ಫಿಫಾ ವಿಶ್ವಕಪ್‌ನಲ್ಲಿ ಇತಿಹಾಸ ಬರೆದ ಭಾರತೀಯ ಮೂಲದ ಸರ್ಪ್ರೀತ್ ಸಿಂಗ್: ಜಾಗತಿಕ ಫುಟ್‌ಬಾಲ್ ರಂಗದಲ್ಲಿ ಹೊಸ ಕ್ರಾಂತಿ!

ಫಿಫಾ ವಿಶ್ವಕಪ್ 2026ರ ಗ್ರೂಪ್ ‘ಜಿ’ ಹಂತದ ಮೊದಲ ಪಂದ್ಯದಲ್ಲಿ ಇರಾನ್ ವಿರುದ್ಧ ನ್ಯೂಜಿಲೆಂಡ್ ತಂಡವು ಮೈದಾನಕ್ಕಿಳಿದಾಗ, ಜಾಗತಿಕ ಫುಟ್‌ಬಾಲ್ ಇತಿಹಾಸದಲ್ಲಿ ಒಂದು ಹೊಸ ದಾಖಲೆ ಸದ್ದಿಲ್ಲದೆ ನಿರ್ಮಾಣವಾಯಿತು. ಇಡೀ ವಿಶ್ವದ ಕಣ್ಣು ನ್ಯೂಜಿಲೆಂಡ್ ತಂಡದ (‘ಆಲ್ ವೈಟ್ಸ್’) ಮೇಲಿದ್ದಾಗ, ಭಾರತ ಮತ್ತು ಜಾಗತಿಕ ಭಾರತೀಯ ಫುಟ್‌ಬಾಲ್ ಅಭಿಮಾನಿಗಳನ್ನು ಆಕರ್ಷಿಸಿದ ಪ್ರಮುಖ ಹೆಸರು ಸರ್ಪ್ರೀತ್ ಸಿಂಗ್.

ಭಾರತೀಯ ಮೂಲದ ಈ ಪ್ರತಿಭಾವಂತ ಮಿಡ್‌ಫೀಲ್ಡರ್, ಇರಾನ್ ವಿರುದ್ಧದ ರೋಮಾಂಚಕ ಪಂದ್ಯದಲ್ಲಿ ನ್ಯೂಜಿಲೆಂಡ್ ತಂಡದ ಆರಂಭಿಕ ಹನ್ನೊಂದರ ಬಳಗದಲ್ಲಿ (Starting XI) ಸ್ಥಾನ ಪಡೆದು ಇತಿಹಾಸ ಸೃಷ್ಟಿಸಿದರು. ಪಂದ್ಯದಲ್ಲಿ ಅಮೋಘ ಪ್ರದರ್ಶನ ನೀಡಿದ ಅವರು, ಬರೋಬ್ಬರಿ 90 ನಿಮಿಷಗಳ ಕಾಲ ಮೈದಾನದಲ್ಲಿ ಹೋರಾಡಿ ನಂತರ ಬದಲೀ ಆಟಗಾರನಿಗೆ ಜಾಗ ಮಾಡಿಕೊಟ್ಟರು. ಈ ರೋಚಕ ಪಂದ್ಯವು 2-2 ಗೋಲುಗಳ ಸಮಬಲದಲ್ಲಿ ಅಂತ್ಯಗೊಂಡಿತು.

ಪ್ರತಿಷ್ಠಿತ 10ನೇ ನಂಬರ್ ಜರ್ಸಿ ಧರಿಸಿ ಮೈದಾನಕ್ಕಿಳಿದ ಸರ್ಪ್ರೀತ್

ಫುಟ್‌ಬಾಲ್ ಲೋಕದಲ್ಲಿ 10ನೇ ನಂಬರ್ ಜರ್ಸಿಗೆ ಅತ್ಯಂತ ಗೌರವಯುತ ಸ್ಥಾನವಿದೆ. ಪೀಲೆ, ಮೆಸ್ಸಿ ಹಾಗೂ ಮರಡೋನಾರಂತಹ ದಿಗ್ಗಜರು ಧರಿಸುತ್ತಿದ್ದ ಈ ಜರ್ಸಿ ನಂಬರ್ 10 ಅನ್ನು ಧರಿಸಿ ಸರ್ಪ್ರೀತ್ ಸಿಂಗ್ ನ್ಯೂಜಿಲೆಂಡ್ ತಂಡದ ಪರ ಮೈದಾನಕ್ಕಿಳಿದಿದ್ದು ಜಾಗತಿಕ ಮಟ್ಟದಲ್ಲಿ ಭಾರೀ ಗಮನ ಸೆಳೆದಿದೆ. ನ್ಯೂಜಿಲೆಂಡ್ ತಂಡದ ಪ್ರಮುಖ ಆಟಗಾರನಾಗಿ ಹೊರಹೊಮ್ಮಿರುವ ಅವರು, ಇರಾನ್ ವಿರುದ್ಧದ ಪಂದ್ಯದಲ್ಲಿ 4-2-3-1 ಮಾದರಿಯ ಫಾರ್ಮೇಷನ್‌ನಲ್ಲಿ ಮೈದಾನದ ಮಧ್ಯಭಾಗದಲ್ಲಿ ಅತ್ಯಂತ ಚುರುಕಾಗಿ ಕಾರ್ಯನಿರ್ವಹಿಸಿದರು.

ಪಂದ್ಯದಾದ್ಯಂತ ಕಮಾಲ್ ಮಾಡಿದ ಸರ್ಪ್ರೀತ್, ಇರಾನ್ ಗೋಲುಪೆಟ್ಟಿಗೆಯತ್ತ ಭರ್ಜರಿ 3 ಶಾಟ್‌ಗಳನ್ನು ಬಾರಿಸಿ ತೀವ್ರ ಒತ್ತಡ ಹೇರಿದರು. ವಿಶೇಷವಾಗಿ ಪಂದ್ಯದ 61ನೇ ನಿಮಿಷದಲ್ಲಿ ಅವರು ಹೊಡೆದ ಮತ್ತೊಂದು ಆಕರ್ಷಕ ಶಾಟ್ ಇರಾನ್ ಗೋಲ್‌ಕೀಪರ್ ಕೈ ಸೇರಿತು.

Photograph: (AFP)

ಭಾರತೀಯ ಮೂಲದ ಆಟಗಾರನ ಐತಿಹಾಸಿಕ ಸಾಧನೆ

ಈ ಪಂದ್ಯದಲ್ಲಿ ಸರ್ಪ್ರೀತ್ ಸಿಂಗ್ ಅವರು ಯಾವುದೇ ಗೋಲು ಗಳಿಸದಿದ್ದರೂ, ಜಗತ್ತಿನ ಅತ್ಯಂತ ದೊಡ್ಡ ಫುಟ್‌ಬಾಲ್ ವೇದಿಕೆಯಾದ ಫಿಫಾ ವಿಶ್ವಕಪ್‌ನಲ್ಲಿ ಆರಂಭಿಕ ಆಟಗಾರನಾಗಿ ಕಣಕ್ಕಿಳಿದ ಮೊದಲ ಭಾರತೀಯ ಮೂಲದ ಫುಟ್‌ಬಾಲ್ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು. ಇದು ಜಾಗತಿಕ ಮಟ್ಟದಲ್ಲಿ ಭಾರತೀಯ ಮೂಲದ ಕ್ರೀಡಾಪಟುಗಳ ಸಾಮರ್ಥ್ಯಕ್ಕೆ ಸಂದ ದೊಡ್ಡ ಗೌರವವಾಗಿದೆ.

ಅಮೆರಿಕ, ಕೆನಡಾ ಮತ್ತು ಮೆಕ್ಸಿಕೋ ಜಂಟಿಯಾಗಿ ಆಯೋಜಿಸುತ್ತಿರುವ ಈ ಫಿಫಾ ವಿಶ್ವಕಪ್ 2026 ಸರಣಿಯು ಹಲವು ವಿಶೇಷತೆಗಳಿಗೆ ಸಾಕ್ಷಿಯಾಗುತ್ತಿದ್ದು, ಸರ್ಪ್ರೀತ್ ಸಿಂಗ್ ಅವರ ಈ ಐತಿಹಾಸಿಕ ಹೆಜ್ಜೆ ಭಾರತೀಯ ಫುಟ್‌ಬಾಲ್ ಸಮುದಾಯಕ್ಕೆ ಮತ್ತು ಯುವ ಆಟಗಾರರಿಗೆ ದೊಡ್ಡ ಪ್ರೇರಣೆಯಾಗಿದೆ. ಆಕ್ಲೆಂಡ್‌ನಲ್ಲಿ ಪಂಜಾಬಿ ಮೂಲದ ಪೋಷಕರಿಗೆ ಜನಿಸಿದ ಈ 27 ವರ್ಷದ ಆಕ್ರಮಣಕಾರಿ ಮಿಡ್‌ಫೀಲ್ಡರ್ ಈ ಹಿಂದೆ ಜರ್ಮನಿಯ ಪ್ರತಿಷ್ಠಿತ ಕ್ಲಬ್ ‘ಬಯರ್ನ್ ಮ್ಯೂನಿಚ್’ ಪರ ಆಡಿದ ಅನುಭವವನ್ನೂ ಹೊಂದಿದ್ದಾರೆ.

ಇತ್ತೀಚಿನ ಲೇಖನಕ್ಕಾಗಿ ಇಲ್ಲಿ ಕ್ಲಿಕ್ ಮಾಡಿ:

ದೇಶದ ಸಮಗ್ರತೆಗೆ ಧಕ್ಕೆ ತರಬೇಡಿ: ‘ಕಾಕ್ರಾಚ್ ಜನತಾ ಪಾರ್ಟಿ’ ವಿರುದ್ಧ ಗುಡುಗಿದ ಆಂಧ್ರ ಡಿಸಿಎಂ ಪವನ್ ಕಲ್ಯಾಣ್!