕ್ಲಿಕ್ ಮಾಡಿ:

ಜಾಗತಿಕ ಮಾರುಕಟ್ಟೆಗೆ ಟಾಟಾ ‘ಚಿಪ್’ ಶಾಕ್! ಅಸ್ಸಾಂನಿಂದ ದಿನಕ್ಕೆ 4.8 ಕೋಟಿ ಸೆಮಿಕಂಡಕ್ಟರ್ ರಫ್ತು; ₹27,000 ಕೋಟಿಯ ದೈತ್ಯ ಪ್ಲಾಂಟ್ ಆರಂಭ.