ಮೋದಿ–ಪಾರ್ಮೆಲಿನ್ ಮುಖಾಮುಖಿ! ಭಾರತ–ಸ್ವಿಟ್ಜರ್ಲೆಂಡ್ ಸಂಬಂಧಕ್ಕೆ ಹೊಸ ಅಧ್ಯಾಯ; ಇಂದು ಏನೆಲ್ಲ ಚರ್ಚೆ?

ನವದೆಹಲಿ: ಭಾರತ ಮತ್ತು ಸ್ವಿಟ್ಜರ್ಲೆಂಡ್ ನಡುವಿನ ಸಂಬಂಧಕ್ಕೆ ಮತ್ತಷ್ಟು ವೇಗ ನೀಡುವ ಮಹತ್ವದ ರಾಜತಾಂತ್ರಿಕ ಬೆಳವಣಿಗೆಗೆ ಇಂದು ನವದೆಹಲಿ ಸಾಕ್ಷಿಯಾಗಲಿದೆ. ಸ್ವಿಟ್ಜರ್ಲೆಂಡ್‌ನ ಅಧ್ಯಕ್ಷ ಗೈಪಾರ್ಮೆಲಿನ್ ಅವರು ಅಕ್ಟೋಬರ್ 5 ರಿಂದ 7 ರವರೆಗೆ ಮೂರು ದಿನಗಳ ಭಾರತ ಪ್ರವಾಸ ಕೈಗೊಂಡಿದ್ದು, ಇಂದು ಪ್ರಧಾನಿ ನರೇಂದ್ರಮೋದಿ ಅವರೊಂದಿಗೆ ದ್ವಿಪಕ್ಷೀಯ ಮಾತುಕತೆ ನಡೆಸಲಿದ್ದಾರೆ. ವ್ಯಾಪಾರ ಮತ್ತು ಹೂಡಿಕೆಯಿಂದ ಹಿಡಿದು ವಿಜ್ಞಾನ, ತಂತ್ರಜ್ಞಾನ, ನಾವೀನ್ಯತೆ, ಶಿಕ್ಷಣ, ವಲಸೆ ಮತ್ತು ಜನ-ಜನ ಸಂಪರ್ಕದವರೆಗೆ ಹಲವು ಪ್ರಮುಖ ವಿಚಾರಗಳು ಈ ಮಾತುಕತೆಯಲ್ಲಿ ಚರ್ಚೆಗೆ ಬರುವ ನಿರೀಕ್ಷೆಯಿದೆ.

ಮೋದಿ–ಪಾರ್ಮೆಲಿನ್ ಭೇಟಿ ಏಕೆ ಮಹತ್ವದ್ದು?

ಈ ಭೇಟಿಯ ವಿಶೇಷತೆ ಏನೆಂದರೆ, ಇದು ಗೈ ಪಾರ್ಮೆಲಿನ್ ಅವರ ಮೊದಲ ಭಾರತ ರಾಜ್ಯ ಪ್ರವಾಸ. ಆದರೆ 2026ರಲ್ಲೇ ಅವರು ಎರಡನೇ ಬಾರಿ ಭಾರತಕ್ಕೆ ಆಗಮಿಸುತ್ತಿದ್ದಾರೆ. ಇದೇ ವರ್ಷದ ಫೆಬ್ರವರಿಯಲ್ಲಿ ನವದೆಹಲಿಯಲ್ಲಿ ನಡೆದ AI Impact Summitನಲ್ಲಿ ಅವರು ಭಾಗವಹಿಸಿದ್ದರು. ಅಂದರೆ, ಕೆಲವೇ ತಿಂಗಳ ಅಂತರದಲ್ಲಿ ಸ್ವಿಸ್ ನಾಯಕತ್ವದ ಭಾರತ ಭೇಟಿ ನಡೆಯುತ್ತಿರುವುದು ಉಭಯ ದೇಶಗಳ ನಡುವಿನ ಸಂಬಂಧದಲ್ಲಿ ಹೆಚ್ಚುತ್ತಿರುವ ಮಹತ್ವವನ್ನು ತೋರಿಸುತ್ತದೆ.

ಸೋಮವಾರ ನವದೆಹಲಿಗೆ ಆಗಮಿಸಿದ ಪಾರ್ಮೆಲಿನ್ ಅವರಿಗೆ ರಾಷ್ಟ್ರಪತಿ ಭವನದಲ್ಲಿ ಔಪಚಾರಿಕ ಸ್ವಾಗತ ನೀಡಲಾಯಿತು. ರಾಷ್ಟ್ರಪತಿ ದ್ರೌಪದಿ ಮುರ್ಮು ಮತ್ತು ಪ್ರಧಾನಿ ನರೇಂದ್ರ ಮೋದಿ ಅವರು ಸ್ವಿಸ್ ಅಧ್ಯಕ್ಷರನ್ನು ಸ್ವಾಗತಿಸಿದರು. ಗಾರ್ಡ್ ಆಫ್ ಹಾನರ್ ಸೇರಿದಂತೆ ಅಧಿಕೃತ ಸ್ವಾಗತ ಕಾರ್ಯಕ್ರಮದ ಬಳಿಕ ಅವರ ಮೂರು ದಿನಗಳ ಭಾರತ ಪ್ರವಾಸಕ್ಕೆ ಅಧಿಕೃತ ಚಾಲನೆ ದೊರೆಯಿತು.

ಮೋದಿ–ಪಾರ್ಮೆಲಿನ್ ಮಾತುಕತೆಯಲ್ಲಿ ಏನೆಲ್ಲ ಚರ್ಚೆ?

ಇಂದಿನ ಮೋದಿ–ಪಾರ್ಮೆಲಿನ್ ಮಾತುಕತೆಯ ಕೇಂದ್ರಬಿಂದು ಭಾರತ–ಸ್ವಿಟ್ಜರ್ಲೆಂಡ್ ದ್ವಿಪಕ್ಷೀಯ ಸಂಬಂಧವನ್ನು ಮತ್ತಷ್ಟು ವಿಸ್ತರಿಸುವುದಾಗಿದೆ. ವಿಶೇಷವಾಗಿ ವ್ಯಾಪಾರ ಮತ್ತು ಹೂಡಿಕೆ, ವಿಜ್ಞಾನ, ತಂತ್ರಜ್ಞಾನ ಮತ್ತು ನಾವೀನ್ಯತೆ, ಚಲನಶೀಲತೆ, ಸಂಸ್ಕೃತಿ ಹಾಗೂ ಜನ-ಜನಸಂಪರ್ಕದಂತಹ ಕ್ಷೇತ್ರಗಳಿಗೆ ಹೆಚ್ಚಿನ ಒತ್ತು ನೀಡುವ ಸಾಧ್ಯತೆಯಿದೆ. ಇದರ ಜೊತೆಗೆ ಪ್ರಾದೇಶಿಕ ಮತ್ತು ಜಾಗತಿಕ ಬೆಳವಣಿಗೆಗಳ ಬಗ್ಗೆಯೂ ಇಬ್ಬರು ನಾಯಕರು ಅಭಿಪ್ರಾಯ ವಿನಿಮಯ ಮಾಡಿಕೊಳ್ಳಲಿದ್ದಾರೆ. ಬಹುಪಕ್ಷೀಯ ವೇದಿಕೆಗಳಲ್ಲಿ ಎರಡೂ ದೇಶಗಳ ಸಹಕಾರವೂ ಚರ್ಚೆಯ ಭಾಗವಾಗಲಿದೆ.

ಈ ಮಾತುಕತೆ ಕೇವಲ ರಾಜತಾಂತ್ರಿಕ ಭೇಟಿಯಾಗಿ ಉಳಿಯುವುದಿಲ್ಲ ಎಂಬ ನಿರೀಕ್ಷೆಯೂ ಇದೆ. ವ್ಯಾಪಾರ, ಹೂಡಿಕೆ ಮತ್ತು ತಂತ್ರಜ್ಞಾನ ಕ್ಷೇತ್ರಗಳಲ್ಲಿ ಹೊಸ ಅವಕಾಶಗಳನ್ನು ತೆರೆದುಕೊಳ್ಳುವ ಸಾಧ್ಯತೆ ಇರುವುದರಿಂದ ಉದ್ಯಮ ವಲಯವೂ ಈ ಭೇಟಿಯನ್ನು ಕುತೂಹಲದಿಂದ ಗಮನಿಸುತ್ತಿದೆ. ಪಾರ್ಮೆಲಿನ್ ಅವರೊಂದಿಗೆ ಹಿರಿಯ ಅಧಿಕಾರಿಗಳು ಮತ್ತು ಉದ್ಯಮ ನಾಯಕರನ್ನೊಳಗೊಂಡ ಉನ್ನತ ಮಟ್ಟದ ನಿಯೋಗವೂ ಭಾರತಕ್ಕೆ ಬಂದಿದೆ.

EFTA ಒಪ್ಪಂದಕ್ಕೆ ಏಕೆ ಇಷ್ಟು ಮಹತ್ವ?

ಗೈ ಪಾರ್ಮೆಲಿನ್ ಅವರ ಭಾರತ ಪ್ರವಾಸಕ್ಕೆ ಮತ್ತೊಂದು ಪ್ರಮುಖ ಹಿನ್ನೆಲೆ ಇದೆ. ಅದು ಭಾರತ–EFTA Trade and Economic Partnership Agreement (TEPA). ಯುರೋಪಿಯನ್ ಫ್ರೀ ಟ್ರೇಡ್ ಅಸೋಸಿಯೇಷನ್ (EFTA)ಯಲ್ಲಿ ಸ್ವಿಟ್ಜರ್ಲೆಂಡ್, ಐಸ್‌ಲ್ಯಾಂಡ್, ಲಿಚ್ಟೆನ್‌ಸ್ಟೈನ್ ಮತ್ತು ನಾರ್ವೆ ಸೇರಿವೆ. ಭಾರತ ಮತ್ತು EFTA ನಡುವಿನ ಈ ಆರ್ಥಿಕ ಪಾಲುದಾರಿಕೆ ಒಪ್ಪಂದವು 2025ರ ಅಕ್ಟೋಬರ್ 1ರಂದು ಜಾರಿಗೆ ಬಂದಿದೆ. ಇದೀಗ ಅದರ ಮೊದಲ ವಾರ್ಷಿಕೋತ್ಸವದ ಸಂದರ್ಭದಲ್ಲಿ ಎರಡನೇ India-EFTA Prosperity Summit ನಡೆಯಲಿದ್ದು, ಪಾರ್ಮೆಲಿನ್ ಅದರಲ್ಲಿ ಭಾಗವಹಿಸಲಿದ್ದಾರೆ.

ಈ ಒಪ್ಪಂದದಿಂದ ಸ್ವಿಸ್ ಕಂಪನಿಗಳಿಗೆ ಭಾರತೀಯ ಮಾರುಕಟ್ಟೆಯಲ್ಲಿ ಹೆಚ್ಚಿನ ಅವಕಾಶಗಳು ದೊರೆಯುವ ನಿರೀಕ್ಷೆಯಿದೆ. ಮತ್ತೊಂದೆಡೆ, ಭಾರತೀಯ ಕಂಪನಿಗಳಿಗೂ EFTA ದೇಶಗಳ ಮಾರುಕಟ್ಟೆಗಳಿಗೆ ಪ್ರವೇಶದ ಅವಕಾಶಗಳು ಹೆಚ್ಚಾಗಬಹುದು. ಹೀಗಾಗಿ TEPA ಜಾರಿಗೆ ಬಂದ ಬಳಿಕ ವ್ಯಾಪಾರ ಮತ್ತು ಹೂಡಿಕೆಯ ವಾಸ್ತವಿಕ ಪ್ರಗತಿ ಹೇಗಿದೆ ಎಂಬುದನ್ನು ಪರಿಶೀಲಿಸುವುದು ಈ ಭೇಟಿಯ ಪ್ರಮುಖ ಅಂಶವಾಗಿದೆ.

ಸ್ವಿಟ್ಜರ್ಲೆಂಡ್ ಈಗಾಗಲೇ EFTA ದೇಶಗಳ ಪೈಕಿ ಭಾರತದ ಅತಿ ದೊಡ್ಡ ವ್ಯಾಪಾರ ಮತ್ತು ಹೂಡಿಕೆ ಪಾಲುದಾರವಾಗಿದೆ. ಸ್ವಿಸ್ ಸರ್ಕಾರದ ಮಾಹಿತಿಯ ಪ್ರಕಾರ, ಭಾರತದಲ್ಲಿ 330ಕ್ಕೂ ಹೆಚ್ಚು ಸ್ವಿಸ್ ಕಂಪನಿಗಳು ಕಾರ್ಯನಿರ್ವಹಿಸುತ್ತಿವೆ. ಹೀಗಾಗಿ ಮುಂದಿನ ಹಂತದಲ್ಲಿ ಹೂಡಿಕೆ, ಕೈಗಾರಿಕಾ ಸಹಕಾರ ಮತ್ತು ತಂತ್ರಜ್ಞಾನ ವರ್ಗಾವಣೆಗೆ ಹೆಚ್ಚಿನ ಅವಕಾಶಗಳನ್ನು ಸೃಷ್ಟಿಸುವುದು ಎರಡೂ ದೇಶಗಳ ಆಸಕ್ತಿಯಾಗಿದೆ.

ವಿಜ್ಞಾನ, ತಂತ್ರಜ್ಞಾನ ಮತ್ತು AI ಕೂಡ ಪ್ರಮುಖ

ವ್ಯಾಪಾರದ ಜೊತೆಗೆ ವಿಜ್ಞಾನ ಮತ್ತು ತಂತ್ರಜ್ಞಾನ ಕ್ಷೇತ್ರವೂ ಈ ಭೇಟಿಯಲ್ಲಿ ಪ್ರಮುಖ ಸ್ಥಾನ ಪಡೆದಿದೆ. ವಿಶೇಷವಾಗಿ ಕೃತಕ ಬುದ್ಧಿಮತ್ತೆ, ಸಂಶೋಧನೆ ಮತ್ತು ನಾವೀನ್ಯತೆ ಕ್ಷೇತ್ರಗಳಲ್ಲಿ ಭಾರತ ಮತ್ತು ಸ್ವಿಟ್ಜರ್ಲೆಂಡ್ ನಡುವೆ ಸಹಕಾರದ ಅವಕಾಶಗಳು ಹೆಚ್ಚಾಗುತ್ತಿವೆ.

ಫೆಬ್ರವರಿಯಲ್ಲಿ ನಡೆದ AI Impact Summit ವೇಳೆ ಪಾರ್ಮೆಲಿನ್ ಮತ್ತು ಮೋದಿ ಭೇಟಿಯಾಗಿದ್ದರು. ಇದೇ ಸಂದರ್ಭದಲ್ಲಿ ಸ್ವಿಟ್ಜರ್ಲೆಂಡ್ 2027ರ AI Summit ಅನ್ನು ಜಿನೀವಾದಲ್ಲಿ ಆಯೋಜಿಸುವುದಾಗಿ ಘೋಷಿಸಿತ್ತು. ಅಂತರರಾಷ್ಟ್ರೀಯ AI ಆಡಳಿತ, ಸಂಶೋಧನೆ ಮತ್ತು ಜವಾಬ್ದಾರಿಯುತ AI ಅಭಿವೃದ್ಧಿಯಂತಹ ವಿಷಯಗಳಲ್ಲಿ ಎರಡೂ ದೇಶಗಳು ಪರಸ್ಪರ ಸಹಕಾರ ವಿಸ್ತರಿಸುವ ಅವಕಾಶವಿದೆ.

ಶಿಕ್ಷಣ ಮತ್ತು ಸಂಶೋಧನೆಯತ್ತವೂ ಗಮನ

ಭಾರತ–ಸ್ವಿಟ್ಜರ್ಲೆಂಡ್ ಸಂಬಂಧವು ಕೇವಲ ಆರ್ಥಿಕ ಕ್ಷೇತ್ರಕ್ಕೆ ಸೀಮಿತವಾಗಿಲ್ಲ. ಶಿಕ್ಷಣ, ಸಂಶೋಧನೆ ಮತ್ತು ನಾವೀನ್ಯತೆ ಕ್ಷೇತ್ರಗಳಲ್ಲೂ ಎರಡೂ ದೇಶಗಳ ನಡುವೆ ದೀರ್ಘಕಾಲದ ಸಹಕಾರವಿದೆ. ಸ್ವಿಸ್ ಸರ್ಕಾರದ ಪ್ರಕಾರ, ಈ ಕ್ಷೇತ್ರಗಳಲ್ಲಿ ಈಗಾಗಲೇ ಇರುವ ಸಹಕಾರವನ್ನು ಮತ್ತಷ್ಟು ಬಲಪಡಿಸುವುದು ಪಾರ್ಮೆಲಿನ್ ಅವರ ಭೇಟಿಯ ಪ್ರಮುಖ ಉದ್ದೇಶಗಳಲ್ಲಿ ಒಂದಾಗಿದೆ.

ಇದರ ಜೊತೆಗೆ ವಲಸೆ ಮತ್ತು ಜನ-ಜನ ಸಂಪರ್ಕವೂ ಮಾತುಕತೆಯ ಅಜೆಂಡಾದಲ್ಲಿದೆ. ವಿದ್ಯಾರ್ಥಿಗಳು, ಸಂಶೋಧಕರು, ಉದ್ಯಮಿಗಳು ಮತ್ತು ವೃತ್ತಿಪರರ ಸಂಚಾರವನ್ನು ಸುಗಮಗೊಳಿಸುವ ವಿಚಾರಗಳು ಮುಂದಿನ ದಿನಗಳಲ್ಲಿ ಹೆಚ್ಚಿನ ಮಹತ್ವ ಪಡೆಯಬಹುದು.

ಪಾರ್ಮೆಲಿನ್ ಅವರ ಮುಂದಿನ ಕಾರ್ಯಕ್ರಮವೇನು?

ಮೋದಿ ಅವರೊಂದಿಗಿನ ಮಾತುಕತೆಯ ಬಳಿಕ ಪಾರ್ಮೆಲಿನ್ ಅವರು ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರನ್ನು ಭೇಟಿಯಾಗಲಿದ್ದಾರೆ. ರಾಷ್ಟ್ರಪತಿ ಅವರ ಗೌರವಾರ್ಥ ಅಧಿಕೃತ ಔತಣಕೂಟವನ್ನೂ ಆಯೋಜಿಸಲಿದ್ದಾರೆ. ವಿದೇಶಾಂಗ ಸಚಿವ ಎಸ್. ಜೈಶಂಕರ್ ಕೂಡ ಸ್ವಿಸ್ ಅಧ್ಯಕ್ಷರನ್ನು ಭೇಟಿಯಾಗಲಿದ್ದಾರೆ.

ಅಕ್ಟೋಬರ್ 6ರಂದು ಪಾರ್ಮೆಲಿನ್ ಅವರು ನೊಯ್ಡಾ ಇಂಟರ್‌ ನ್ಯಾಷನಲ್ ಏರ್‌ಪೋರ್ಟ್ಗೆ ಭೇಟಿ ನೀಡುವ ಕಾರ್ಯಕ್ರಮವಿದೆ. ಈ ವಿಮಾನ ನಿಲ್ದಾಣದ ಅಭಿವೃದ್ಧಿ ಮತ್ತು ಕಾರ್ಯಾಚರಣೆಯಲ್ಲಿ ಜ್ಯೂರಿಕ್ ಏರ್‌ಪೋರ್ಟ್‌ನ ಅಂಗಸಂಸ್ಥೆಯ ಪಾತ್ರವಿರುವುದರಿಂದ, ಸ್ವಿಸ್ ಹೂಡಿಕೆ ಮತ್ತು ಮೂಲಸೌಕರ್ಯ ಸಹಕಾರದ ದೃಷ್ಟಿಯಿಂದ ಈ ಭೇಟಿಗೂ ಮಹತ್ವವಿದೆ.

ಅಕ್ಟೋಬರ್ 7ರಂದು ನಡೆಯಲಿರುವ ಎರಡನೇ India-EFTA Prosperity Summitನೊಂದಿಗೆ ಪಾರ್ಮೆಲಿನ್ ಅವರ ಭಾರತ ಪ್ರವಾಸ ಅಂತ್ಯಗೊಳ್ಳಲಿದೆ. ಈ ಶೃಂಗಸಭೆಯಲ್ಲಿ ಸರ್ಕಾರ ಮತ್ತು ಉದ್ಯಮ ವಲಯದ ಪ್ರತಿನಿಧಿಗಳು ಹೊಸ ಹೂಡಿಕೆ ಮತ್ತು ಸಹಕಾರದ ಅವಕಾಶಗಳ ಕುರಿತು ಚರ್ಚಿಸಲಿದ್ದಾರೆ.

ಮುಂದಿನ ದಿನಗಳಲ್ಲಿ ಏನು ಬದಲಾಗಬಹುದು?

ಒಟ್ಟಿನಲ್ಲಿ, ಗೈ ಪಾರ್ಮೆಲಿನ್ ಅವರ ಭಾರತ ಭೇಟಿ ಹಲವು ಹಂತಗಳಲ್ಲಿ ಮಹತ್ವ ಪಡೆದಿದೆ. ಒಂದೆಡೆ ಭಾರತ–ಸ್ವಿಟ್ಜರ್ಲೆಂಡ್ ನಡುವಿನ ದೀರ್ಘಕಾಲದ ಸ್ನೇಹ ಸಂಬಂಧವನ್ನು ಮತ್ತಷ್ಟು ಬಲಪಡಿಸುವ ಪ್ರಯತ್ನ ನಡೆಯುತ್ತಿದ್ದರೆ, ಮತ್ತೊಂದೆಡೆ TEPA ಜಾರಿಗೆ ಬಂದ ಮೊದಲ ವರ್ಷದ ಬಳಿಕ ವ್ಯಾಪಾರ ಮತ್ತು ಹೂಡಿಕೆಗೆ ಹೊಸ ವೇಗ ನೀಡುವ ಅವಕಾಶವೂ ಎದುರಾಗಿದೆ.

ವಿಶೇಷವಾಗಿ ಹೂಡಿಕೆ, ತಂತ್ರಜ್ಞಾನ, AI, ಸಂಶೋಧನೆ, ಶಿಕ್ಷಣ ಮತ್ತು ವೃತ್ತಿ ಪರರ ಚಲನ ಶೀಲತೆ ಕ್ಷೇತ್ರಗಳಲ್ಲಿ ಇಂದು ನಡೆಯುವ ಮೋದಿ–ಪಾರ್ಮೆಲಿನ್ ಮಾತುಕತೆ ಮುಂದಿನ ಸಹಕಾರದ ದಿಕ್ಕನ್ನು ನಿರ್ಧರಿಸುವ ಸಾಧ್ಯತೆಯಿದೆ.

ಅದರಲ್ಲೂ ಭಾರತದಲ್ಲಿ ಹೂಡಿಕೆ ಮಾಡಿರುವ ಸ್ವಿಸ್ ಕಂಪನಿಗಳ ಸಂಖ್ಯೆ 330ಕ್ಕೂ ಅಧಿಕವಾಗಿರುವ ಸಂದರ್ಭದಲ್ಲಿ, ಎರಡೂ ದೇಶಗಳು ಆರ್ಥಿಕ ಸಂಬಂಧವನ್ನು ಮುಂದಿನ ಹಂತಕ್ಕೆ ಕೊಂಡೊಯ್ಯಲು ಬಯಸುತ್ತಿವೆ. ಹೀಗಾಗಿ ಇಂದಿನ ಮಾತುಕತೆಯಿಂದ ಹೊರಬರುವ ನಿರ್ಧಾರಗಳು ಕೇವಲ ಭಾರತ–ಸ್ವಿಟ್ಜರ್ಲೆಂಡ್ ರಾಜತಾಂತ್ರಿಕ ಸಂಬಂಧಕ್ಕಷ್ಟೇ ಸೀಮಿತವಾಗದೆ, ಭಾರತದ ವ್ಯಾಪಾರ, ಹೂಡಿಕೆ, ತಂತ್ರಜ್ಞಾನ ಮತ್ತುಉದ್ಯೋಗಾವಕಾಶಗಳ ಮೇಲೂ ಪರಿಣಾಮ ಬೀರುವ ಸಾಧ್ಯತೆಯಿದೆ. ಮುಂದಿನ ಎರಡು ದಿನಗಳಲ್ಲಿ ನಡೆಯಲಿರುವ ಸಭೆಗಳು ಮತ್ತು ಅಕ್ಟೋಬರ್ 7ರ India-EFTA Prosperity Summitನಲ್ಲಿ ಹೊರಬರುವ ಘೋಷಣೆಗಳತ್ತ ಇದೀಗ ಎಲ್ಲರ ಗಮನ ನೆಟ್ಟಿದೆ. ಮೋದಿ–ಪಾರ್ಮೆಲಿ ನ್ಮಾತು ಕತೆ ಭಾರತ–ಸ್ವಿಟ್ಜರ್ಲೆಂಡ್ಸಂ ಬಂಧಕ್ಕೆ ಹೊಸ ಅಧ್ಯಾಯವನ್ನೇ ತೆರೆಯುತ್ತದೆಯೇ ಎಂಬುದು ಮುಂದಿನ ಬೆಳವಣಿಗೆಗಳಿಂದ ಸ್ಪಷ್ಟವಾಗಲಿದೆ

ಇತ್ತೀಚಿನ ಲೇಖನಕ್ಕಾಗಿ ಇಲ್ಲಿ ಕ್ಲಿಕ್ ಮಾಡಿ

ಅಮೆರಿಕದ $20,000 Visa Bond: ಭಾರತಕ್ಕೆ ವಿನಾಯಿತಿ; ಭಾರತೀಯರಿಗೆ ಏನು ಬದಲಾವಣೆ?

ಜೀವಂತವಾಗಿದ್ದರೂ ಮತದಾರರ ಪಟ್ಟಿಯಲ್ಲಿ ‘ಸತ್ತವರು’! ಕರ್ನಾಟಕದಲ್ಲಿ ಪರಿಶೀಲನೆ ವೇಳೆ ಬಯಲಾದ ಶಾಕಿಂಗ್ ಸಂಗತಿ.

ಬೆಂಗಳೂರಿಗರಿಗೆ ಟ್ರಾಫಿಕ್ ಶಾಕ್! ರೇಸ್‌ಕೋರ್ಸ್ ರಸ್ತೆ 60 ದಿನ ಬಂದ್; ಯಾವ ಪರ್ಯಾಯ ಮಾರ್ಗ ಬಳಸಬೇಕು?