TCS ಮತಾಂತರ ಹಗರಣ: 25 ದಿನಗಳ ಕಾಲ ತಲೆಮರೆಸಿಕೊಂಡಿದ್ದ ಮುಖ್ಯ ಆರೋಪಿ ನಿಡಾ ಖಾನ್ ಕೊನೆಗೂ ಬಂಧನ!

ನಾಸಿಕ್ / ಛತ್ರಪತಿ ಸಂಭಾಜಿನಗರ: ದೇಶದ ಪ್ರತಿಷ್ಠಿತ ಐಟಿ ಸಂಸ್ಥೆ ಟಾಟಾ ಕನ್ಸಲ್ಟೆನ್ಸಿ ಸರ್ವಿಸಸ್ (TCS) ನಾಸಿಕ್ ಘಟಕದಲ್ಲಿ ಸಹೋದ್ಯೋಗಿ ಮಹಿಳೆಯರಿಗೆ ಲೈಂಗಿಕ ಕಿರುಕುಳ ಹಾಗೂ ಬಲವಂತದ ಇಸ್ಲಾಂ ಮತಾಂತರಕ್ಕೆ ಯತ್ನಿಸಿದ ಆರೋಪ ಎದುರಿಸುತ್ತಿರುವ ಅಮಾನತುಗೊಂಡ ಉದ್ಯೋಗಿ ನಿಡಾ ಇಜಾಜ್ ಖಾನ್ (Nida Khan) ಎಂಬಾಕೆಯನ್ನು ಪೊಲೀಸರು ಬಂಧಿಸಿದ್ದಾರೆ.

ಪ್ರಕರಣ ಬೆಳಕಿಗೆ ಬಂದಾಗಿನಿಂದ ಸುಮಾರು 25 ದಿನಗಳ ಕಾಲ ಮಹಾರಾಷ್ಟ್ರಾದ್ಯಂತ ಪೊಲೀಸರಿಗೆ ಚುಕ್ಕೆ ತೋರಿಸಿ ತಲೆಮರೆಸಿಕೊಂಡಿದ್ದ ಈಕೆಯನ್ನು ವಿಶೇಷ ತನಿಖಾ ದಳ (SIT) ಛತ್ರಪತಿ ಸಂಭಾಜಿನಗರದ (ಔರಂಗಾಬಾದ್) ನರೇಗಾಂವ್ ಪ್ರದೇಶದ ಬಾಡಿಗೆ ಫ್ಲಾಟ್ ಒಂದರಲ್ಲಿ ಪತ್ತೆಹಚ್ಚಿ ಹೆಡೆಮುರಿ ಕಟ್ಟಿದೆ. ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ನಾಸಿಕ್ ಪೊಲೀಸರು ಈಗಾಗಲೇ ಕೋರ್ಟ್‌ಗೆ 1500 ಪುಟಗಳ ಬೃಹತ್ ಚಾರ್ಜ್‌ಶೀಟ್ ಸಲ್ಲಿಕೆ ಮಾಡಿದ್ದಾರೆ.

ಏನಿದು ಟಿಸಿಎಸ್ ಮತಾಂತರ ಮತ್ತು ಕಿರುಕುಳ ಹಗರಣ?

ನಾಸಿಕ್‌ನ ಟಿಸಿಎಸ್ ಬಿಪಿಒ (TCS BPO) ಕಚೇರಿಯಲ್ಲಿ ಕೆಲಸ ಮಾಡುತ್ತಿದ್ದ ಪರಿಶಿಷ್ಟ ಜಾತಿಗೆ (SC) ಸೇರಿದ ಅವಿವಾಹಿತ ಮಹಿಳಾ ಉದ್ಯೋಗಿಯೊಬ್ಬರು ನೀಡಿದ ದೂರಿನ ಆಧಾರದ ಮೇಲೆ ಮಾರ್ಚ್ 26 ರಂದು ಮೊದಲ ಎಫ್‌ಐಆರ್ ದಾಖಲಾಗಿತ್ತು. ಕಚೇರಿಯ ವಾತಾವರಣ ಎಷ್ಟು ವಿಷಪೂರಿತವಾಗಿತ್ತೆಂದರೆ, ದೂರುದಾರೆ ಮಹಿಳೆ ಮಾರ್ಚ್‌ನಲ್ಲಿ ಕೆಲಸಕ್ಕೆ ರಾಜೀನಾಮೆ ನೀಡಬೇಕಾಗಿ ಬಂದಿತ್ತು. ಇದರ ಬೆನ್ನಲ್ಲೇ ತನಿಖೆ ನಡೆಸಿದ ಪೊಲೀಸರು ಸರಣಿ ಒಂಬತ್ತು ಎಫ್‌ಐಆರ್‌ಗಳನ್ನು ದಾಖಲಿಸಿಕೊಂಡು ಎಸ್‌ಐಟಿ ರಚಿಸಿದ್ದರು.

ಕಚೇರಿಯಲ್ಲಿದ್ದ ಕೆಲವು ಮುಸ್ಲಿಂ ಸಹೋದ್ಯೋಗಿಗಳು ತಮಗೆ ನಿರಂತರವಾಗಿ ಲೈಂಗಿಕ ಕಿರುಕುಳ ನೀಡುತ್ತಿದ್ದರು, ಕಚೇರಿಯಲ್ಲೇ ನಮಾಜ್ ಮಾಡಲು ಮತ್ತು ಇಸ್ಲಾಮಿಕ್ ಪದ್ಧತಿಗಳನ್ನು ಪಾಲಿಸಲು ಬಲವಂತ ಮಾಡುತ್ತಿದ್ದರು ಎಂದು ದೂರಿನಲ್ಲಿ ತಿಳಿಸಲಾಗಿದೆ.

ಪ್ರಕರಣದಲ್ಲಿ ನಿಡಾ ಖಾನ್ ಪಾತ್ರ ಮತ್ತು ಎಸ್‌ಐಟಿ ತನಿಖೆಯ ಪ್ರಮುಖ ಹಂತಗಳು:

ಬಂಧಿತ ಆರೋಪಿಗಳಲ್ಲಿ ನಿಡಾ ಖಾನ್ ಏಕೈಕ ಮಹಿಳೆಯಾಗಿದ್ದು, ಈ ಇಡೀ ಮತಾಂತರ ಜಾಲದಲ್ಲಿ ಈಕೆ ಅತ್ಯಂತ ಪ್ರಮುಖ ಸೂತ್ರಧಾರಿಯಾಗಿದ್ದಳು ಎನ್ನಲಾಗಿದೆ.

1.ಬ್ರೈನ್ ವಾಶಿಂಗ್ ಮತ್ತು ಮತಾಂತರ ಯತ್ನ:ಹಂತ 1.

ಸಹೋದ್ಯೋಗಿ ಮಹಿಳೆಯನ್ನು ಇಸ್ಲಾಂಗೆ ಮತಾಂತರ ಮಾಡಲು ನಿಡಾ ಖಾನ್ ವ್ಯವಸ್ಥಿತವಾಗಿ ಬ್ರೈನ್ ವಾಶ್ ಮಾಡುತ್ತಿದ್ದಳು. ಸಂತ್ರಸ್ತೆಗೆ ಬುರ್ಖಾ, ಧಾರ್ಮಿಕ ಪುಸ್ತಕಗಳನ್ನು ನೀಡಿ, ಆಕೆಯ ಮೊಬೈಲ್‌ನಲ್ಲಿ ಇಸ್ಲಾಮಿಕ್ ಆ್ಯಪ್‌ಗಳನ್ನು ಡೌನ್‌ಲೋಡ್ ಮಾಡಿಸಿದ್ದಳು. ಅಲ್ಲದೆ ಸಂತ್ರಸ್ತೆಯ ಹೆಸರನ್ನು ‘ಹಾನಿಯಾ’ (Hania) ಎಂದು ಬದಲಾಯಿಸಲು ದಾಖಲೆಗಳನ್ನು ಸಿದ್ಧಪಡಿಸಲಾಗಿತ್ತು ಎಂಬುದು ವಾಟ್ಸಾಪ್ ಚಾಟ್‌ಗಳಿಂದ ಪತ್ತೆಯಾಗಿದೆ.

2.ಮುನ್ಸೂಚನೆ ಸಿಗುತ್ತಿದ್ದಂತೆ ಪಲಾಯನ ಮತ್ತು ಆಶ್ರಯ:ಹಂತ 2.

ಮತಾಂತರದ ಆರೋಪದ ಮೇಲೆ ಎಫ್‌ಐಆರ್ ದಾಖಲಾಗುತ್ತಿದ್ದಂತೆ ನಿಡಾ ಖಾನ್ ತಲೆಮರೆಸಿಕೊಂಡಿದ್ದಳು. ಈಕೆಗೆ ಛತ್ರಪತಿ ಸಂಭಾಜಿನಗರದಲ್ಲಿ AIMIM ಪಕ್ಷದ ಕಾರ್ಪೊರೇಟರ್ ಮತೀನ್ ಪಟೇಲ್ ಎಂಬಾತ ರಹಸ್ಯವಾಗಿ ಆಶ್ರಯ ನೀಡಿದ್ದನು. (ಇತ್ತೀಚೆಗೆ ಮಹಾನಗರ ಪಾಲಿಕೆಯು ಮತೀನ್ ಪಟೇಲ್ ಮನೆ ಹಾಗೂ ನಿಡಾ ತಂಗಿದ್ದ ಅಕ್ರಮ ಕಟ್ಟಡವನ್ನು ಬುಲ್ಡೋಜರ್ ಮೂಲಕ ಧ್ವಂಸಗೊಳಿಸಿದೆ).

3.ಬಂಧನ ಮತ್ತು ನ್ಯಾಯಾಂಗ ಬಂಧನ:ಹಂತ 3.

ಮುಂಜಾಗ್ರತಾ ಜಾಮೀನು ಅರ್ಜಿ ವಜಾಗೊಂಡ ಬೆನ್ನಲ್ಲೇ ಮೇ 7 ರಂದು ನಿಡಾ ಖಾನ್‌ಳನ್ನು ಬಂಧಿಸಲಾಯಿತು. ನ್ಯಾಯಾಲಯವು ಆಕೆಗೆ ಮೇ 24 ರವರೆಗೆ ನ್ಯಾಯಾಂಗ ಬಂಧನ ವಿಧಿಸಿದ್ದು, ಸದ್ಯ ಆಕೆ ನಾಸಿಕ್ ರೋಡ್ ಸೆಂಟ್ರಲ್ ಜೈಲಿನಲ್ಲಿದ್ದಾಳೆ.

ಪೋಷ್ (POSH) ಸಮಿತಿ ಸದಸ್ಯೆಯೂ ಅರೆಸ್ಟ್!

ಈ ಪ್ರಕರಣದಲ್ಲಿ ಕೇವಲ ಮತಾಂತರ ಮಾಡಿದವರಷ್ಟೇ ಅಲ್ಲದೆ, ಕಿರುಕುಳದ ಬಗ್ಗೆ ಮೌಖಿಕವಾಗಿ ದೂರು ನೀಡಿದರೂ ಯಾವುದೇ ಕ್ರಮ ಕೈಗೊಳ್ಳದ ಟಿಸಿಎಸ್ ಸಂಸ್ಥೆಯ ನಾಸಿಕ್ ಸೈಟ್ ಹೆಡ್ ಹಾಗೂ ಮಹಿಳಾ ದೌರ್ಜನ್ಯ ತಡೆ ಸಮಿತಿ (POSH Committee) ಸದಸ್ಯೆಯಾಗಿದ್ದ ಅಶ್ವಿನಿ ಚೇನಾನಿ ಎಂಬಾಕೆಯನ್ನು ಪೊಲೀಸರು ಬಂಧಿಸಿದ್ದಾರೆ. ಕಚೇರಿಯ ವಿಷಪೂರಿತ ವಾತಾವರಣಕ್ಕೆ ಈಕೆಯೂ ಸಾಥ್ ನೀಡಿದ್ದಾಳೆ ಎಂದು ನ್ಯಾಯಾಲಯ ಈಕೆಗೆ ಜಾಮೀನು ನಿರಾಕರಿಸಿದೆ. ದಾನಿಶ್ ಶೇಖ್, ತೌಸಿಫ್ ಅತ್ತಾರ್ ಸೇರಿದಂತೆ ಒಟ್ಟು ಎಂಟು ಮಂದಿ ಆರೋಪಿಗಳು ಸದ್ಯ ಜೈಲು ಪಾಲಾಗಿದ್ದಾರೆ.

ಅಟ್ರಾಸಿಟಿ ಕಾಯ್ದೆಯಡಿ ಕೇಸ್: ಸಂತ್ರಸ್ತೆ ಪರಿಶಿಷ್ಟ ಜಾತಿಗೆ ಸೇರಿರುವುದರಿಂದ, ಆರೋಪಿಗಳ ವಿರುದ್ಧ ಭಾರತೀಯ ನ್ಯಾಯ ಸಂಹಿತೆ (BNS) ಅಡಿಯಲ್ಲಿ ಲೈಂಗಿಕ ದೌರ್ಜನ್ಯ, ಮಾನಹಾನಿ ಪ್ರಕರಣಗಳ ಜೊತೆಗೆ ಎಸ್‌ಸಿ/ಎಸ್‌ಟಿ (ದೌರ್ಜನ್ಯ ತಡೆ) ಕಾಯ್ದೆಯಡಿಯೂ ಕಠಿಣ ಮೊಕದ್ದಮೆ ಹೂಡಲಾಗಿದೆ. ಜೈಲಿನಲ್ಲಿರುವ ನಿಡಾ ಖಾನ್ ಪ್ರಸ್ತುತ ಗರ್ಭಿಣಿಯಾಗಿದ್ದು, ಆಕೆಯ ಜಾಮೀನು ಅರ್ಜಿಯ ವಿಚಾರಣೆ ಬಾಕಿ ಇದೆ.