ಗಾಂಧಿ ಜಯಂತಿಯಂದು UPIಗೆ ‘ನೋ’: ಹೊಸ MDR ಶುಲ್ಕ ವಿರೋಧಿಸಿ ವ್ಯಾಪಾರಿಗಳ ಪ್ರತಿಭಟನೆ.

ನವದೆಹಲಿ: ಅಕ್ಟೋಬರ್ 15ರಿಂದ ಜಾರಿಗೆ ಬರಲಿರುವ ಹೊಸ ಮರ್ಚೆಂಟ್ ಡಿಸ್ಕೌಂಟ್ ರೇಟ್ (MDR) ಶುಲ್ಕವನ್ನು ವಿರೋಧಿಸಿ, ಹೆಚ್ಚಿನ ಮೊತ್ತದ ಯುಪಿಐ ಪಾವತಿಗಳ ಮೇಲೆ ಪ್ರಸ್ತಾಪಿತ ಶೇ.0.4ರ ಎಂಡಿಆರ್ ವಿರುದ್ಧ ದೇಶಾದ್ಯಂತ ವ್ಯಾಪಾರಿಗಳು ಅಕ್ಟೋಬರ್ 2ನ್ನು ‘ನೋ ಯುಪಿಐ ಡೇ’ ಎಂದು ಆಚರಿಸುವಂತೆ ಕರೆ ನೀಡಲಾಗಿದೆ. ರಾಷ್ಟ್ರಪಿತ ಮಹಾತ್ಮ ಗಾಂಧಿಯವರ ಜನ್ಮ ದಿನಾಚರಣೆಯ ದಿನವನ್ನೇ ಪ್ರತಿಭಟನೆಗೆ ಆಯ್ಕೆ ಮಾಡಿಕೊಂಡಿರುವುದು ಗಮನಾರ್ಹ.

ಅಕ್ಟೋಬರ್ 15ರಿಂದ ಜಾರಿಗೆ ಬರುವ 2,000 ರೂ.ಗಿಂತ ಹೆಚ್ಚಿನ ಯುಪಿಐ ವರ್ತಕ ಪಾವತಿಗಳ ಮೇಲಿನ ಶೇ.0.4ರ ಎಂಡಿಆರ್ ವಿರುದ್ಧ ಪ್ರತಿಭಟಿಸಲು ವ್ಯಾಪಾರಿ ಸಂಘಟನೆಗಳು ಈ ನಿರ್ಧಾರ ಕೈಗೊಂಡಿವೆ. ಪ್ರತಿಭಟನೆಯ ಭಾಗವಾಗಿ, ಯುಪಿಐ ಸ್ಕ್ಯಾನರ್, ಕ್ಯೂಆರ್ ಕೋಡ್, ಸೌಂಡ್ ಬಾಕ್ಸ್ ಸೇರಿದಂತೆ ಪಾವತಿ ಸಾಧನಗಳನ್ನು ಕಪ್ಪು ಬಟ್ಟೆಯಿಂದ ಮುಚ್ಚಲಾಗುತ್ತದೆ.

ಪ್ರತಿಭಟನೆಗೆ ಕಾರಣವೇನು?

ಎಂಡಿಆರ್ ಎಂಬುದು ಡಿಜಿಟಲ್ ಪಾವತಿ ಸ್ವೀಕರಿಸಲು ವರ್ತಕರು ಪಾವತಿಸಬೇಕಾದ ಶುಲ್ಕವಾಗಿದ್ದು, ಇಲ್ಲಿಯವರೆಗೆ ಇದು ಶೂನ್ಯವಾಗಿತ್ತು. ಆದರೆ ಹೊಸ ನಿಯಮದ ಪ್ರಕಾರ, 75,000 ರೂ. ಮತ್ತು ಅದಕ್ಕಿಂತ ಹೆಚ್ಚಿನ ವಹಿವಾಟುಗಳಿಗೆ ಈ ಶುಲ್ಕವನ್ನು 300 ರೂ.ಗೆ ಮಿತಿಗೊಳಿಸಲಾಗುತ್ತದೆ. ಆದಾಗ್ಯೂ, ಗ್ರಾಹಕರಿಗೆ ನೇರವಾಗಿ ಈ ಶುಲ್ಕ ವಿಧಿಸುವುದಿಲ್ಲ ಎಂದು ಸರ್ಕಾರ ಮತ್ತು ಪಾವತಿ ಪ್ರಾಧಿಕಾರಗಳು ಸ್ಪಷ್ಟಪಡಿಸಿವೆ. ಆದರೂ, ಈಗಾಗಲೇ ಕಡಿಮೆ ಲಾಭಾಂಶದಲ್ಲಿ ಕಾರ್ಯನಿರ್ವಹಿಸುತ್ತಿರುವ ವ್ಯಾಪಾರಿಗಳಿಗೆ ಈ ಹೆಚ್ಚುವರಿ ಹೊರೆ ಆತಂಕ ಮೂಡಿಸಿದೆ ಎಂದು ಎಐಸಿಪಿಡಿಎಫ್‌ನ ರಾಷ್ಟ್ರೀಯ ಅಧ್ಯಕ್ಷ ಧೈರ್ಯಶೀಲ್ ಪಾಟೀಲ್ ಅಭಿಪ್ರಾಯಪಟ್ಟಿದ್ದಾರೆ.

ಯಾವ ಸಂಘಟನೆಗಳು ಭಾಗಿ?

ಮಹಾರಾಷ್ಟ್ರ ಚೇಂಬರ್ ಆಫ್ ಕಾಮರ್ಸ್, ಇಂಡಸ್ಟ್ರಿ ಆ್ಯಂಡ್ ಅಗ್ರಿಕಲ್ಚರ್ (ಎಂಎಸಿಸಿಐಎ) ಈ ಆಂದೋಲನಕ್ಕೆ ಚಾಲನೆ ನೀಡಿದ್ದು, ಫೆಡರೇಷನ್ ಆಫ್ ರೀಟೇಲ್ ಟ್ರೇಡರ್ಸ್ ವೆಲ್ಫೇರ್ ಅಸೋಸಿಯೇಷನ್, ಆಲ್ ಇಂಡಿಯಾ ಕನ್ಸೂಮರ್ ಪ್ರಾಡಕ್ಟ್ಸ್ ಡಿಸ್ಟ್ರಿಬ್ಯೂಟರ್ಸ್ ಫೆಡರೇಷನ್, ಆಲ್ ಇಂಡಿಯಾ ಮೊಬೈಲ್ ರೀಟೇಲರ್ಸ್ ಅಸೋಸಿಯೇಷನ್, ಆಲ್ ಇಂಡಿಯಾ ಜ್ಯುವೆಲರ್ಸ್ ಆ್ಯಂಡ್ ಗೋಲ್ಡ್‌ಸ್ಮಿತ್ ಫೆಡರೇಷನ್ ಮತ್ತು ಆಲ್ ಇಂಡಿಯಾ ಎಡಿಬಲ್ ಆಯಿಲ್ ಟ್ರೇಡರ್ಸ್ ಫೆಡರೇಷನ್ ಸೇರಿದಂತೆ ಹಲವು ಸಂಘಟನೆಗಳು ಈ ಕರೆಗೆ ಸಾಥ್ ನೀಡಿವೆ. ಇದಕ್ಕೆ ವ್ಯತಿರಿಕ್ತವಾಗಿ, ಸಂಘಟಿತ ಚಿಲ್ಲರೆ ವ್ಯಾಪಾರ ವಲಯವನ್ನು ಪ್ರತಿನಿಧಿಸುವ ರೀಟೇಲ್ ಅಸೋಸಿಯೇಷನ್ ಆಫ್ ಇಂಡಿಯಾ (RAI) ಎಂಡಿಆರ್ ವಿರೋಧಿಸುತ್ತಿದ್ದರೂ, ಅಕ್ಟೋಬರ್ 2ರ ಪ್ರತಿಭಟನೆಯಲ್ಲಿ ಪಾಲ್ಗೊಳ್ಳುವುದಿಲ್ಲ ಎಂದು ಸ್ಪಷ್ಟಪಡಿಸಿದೆ; ಇನ್ನೊಂದೆಡೆ ಸಿಎಐಟಿ, ಯುಪಿಐ ವ್ಯವಸ್ಥೆಗೆ ಮೂಲಸೌಕರ್ಯ ಮತ್ತು ಸೈಬರ್ ಭದ್ರತೆಗಾಗಿ ಹೆಚ್ಚಿನ ಸಂಪನ್ಮೂಲ ಬೇಕು ಎಂಬ ಕಾರಣಕ್ಕೆ ಎಂಡಿಆರ್ ಜಾರಿಗೆ ಬೆಂಬಲ ಸೂಚಿಸಿದೆ.

ಮಧ್ಯಪ್ರದೇಶದಲ್ಲಿ, ಇಂದೋರ್ ರೀಟೇಲ್ ಗಾರ್ಮೆಂಟ್ಸ್ ಅಸೋಸಿಯೇಷನ್ ಅಧ್ಯಕ್ಷ ಅಕ್ಷಯ್ ಜೈನ್ ಅವರು, ಒಂದೊಮ್ಮೆ ಅಕ್ಟೋಬರ್ 15ರೊಳಗೆ ಈ ನಿರ್ಧಾರ ಹಿಂಪಡೆಯದಿದ್ದರೆ, ವ್ಯಾಪಾರಿಗಳು ಯುಪಿಐ ಕ್ಯೂಆರ್ ಕೋಡ್ ಯಂತ್ರಗಳನ್ನು ಜಲಮೂಲಗಳಲ್ಲಿ ಮುಳುಗಿಸುವುದಾಗಿ ಎಚ್ಚರಿಕೆ ನೀಡಿದ್ದಾರೆ.

ಎಷ್ಟು ದೊಡ್ಡ ವಹಿವಾಟು ಅಪಾಯದಲ್ಲಿದೆ?

ಆಗಸ್ಟ್ ತಿಂಗಳೊಂದರಲ್ಲೇ ಯುಪಿಐ 1,551 ಕೋಟಿ ವ್ಯಕ್ತಿಯಿಂದ-ವರ್ತಕರಿಗೆ (P2M) ವಹಿವಾಟುಗಳನ್ನು ನಿರ್ವಹಿಸಿದ್ದು, ಇದರ ಒಟ್ಟು ಮೌಲ್ಯ 8.95 ಲಕ್ಷ ಕೋಟಿ ರೂ. ಆಗಿತ್ತು. ಇದರಲ್ಲಿ 2,000 ರೂ.ಗಿಂತ ಹೆಚ್ಚಿನ ಪಾವತಿಗಳ ಪಾಲು ಸುಮಾರು ಶೇ.67ರಷ್ಟಿತ್ತು — ಇದೇ ಮೊತ್ತ ಈಗ ಹೊಸ ಶುಲ್ಕದ ವ್ಯಾಪ್ತಿಗೆ ಬರಲಿದೆ.

ಮುಂದೇನು?

ಸರ್ಕಾರ ಸೂಕ್ತ ನಿರ್ಧಾರ ಕೈಗೊಳ್ಳದಿದ್ದರೆ, ಮುಂಬರುವ ದಿನಗಳಲ್ಲಿ ಪ್ರತಿಭಟನೆಯನ್ನು ಇನ್ನಷ್ಟು ತೀವ್ರಗೊಳಿಸಲಾಗುವುದು ಎಂದು ಆಲ್ ಇಂಡಿಯಾ ಎಡಿಬಲ್ ಆಯಿಲ್ ಟ್ರೇಡರ್ಸ್ ಫೆಡರೇಷನ್ ಅಧ್ಯಕ್ಷ ಶಂಕರ್ ಠಕ್ಕರ್ ಎಚ್ಚರಿಸಿದ್ದಾರೆ.

ಇತ್ತೀಚಿನ ಲೇಖನಕ್ಕಾಗಿ ಇಲ್ಲಿ ಕ್ಲಿಕ್ ಮಾಡಿ:

ಯಮುನಾ ಎಕ್ಸ್‌ಪ್ರೆಸ್‌ವೇನಲ್ಲಿ ಸ್ಲೀಪರ್ ಬಸ್ ಬೆಂಕಿ ಅವಘಡ: ಒಂಬತ್ತು ಮಂದಿ ಸಾವು, ಚಾಲಕ-ನಿರ್ವಾಹಕ ಬಂಧನ.

ಕಾರುಗಳ ನಕಲಿ ದಾಖಲೆ ಸೃಷ್ಟಿಸುತ್ತಿದ್ದ ಗ್ಯಾಂಗ್ ಲಾಕ್: ಮೂವರನ್ನು ಬಂಧಿಸಿದ ವಿಲ್ಸನ್ ಗಾರ್ಡನ್ ಪೊಲೀಸರು.

ಬಡವರಿಗೆ ಮಾತ್ರ ಗ್ಯಾರಂಟಿ ಸೀಮಿತಗೊಳಿಸಿ: ಸಿಎಂ ಶಿವಕುಮಾರ್‌ಗೆ ಬಿಜೆಪಿ ಶಾಸಕ ಸುರೇಶ್ ಗೌಡ ಆಗ್ರಹ.