ಮೀರತ್‌ನಲ್ಲಿ ನಡುಕ ಹುಟ್ಟಿಸುವ ಕ್ರೌರ್ಯ: ನಿದ್ದೆಯಲ್ಲಿದ್ದ ಗಂಡನಿಗೆ ವಿಷಪೂರಿತ ಕಟ್ಟುಹಾವು ಕಚ್ಚಿಸಿ ಕೊಂದ ಪಾಪಿ ಪತ್ನಿ.

ಉತ್ತರ ಪ್ರದೇಶದ ಮೀರತ್‌ನಲ್ಲಿ ಮನುಷ್ಯ ಕುಲವೇ ತಲೆತಗ್ಗಿಸುವಂತಹ ಭೀಕರ ಮತ್ತು ಅತ್ಯಂತ ಕ್ರೂರ ಕೊಲೆ ಪ್ರಕರಣವೊಂದು ಬೆಳಕಿಗೆ ಬಂದಿದೆ. ಅಕ್ರಮ ಸಂಬಂಧಕ್ಕೆ ಅಡ್ಡಿಯಾಗಿದ್ದ ಗಂಡನನ್ನು ಅತ್ಯಂತ ಯೋಜಿತವಾಗಿ, ತಣ್ಣಗಿನ ರಕ್ತದಲ್ಲಿ ಕೊಲೆ ಮಾಡಲು ಪತ್ನಿಯೊಬ್ಬಳು ಅನುಸರಿಸಿದ ಹಾದಿ ಕೇಳಿದರೆ ಇಡೀ ದೇಶವೇ ಬೆಚ್ಚಿಬೀಳುತ್ತದೆ.

ಸ್ಥಳೀಯ ಶಾಲೆಯ ಮಾಲೀಕರಾಗಿದ್ದ ಅತುಲ್ ಪನ್ವಾರ್ ಎಂಬುವವರ ಅನುಮಾನಾಸ್ಪದ ಸಾವಿನ ತನಿಖೆ ನಡೆಸಿದ ಮೀರತ್ ಪೊಲೀಸರು, ಇದೀಗ ಅವರ ಪತ್ನಿ ದಾಮಿನಿ ಮತ್ತು ಆಕೆಯ ಪ್ರೇಮಿ ತುಷಾರ್ ಎಂಬುವವರನ್ನು ಬಂಧಿಸಿದ್ದು, ಇಡೀ ಹತ್ಯೆಯ ಹಿಂದಿನ ರೋಮಾಂಚನಕಾರಿ ರಹಸ್ಯವನ್ನು ಬಯಲಿಗೆಳೆದಿದ್ದಾರೆ.

15 ಸಾವಿರಕ್ಕೆ ಕಟ್ಟುಹಾವು ಖರೀದಿ, ಮೂರು ದಿನ ಉಪವಾಸ!

ಪೊಲೀಸ್ ತನಿಖೆಯ ಪ್ರಕಾರ, ದಾಮಿನಿ ಮತ್ತು ಆಕೆಯ ಪ್ರೇಮಿ ತುಷಾರ್ ಇಬ್ಬರೂ ಸೇರಿ ಅತುಲ್ ಪನ್ವಾರ್ ಅವರನ್ನು ಮುಗಿಸಲು ಅತಿ ಕ್ರೂರ ಸಂಚು ರೂಪಿಸಿದ್ದರು. ಇದಕ್ಕಾಗಿ ಅವರು ಬರೋಬ್ಬರಿ 15,000 ರೂಪಾಯಿ ನೀಡಿ ಅತ್ಯಂತ ವಿಷಪೂರಿತವಾದ ‘ಕಟ್ಟುಹಾವು’ (Krait Snake) ಒಂದನ್ನು ಖರೀದಿಸಿದ್ದರು. ಹಾವಿಗೆ ಕಚ್ಚುವ ಆಕ್ರೋಶ ಹೆಚ್ಚಾಗಲಿ ಎಂಬ ಕಾರಣಕ್ಕೆ ಆ ಹಾವನ್ನು ಸತತ ಮೂರು ದಿನಗಳ ಕಾಲ ಯಾವುದೇ ಆಹಾರ ನೀಡದೆ ಉಪವಾಸ ಹಸಿವಿನಿಂದ ಇಡಲಾಗಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ.

ಹಾಲಿನಲ್ಲಿ ನಿದ್ದೆ ಮಾತ್ರೆ, ಹಾಸಿಗೆಯ ಮೇಲೆ ಹಾವು!

ಘಟನೆಯ ದಿನದಂದು ದಾಮಿನಿ ತನ್ನ ಪತಿ ಅತುಲ್ ಕುಡಿಯುವ ಹಾಲಿನಲ್ಲಿ ಅತಿಯಾದ ನಿದ್ದೆ ಮಾತ್ರೆಗಳನ್ನು ಬೆರೆಸಿದ್ದಾಳೆ. ಹಾಲು ಕುಡಿದ ಅತುಲ್ ಗಾಢ ನಿದ್ದೆಗೆ ಜಾರುತ್ತಿದ್ದಂತೆ, ದಾಮಿನಿ ಮತ್ತು ಆಕೆಯ ಪ್ರೇಮಿ ಸೇರಿ ಹಸಿದಿದ್ದ ಆ ವಿಷಪೂರಿತ ಕಟ್ಟುಹಾವನ್ನು ಅತುಲ್ ಮಲಗಿದ್ದ ಹಾಸಿಗೆಯ ಮೇಲೆಯೇ ಬಿಟ್ಟಿದ್ದಾರೆ. ಹಸಿವಿನಿಂದ ಕೆರಳಿ ಕೆಂಡವಾಗಿದ್ದ ಹಾವು ಗಾಢ ನಿದ್ದೆಯಲ್ಲಿದ್ದ ಅತುಲ್ ಅವರಿಗೆ ತೀವ್ರವಾಗಿ ಕಚ್ಚಿದೆ. ಹಾವಿನ ಭೀಕರ ವಿಷ ಮೈಗೆಲ್ಲಾ ಹರಡಿ ಅತುಲ್ ಜಾಗದಲ್ಲೇ ಪ್ರಾಣ ಬಿಟ್ಟಿದ್ದಾರೆ.

6 ವರ್ಷದ ಮಗುವಿದ್ದರೂ ಕರುಣೆ ತೋರದ ತಾಯಿ

ಮೂಲಗಳ ಪ್ರಕಾರ, ಮೃತ ಅತುಲ್ ಮತ್ತು ಆರೋಪಿ ದಾಮಿನಿಗೆ 6 ವರ್ಷದ ಒಂದು ಪುಟ್ಟ ಮಗುವಿದೆ. ತನ್ನ ಸ್ವಂತ ಮಗುವಿನ ಭವಿಷ್ಯದ ಬಗ್ಗೆಯೂ ಯೋಚಿಸದ ದಾಮಿನಿ, ಅಕ್ರಮ ಸಂಬಂಧದ ಅಮಲಿನಲ್ಲಿ ಪತಿಯನ್ನೇ ಅತ್ಯಂತ ಕ್ರೂರವಾಗಿ ಹತ್ಯೆ ಮಾಡಿದ್ದಾಳೆ. ಆರಂಭದಲ್ಲಿ ಇದು ಸಾಮಾನ್ಯ ಹಾವಿನ ಕಡಿತದಿಂದ ಸಂಭವಿಸಿದ ಸಾವು ಎಂದು ಬಿಂಬಿಸಲು ಪ್ರಯತ್ನಿಸಲಾಗಿತ್ತು. ಆದರೆ ಪೊಲೀಸರ ತೀಕ್ಷ್ಣ ತನಿಖೆ ಮತ್ತು ತಾಂತ್ರಿಕ ಸಾಕ್ಷ್ಯಗಳ ಆಧಾರದ ಮೇಲೆ ಆರೋಪಿಗಳಿಬ್ಬರ ಪೈಶಾಚಿಕ ಕೃತ್ಯ ಜಗತ್ತಿನ ಮುಂದೆ ಅನಾವರಣಗೊಂಡಿದೆ.

ಸದ್ಯ ಮೀರತ್ ಪೊಲೀಸರು ಇಬ್ಬರೂ ಆರೋಪಿಗಳನ್ನು ವಶಕ್ಕೆ ಪಡೆದು ಮುಂದಿನ ಕಾನೂನು ಕ್ರಮ ಕೈಗೊಂಡಿದ್ದಾರೆ. ಈ ಘಟನೆ ಇಡೀ ಮೀರತ್ ನಗರವನ್ನು ನಡುಗಿಸುವಂತೆ ಮಾಡಿದೆ.

ಇತ್ತೀಚಿನ ಲೇಖನಕ್ಕಾಗಿ ಇಲ್ಲಿ ಕ್ಲಿಕ್ ಮಾಡಿ:

ಕಿಲ್ಲಿಂಗ್ ಮೆಷಿನ್ ಆದ ಬಿಎಂಟಿಸಿ: ನಿಯಂತ್ರಣ ತಪ್ಪಿ ಆಟೋಗೆ ಡಿಕ್ಕಿ, ಚಾಲಕ ಸ್ಥಳದಲ್ಲೇ ಸಾವು!