UNESCO ವಿಶ್ವ ಪರಂಪರೆಯ ಪಟ್ಟಿಗೆ ಉತ್ತರ ಪ್ರದೇಶದ ಐತಿಹಾಸಿಕ ಸಾರನಾಥ ಸೇರ್ಪಡೆ! ಭಾರತದ 45ನೇ ವಿಶ್ವ ಪರಂಪರೆಯ ತಾಣ.
ವರದಿಗಾರರು (Reporter)
Hemanth Rajashekar07:18 AM IST
ಭಾರತದ ಸುದೀರ್ಘ ನಾಗರಿಕತೆ ಮತ್ತು ಆಧ್ಯಾತ್ಮಿಕ ಪರಂಪರೆಗೆ ಜಾಗತಿಕ ಮಟ್ಟದಲ್ಲಿ ಮತ್ತೊಂದು ಅತ್ಯುನ್ನತ ಗೌರವ ಲಭಿಸಿದೆ. ಉತ್ತರ ಪ್ರದೇಶದ ವಾರಾಣಸಿ ಸಮೀಪವಿರುವ ಪವಿತ್ರ ಬೌದ್ಧ ಕ್ಷೇತ್ರ ಸಾರನಾಥವನ್ನು ಯುನೈಟೆಡ್ ನೇಷನ್ಸ್ ಎಜುಕೇಷನಲ್, ಸೈಂಟಿಫಿಕ್ ಅಂಡ್ ಕಲ್ಚರಲ್ ಆರ್ಗನೈಸೇಶನ್ (UNESCO) ಅಧಿಕೃತವಾಗಿ ತನ್ನ ‘ವಿಶ್ವ ಪರಂಪರೆಯ ಪಟ್ಟಿ’ಗೆ ಸೇರ್ಪಡೆಗೊಳಿಸಿದೆ.
ದಕ್ಷಿಣ ಕೊರಿಯಾದ ಬುಸಾನ್ನಲ್ಲಿ ನಡೆಯುತ್ತಿರುವ ಯುನೆಸ್ಕೋ ವಿಶ್ವ ಪರಂಪರೆ ಸಮಿತಿಯ 48ನೇ ಅಧಿವೇಶನದಲ್ಲಿ ಈ ಐತಿಹಾಸಿಕ ತೀರ್ಮಾನವನ್ನು ಪ್ರಕಟಿಸಲಾಗಿದೆ. ಈ ಮೂಲಕ ಸಾರನಾಥವು ಭಾರತದ 45ನೇ ವಿಶ್ವ ಪರಂಪರೆಯ ತಾಣವಾಗಿ ಹೊರಹೊಮ್ಮಿದ್ದು, ದೇಶದ ಸಾಂಸ್ಕೃತಿಕ ಹಿರಿಮೆಯನ್ನು ಜಗತ್ತಿನೆಲ್ಲಡೆ ಮತ್ತಷ್ಟು ಎತ್ತಿಹಿಡಿದಿದೆ.
ಸಾರನಾಥದ ಪ್ರಮುಖ ವಾಸ್ತುಶಿಲ್ಪ ಮತ್ತು ಪುರಾತತ್ವ ಅಂಗಗಳು
ಸಾರನಾಥದ ಜಾಗತಿಕ ಪ್ರಾಮುಖ್ಯತೆಯನ್ನು ಪರಿಗಣಿಸಿ ಯುನೆಸ್ಕೋ ಈ ವಿಶ್ವ ಪರಂಪರೆ ಮಾನ್ಯತೆಯನ್ನು ನೀಡಿದೆ. ಈ ಪಟ್ಟಿಯಲ್ಲಿ ಸಾರನಾಥದ ಪ್ರಮುಖ ಪುರಾತತ್ವ ತಾಣಗಳು ಹಾಗೂ ಸ್ಮಾರಕಗಳು ಸೇರಿವೆ:
- ಚೌಖಂಡಿ ಸ್ತೂಪ (Chaukhandi Stupa): ಬುದ್ಧ ಮತ್ತು ಆತನ ಮೊದಲ ಶಿಷ್ಯರು ಭೇಟಿಯಾದ ಪವಿತ್ರ ಸ್ಥಳವನ್ನು ನೆನಪಿಸುವ ಐತಿಹಾಸಿಕ ಸ್ತೂಪ.
- ಸಾರನಾಥದ ಪುರಾತತ್ವ ಅವಶೇಷಗಳು (Archaeological Remains of Sarnath):
- ಧಮೇಖ್ ಸ್ತೂಪ (Dhamekh Stupa): ಭಗವಾನ್ ಬುದ್ಧ ತನ್ನ ಮೊದಲ ಉಪದೇಶ ನೀಡಿದ ಸ್ಥಳದಲ್ಲಿ ನಿರ್ಮಿಸಲಾದ ಬೃಹತ್ ಸ್ತೂಪ.
- ಧರ್ಮರಾಜಿಕ ಸ್ತೂಪ (Dharmrajika Stupa): ಮೌರ್ಯ ಸಾಮ್ರಾಜ್ಯದ ಅವಧಿಯ ಅತ್ಯಂತ ಪ್ರಾಚೀನ ಬೌದ್ಧ ಸ್ಮಾರಕಗಳಲ್ಲೊಂದು.
- ಅಶೋಕ ಸ್ತಂಭ (Ashokan Pillar): ಭಾರತದ ರಾಷ್ಟ್ರೀಯ ಲಾಂಛನಕ್ಕೆ ಪ್ರೇರಣೆಯಾದ ಸಿಂಹದ ರಾಜಮುಡಿ ಹೊಂದಿದ್ದ ಅಶೋಕ ಚಕ್ರವರ್ತಿಯ ಐತಿಹಾಸಿಕ ಸ್ತಂಭ.
ಆಧ್ಯಾತ್ಮಿಕ ಮಹತ್ವ: ‘ಧರ್ಮಚಕ್ರ ಪ್ರವರ್ತನ’ದ ಪವಿತ್ರ ಭೂಮಿ
ಬೌದ್ಧ ಧರ್ಮದ ಇತಿಹಾಸದಲ್ಲಿ ಸಾರನಾಥಕ್ಕೆ ಅತ್ಯಂತ ಉನ್ನತ ಸ್ಥಾನವಿದೆ. ಜ್ಞಾನೋದಯ ಪಡೆದ ನಂತರ ಗೌತಮ ಬುದ್ಧನು ತನ್ನ ಮೊದಲ ಐದು ಜನ ಶಿಷ್ಯರಿಗೆ ಪ್ರಥಮ ಬೋಧನೆ (ಬೋಧಿಸತ್ವ) ನೀಡಿದ್ದು ಇದೇ ಸಾರನಾಥದ ಮೃಗದಾವ (ಜಿಂಕೆ ವನ) ದಲ್ಲಿ.
ಈ ಪ್ರಥಮ ಬೋಧನೆಯ ಘಟನೆಯನ್ನು ಬೌದ್ಧ ಪರಂಪರೆಯಲ್ಲಿ ‘ಧರ್ಮಚಕ್ರ ಪ್ರವರ್ತನ’ (ಧರ್ಮದ ಚಕ್ರವನ್ನು ತಿರುಗಿಸುವುದು) ಎಂದು ಕರೆಯಲಾಗುತ್ತದೆ. ಪ್ರಪಂಚದಾದ್ಯಂತ ಇರುವ ಕೋಟ್ಯಂತರ ಬೌದ್ಧ ಅನುಯಾಯಿಗಳಿಗೆ ಹಾಗೂ ಆಧ್ಯಾತ್ಮಿಕ ಶೋಧಕರಿಗೆ ಸಾರನಾಥವು ಶಾಂತಿ, ಜ್ಞಾನ ಮತ್ತು ಅಹಿಂಸೆಯ ಮೂಲ ಕೇಂದ್ರವಾಗಿದೆ.
ಪ್ರಧಾನಿ ನರೇಂದ್ರ ಮೋದಿ ಹರ್ಷ: ಜಾಗತಿಕ ಪ್ರವಾಸಿಗರಿಗೆ ಆಹ್ವಾನ
ಸಾರನಾಥಕ್ಕೆ ಯುನೆಸ್ಕೋ ವಿಶ್ವ ಪರಂಪರೆ ಮಾನ್ಯತೆ ದೊರೆತಿರುವುದನ್ನು ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರು ಮುಕ್ತಕಂಠದಿಂದ ಸ್ವಾಗತಿಸಿದ್ದಾರೆ.
“ಪ್ರತಿಯೊಬ್ಬ ಭಾರತೀಯನಿಗೂ ಇದು ಹೆಮ್ಮೆಯ ಕ್ಷಣ! ಉತ್ತರ ಪ್ರದೇಶದ ಸಾರನಾಥವು ಯುನೆಸ್ಕೋ ವಿಶ್ವ ಪರಂಪರೆಯ ಪಟ್ಟಿಗೆ ಸೇರ್ಪಡೆಯಾಗಿರುವುದು ಅಪಾರ ಸಂತಸ ತಂದಿದೆ. ಭಗವಾನ್ ಬುದ್ಧನೊಂದಿಗೆ ಸಾರನಾಥವು ಆಳವಾದ ನಂಟನ್ನು ಹೊಂದಿದೆ. ಬುದ್ಧನ ಜ್ಞಾನ, ಕರುಣೆ ಮತ್ತು ಸೌಹಾರ್ದತೆಯ ಕಾಲಾತೀತ ಸಂದೇಶಗಳು ಇಡೀ ಜಗತ್ತಿಗೆ ನಿರಂತರ ಪ್ರೇರಣೆಯಾಗಿವೆ. ಈ ಜಾಗತಿಕ ಮಾನ್ಯತೆಯು ಭಾರತದ ಭವ್ಯ ಸಾಂಸ್ಕೃತಿಕ ಮತ್ತು ಆಧ್ಯಾತ್ಮಿಕ ಪರಂಪರೆಯನ್ನು ಎತ್ತಿಹಿಡಿಯುತ್ತದೆ. ಮುಂಬರುವ ದಿನಗಳಲ್ಲಿ ಪ್ರಪಂಚದ ನಾನಾ ಭಾಗಗಳಿಂದ ಹೆಚ್ಛಿನ ಪ್ರವಾಸಿಗರು ಸಾರನಾಥಕ್ಕೆ ಭೇಟಿ ನೀಡಿ ಬುದ್ಧನ ತತ್ವಗಳಿಗೆ ಹತ್ತಿರವಾಗಲು ಇದು ಪ್ರೇರೇಪಿಸಲಿದೆ.” — ನರೇಂದ್ರ ಮೋದಿ, ಪ್ರಧಾನಮಂತ್ರಿ
ಯುನೆಸ್ಕೋ ನೀಡಿದ ಈ ಅಂತಾರಾಷ್ಟ್ರೀಯ ಗೌರವದಿಂದಾಗಿ ಉತ್ತರ ಪ್ರದೇಶದ ಬೌದ್ಧ ಪ್ರವಾಸೋದ್ಯಮ ಸರ್ಕಿಟ್ಗೆ ಮತ್ತಷ್ಟು ಜಾಗತಿಕ ಮಾನ್ಯತೆ ದೊರೆತಂತಾಗಿದೆ. ಸಾರನಾಥದ ಪ್ರಾಚೀನ ಸೌಂದರ್ಯ ಮತ್ತು ಐತಿಹಾಸಿಕ ಮೌಲ್ಯವನ್ನು ಸಂರಕ್ಷಿಸಿ ಮುಂದಿನ ಪೀಳಿಗೆಗೆ ತಲುಪಿಸಲು ಈ ಮಾನ್ಯತೆ ಹೊಸ ದಾರಿದೀಪವಾಗಲಿದೆ.
ಇತ್ತೀಚಿನ ಲೇಖನಕ್ಕಾಗಿ ಇಲ್ಲಿ ಕ್ಲಿಕ್ ಮಾಡಿ: