ಬೆಂಗಳೂರಿನ ಹಸಿರು ಉಳಿಸಲು ರೊಚ್ಚಿಗೆದ್ದ ಜನಸ್ತೋಮ: ಲಾಲ್ಬಾಗ್ನಲ್ಲಿ ಬೃಹತ್ ಪ್ರತಿಭಟನೆ, ಪಾರ್ಕ್ ತಿದ್ದುಪಡಿ ಕಾಯ್ದೆ ತಕ್ಷಣ ವಾಪಸ್ಗೆ ತೇಜಸ್ವಿ ಸೂರ್ಯ ಆಗ್ರಹ.
ವರದಿಗಾರರು (Reporter)
Hemanth Rajashekar05:40 AM IST
ಬೆಂಗಳೂರು: ಸಿಲಿಕಾನ್ ಸಿಟಿಯ ಶ್ವಾಸಕೋಶ ಎಂದೇ ಪ್ರಸಿದ್ಧವಾಗಿರುವ ಐತಿಹಾಸಿಕ ಲಾಲ್ಬಾಗ್ ಸಸ್ಯತೋಟದಲ್ಲಿ ರವಿವಾರ ಬೃಹತ್ ಸಾರ್ವಜನಿಕ ಪ್ರತಿಭಟನೆ ಹಾಗೂ ಜಾಗೃತಿ ನಡಿಗೆ ನೆರವೇರಿತು. ರಾಜ್ಯ ಸರ್ಕಾರವು ಸಾರ್ವಜನಿಕ ಉದ್ಯಾನವನಗಳ ಶೇಕಡಾ 5 ರಷ್ಟು ಭೂಮಿಯನ್ನು ಮೂಲಸೌಕರ್ಯ ಮತ್ತು ಇತರೆ ಯೋಜನೆಗಳಿಗೆ ಬಳಸಿಕೊಳ್ಳಲು ಮುಂದಾಗಿರುವುದನ್ನು ವಿರೋಧಿಸಿ, ನಗರದ ನಾಗರಿಕರು, ಪರಿಸರ ಪ್ರೇಮಿಗಳು ಹಾಗೂ ಬೆಳಗಿನ ವಾಯುವಿಹಾರಿಗಳು ಒಗ್ಗಟ್ಟಾಗಿ ಬೀದಿಗಿಳಿದು ಆಕ್ರೋಶ ವ್ಯಕ್ತಪಡಿಸಿದರು.
ಸಾರ್ವಜನಿಕರ ಆಸ್ತಿಯಾಗಿರುವ ಉದ್ಯಾನವನಗಳನ್ನು ಮೂಲಸೌಕರ್ಯ ಯೋಜನೆಗಳ ಹೆಸರಿನಲ್ಲಿ ವಶಪಡಿಸಿಕೊಳ್ಳಲು ಹೊರಟಿರುವ ‘ಕರ್ನಾಟಕ ಸರ್ಕಾರಿ ಉದ್ಯಾನವನಗಳ (ಸಂರಕ್ಷಣೆ) (ತಿದ್ದುಪಡಿ) ವಿಧೇಯಕ, 2026’ ಅನ್ನು ತಕ್ಷಣವೇ ವಾಪಸ್ ಪಡೆಯಬೇಕೆಂದು ಪ್ರತಿಭಟನಾಕಾರರು ಸರ್ಕಾರವನ್ನು ಬಲವಾಗಿ ಆಗ್ರಹಿಸಿದರು.
91ರ ಹರೆಯದಲ್ಲೂ ಹಸಿರು ಕಾಳಜಿ: ಎಲ್.ಆರ್. ಯಲ್ಲಪ್ಪ ರೆಡ್ಡಿ ಅವರ ಸ್ಫೂರ್ತಿದಾಯಕ ನಾಯಕತ್ವ
ಅರಣ್ಯ ಇಲಾಖೆಯ ನಿಕಟಪೂರ್ವ ಕಾರ್ಯದರ್ಶಿ (GoK) ಹಾಗೂ ಹಿರಿಯ ಪರಿಸರ ತಜ್ಞರಾದ 91 ವರ್ಷದ ಶ್ರೀ ಎ. ಎನ್. ಯಲ್ಲಪ್ಪ ರೆಡ್ಡಿ (IFS Rtd) ಅವರು ತಮ್ಮ ಇಳಿವಯಸ್ಸಿನಲ್ಲೂ ಬೆಂಗಳೂರಿನ ಹಸಿರು ವಲಯಗಳ ರಕ್ಷಣೆಯ ಒಂದೇ ಒಂದು ಮಹಾನ್ ಉದ್ದೇಶಕ್ಕಾಗಿ ಅದ್ಭುತ ಸಮರ್ಪಣೆ, ನಿಷ್ಠೆ ಮತ್ತು ಅಚಲ ಬದ್ಧತೆಯಿಂದ ಈ ಹೋರಾಟದ ಮುಂಚೂಣಿಯಲ್ಲಿ ನಿಂತು ದಾರಿ ತೋರಿಸುತ್ತಿದ್ದಾರೆ.
ಬೆಂಗಳೂರು ಹಾಗೂ ನಗರದ ಹಸಿರು ಸಿರಿಯ ಮೇಲಿನ ಅಪಾರ ಪ್ರೀತಿಯಿಂದ ಪ್ರೇರಿತರಾಗಿ ಇಂದು ಸುಮಾರು 3,000ಕ್ಕೂ ಹೆಚ್ಚು ಬೆಂಗಳೂರಿಗರು ಯಲ್ಲಪ್ಪ ರೆಡ್ಡಿ ಅವರೊಂದಿಗೆ ಒಂದಾಗಿ ಕಟಬದ್ಧರಾಗಿ ನಿಂತರು. ನಗರದ ಶ್ವಾಸಕೋಶ ಮತ್ತು ಹಸಿರು ಪರಂಪರೆಗೆ ಕಂಟಕ ಎದುರಾದಾಗ ಬೆಂಗಳೂರು ಎಂದಿಗೂ ಮೌನವಾಗಿರುವುದಿಲ್ಲ, ತಾನಾಗಿಯೇ ಎದ್ದು ನಿಂತು ಹೋರಾಡುತ್ತದೆ ಎಂಬುದನ್ನು ಈ ಬೃಹತ್ ನಾಗರಿಕ ಸತ್ಯಾಗ್ರಹ ಇಡೀ ರಾಜ್ಯಕ್ಕೆ ಸ್ಪಷ್ಟವಾಗಿ ಸಾಬೀತುಪಡಿಸಿತು.
ಸರ್ಕಾರದ ವಿರುದ್ಧ ಕಠಿಣ ವಾಗ್ದಾಳಿ ನಡೆಸಿದ ಸಂಸದ ತೇಜಸ್ವಿ ಸೂರ್ಯ
ಬೆಂಗಳೂರು ದಕ್ಷಿಣ ಲೋಕಸಭಾ ಕ್ಷೇತ್ರದ ಸಂಸದ ತೇಜಸ್ವಿ ಸೂರ್ಯ ಅವರ ನೇತೃತ್ವದಲ್ಲಿ ನಡೆದ ಈ ಬೃಹತ್ ಪ್ರತಿಭಟನೆಯಲ್ಲಿ ಸಾವಿರಾರು ನಾಗರಿಕರು ಕರಪತ್ರ ಹಾಗೂ ಫಲಕಗಳನ್ನು ಹಿಡಿದು ಸರ್ಕಾರದ ವಿರುದ್ಧ ಘೋಷಣೆಗಳನ್ನು ಕೂಗಿದರು. ಪ್ರತಿಭಟನೆಯನ್ನುದ್ದೇಶಿಸಿ ಮಾಧ್ಯಮಗಳೊಂದಿಗೆ ಮಾತನಾಡಿದ ತೇಜಸ್ವಿ ಸೂರ್ಯ ಅವರು, ರಾಜ್ಯ ಸರ್ಕಾರದ ಈ ನಡೆ ನಗರದ ಹಸಿರು ಪರಂಪರೆಯ ಮೇಲಿನ ನೇರ ದಾಳಿ ಎಂದು ತೀವ್ರವಾಗಿ ಖಂಡಿಸಿದರು.
“ಸಾರ್ವಜನಿಕ ಸ್ಥಳಗಳನ್ನು ಮತ್ತು ಉದ್ಯಾನವನಗಳನ್ನು ರಕ್ಷಿಸುವುದು ಸರ್ಕಾರದ ಪ್ರಮುಖ ಕರ್ತವ್ಯ. ಅದನ್ನು ಬಿಟ್ಟು ಸರ್ಕಾರವೇ ಉದ್ಯಾನವನಗಳನ್ನು ಅತಿಕ್ರಮಿಸಲು, ಧ್ವಂಸಗೊಳಿಸಲು ಮತ್ತು ನಮ್ಮ ಹಸಿರು ಪ್ರದೇಶಗಳನ್ನು ನಾಶಮಾಡಲು ಹೊರಟಿರುವುದು ಕ್ಷಮಿಸ ಅರ್ಹವಲ್ಲದ ಅಪರಾಧ. ಲಾಲ್ಬಾಗ್ ಮತ್ತು ಕಬ್ಬನ್ ಪಾರ್ಕ್ಗಳು ಬೆಂಗಳೂರಿನಲ್ಲಿ ಉಳಿದುಕೊಂಡಿರುವ ಕೊನೆಯ ಸಾಂಸ್ಕೃತಿಕ ಹಾಗೂ ಪರಿಸರ ಪರಂಪರೆಯ ಸಂಕೇತಗಳು. ಸರ್ಕಾರಕ್ಕೆ ಇವುಗಳನ್ನು ರಕ್ಷಿಸಲು ಸಾಧ್ಯವಾಗದಿದ್ದರೂ ಪರವಾಗಿಲ್ಲ, ಆದರೆ ಅವುಗಳನ್ನು ನಾಶಪಡಿಸುವ ಕೆಲಸಕ್ಕಂತೂ ಕೈ ಹಾಕಬಾರದು. ರಕ್ಷಣೆ ನೀಡುತ್ತಾರೆ ಎಂದು ನಿರೀಕ್ಷಿಸುವುದೇ ಇಂದಿನ ದಿನಗಳಲ್ಲಿ ದೊಡ್ಡ ವಿಷಯವಾಗಿದೆ,” ಎಂದು ಅವರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದರು.
ವೈಜ್ಞಾನಿಕ ಹಾಗೂ ಸುಸ್ಥಿರ ಅಭಿವೃದ್ಧಿಗೆ ಆಗ್ರಹ
ನಗರದಲ್ಲಿ ಕೈಗೆತ್ತಿಕೊಳ್ಳಲು ಉದ್ದೇಶಿಸಿರುವ ಸುರಂಗ ರಸ್ತೆ ಯೋಜನೆ (Tunnel Road Project) ಸೇರಿದಂತೆ ಸರ್ಕಾರದ ನಾನಾ ಮೂಲಸೌಕರ್ಯ ಯೋಜನೆಗಳು ಮತ್ತು ಅವೈಜ್ಞಾನಿಕ ಯೋಜನಾ ವಿಧಾನಗಳ ಕುರಿತು ಮಾಧ್ಯಮಗಳು ಕೇಳಿದ ಪ್ರಶ್ನೆಗೆ ಉತ್ತರಿಸಿದ ಸಂಸದರು, ನಗರಕ್ಕೆ ಅಭಿವೃದ್ಧಿ ಬೇಕು, ಆದರೆ ಅದು ಸಾರ್ವಜನಿಕರ ಹಿತಾಸಕ್ತಿ ಹಾಗೂ ಪರಿಸರ ಸಂರಕ್ಷಣೆಗೆ ಪೂರಕವಾಗಿರಬೇಕು ಎಂದು ಪ್ರತಿಪಾದಿಸಿದರು.
“ನಾವು ಪ್ರತಿಯೊಂದು ಅವೈಜ್ಞಾನಿಕ ಯೋಜನೆಯನ್ನೂ ಪ್ರಶ್ನಿಸುತ್ತಿದ್ದೇವೆ. ನಮಗೆ ಅಭಿವೃದ್ಧಿ ಬೇಕು, ಆದರೆ ಅದು ಪರಿಸರಸ್ನೇಹಿ ಮತ್ತು ವೈಜ್ಞಾನಿಕ ಅಭಿವೃದ್ಧಿಯಾಗಿರಬೇಕು. ನಗರದ ಸಾರ್ವಜನಿಕರನ್ನು ಮತ್ತು ಸ್ಥಳೀಯ ಜನರನ್ನು ವಿಶ್ವಾಸಕ್ಕೆ ತೆಗೆದುಕೊಂಡು ಯೋಜನೆಗಳನ್ನು ರೂಪಿಸಬೇಕೇ ವಿನಃ, ಯಾವುದೋ ನಿರ್ದಿಷ್ಟ ರಾಜಕೀಯ ಪಕ್ಷಕ್ಕೆ ಅಥವಾ ಗುತ್ತಿಗೆದಾರರಿಗೆ ಲಾಭ ಮಾಡಿಕೊಡುವ ಉದ್ದೇಶದಿಂದ ಜನರ ಮೇಲೆ ಇಂತಹ ಯೋಜನೆಗಳನ್ನು ಬಲವಂತವಾಗಿ ಹೇರಬಾರದು,” ಎಂದು ತೇಜಸ್ವಿ ಸೂರ್ಯ ಖಡಕ್ ಆಗಿ ಹೇಳಿದರು.
‘ಲಾಲ್ಬಾಗ್ ಉಳಿಸಿ, ನಮ್ಮ ಉದ್ಯಾನವನಗಳನ್ನು ಉಳಿಸಿ’ – ಪ್ರತಿಭಟನೆ ತೀವ್ರಗೊಳಿಸುವ ಎಚ್ಚರಿಕೆ
“ಲಾಲ್ಬಾಗ್ ಉಳಿಸಿ, ನಮ್ಮ ಉದ್ಯಾನವನಗಳನ್ನು ಉಳಿಸಿ” (Save Lalbagh. Save Our Parks) ಎಂಬ ಬಲವಾದ ಘೋಷಣೆಯೊಂದಿಗೆ ನಾಗರಿಕರು ಹೋರಾಟಕ್ಕೆ ಧುಮುಕಿದ್ದಾರೆ. ಬೆಂಗಳೂರಿನ ಉಳಿದಿರುವ ಹಸಿರು ವಲಯಗಳಿಗೆ ಸಂಪೂರ್ಣ ಶಾಸನಬದ್ಧ ರಕ್ಷಣೆ ನೀಡದಿದ್ದರೆ ಹಾಗೂ ಈ ತಿದ್ದುಪಡಿ ವಿಧೇಯಕವನ್ನು ತಕ್ಷಣವೇ ರದ್ದುಗೊಳಿಸದಿದ್ದರೆ ಮುಂಬರುವ ದಿನಗಳಲ್ಲಿ ನಗರಾದ್ಯಂತ ಪ್ರತಿಭಟನೆಯನ್ನು ಮತ್ತಷ್ಟು ತೀವ್ರಗೊಳಿಸುವುದಾಗಿ ನಾಗರಿಕ ಸಂಘಟನೆಗಳು ಸರ್ಕಾರಕ್ಕೆ ಎಚ್ಚರಿಕೆ ನೀಡಿದ್ದಾರೆ.
ಇತ್ತೀಚಿನ ಲೇಖನಕ್ಕಾಗಿ ಇಲ್ಲಿ ಕ್ಲಿಕ್ ಮಾಡಿ:
ಕ್ರಿಮಿನಲ್ ಕೇಸ್ಗಳ ವಾಪಸಾತಿಗೆ ಸರ್ಕಾರ ಬಿಗ್ ಸ್ಟೆಪ್! ಸಚಿವ ಪ್ರಿಯಾಂಕ್ ಖರ್ಗೆ ಹೆಗಲಿಗೆ ಸಂಪುಟ ಉಪಸಮಿತಿ ನಾಯಕತ್ವ.