ನಕಲಿ ಔಷಧ ಜಾಲಕ್ಕೆ ತತ್ತರಿಸಿದ ರಾಜ್ಯ: 24 ಫಾರ್ಮಾ ಸಂಸ್ಥೆಗಳ ಲೈಸೆನ್ಸ್ ರದ್ದುಗೊಳಿಸಿದ FDA.

ಬೆಂಗಳೂರು: ಜನರ ಜೀವದೊಂದಿಗೆ ಚೆಲ್ಲಾಟವಾಡುತ್ತಿದ್ದ ಬೃಹತ್ ನಕಲಿ ಔಷಧ ಜಾಲವನ್ನು ಭೇದಿಸಿರುವ ಕರ್ನಾಟಕ ಆಹಾರ ಸುರಕ್ಷತೆ ಮತ್ತು ಔಷಧ ನಿಯಂತ್ರಣ ಮಂಡಳಿ (FDA), ರಾಜ್ಯಾದ್ಯಂತ ದೊಡ್ಡ ಮಟ್ಟದ ಕಾರ್ಯಾಚರಣೆ ನಡೆಸಿದೆ. ಸಾರ್ವಜನಿಕರ ಆರೋಗ್ಯಕ್ಕೆ ತೀವ್ರ ಧಕ್ಕೆ ತರುತ್ತಿದ್ದ 24 ಪ್ರಮುಖ ಫಾರ್ಮಾ ವಿತರಕರು ಹಾಗೂ ಚಿಲ್ಲರೆ ವ್ಯಾಪಾರಿಗಳ ವಿರುದ್ಧ ಕಠಿಣ ಕ್ರಮ ಜರುಗಿಸಲಾಗಿದ್ದು, 16 ಸಂಸ್ಥೆಗಳ ಲೈಸೆನ್ಸ್ ಸಂಪೂರ್ಣವಾಗಿ ರದ್ದುಗೊಳಿಸಲಾಗಿದೆ ಮತ್ತು 8 ಸಂಸ್ಥೆಗಳ ಲೈಸೆನ್ಸ್ ಅಮಾನತುಗೊಳಿಸಲಾಗಿದೆ.

ಈ ಬೃಹತ್ ಅಕ್ರಮದಲ್ಲಿ ವಿಜಯನಗರದ ಪ್ರಸಿದ್ಧ ಮಾರುತಿ ಮೆಡಿಕಲ್ಸ್ (Maruthi Medicals) ಕೂಡ ನಕಲಿ ಔಷಧ ಮಾರಾಟ ಮಾಡುತ್ತಾ ಸಿಕ್ಕಿಬಿದ್ದಿದ್ದು, ಅದರ ಅಂಗಡಿ ಲೈಸೆನ್ಸ್ ಅನ್ನು ಅಧಿಕಾರಿಗಳು ತಕ್ಷಣದಿಂದ ಜಾರಿಗೆ ಬರುವಂತೆ ರದ್ದುಗೊಳಿಸಿದ್ದಾರೆ.

ಬಿಡದಿಯ ಫಾರ್ಮ್‌ಹೌಸ್‌ನಲ್ಲೇ ನಡೀತಿತ್ತು ಕಳ್ಳ ಆಟ!

ಆಗಸ್ಟ್ 18ರಂದು ಕರ್ನಾಟಕ ಎಫ್‌ಡಿಎಯ ಔಷಧ ಜಾರಿ ವಿಭಾಗದ (Drug Enforcement Wing) ರಹಸ್ಯ ಪಡೆ ಬೆಂಗಳೂರು ದಕ್ಷಿಣ ಜಿಲ್ಲೆಯ ಬಿಡದಿ ಸಮೀಪದ ಕುರುಬರಕೇರನಹಳ್ಳಿಯಲ್ಲಿರುವ ಫಾರ್ಮ್‌ಹೌಸ್‌ ಒಂದರ ಮೇಲೆ ದಿಢೀರ್ ದಾಳಿ ನಡೆಸಿತ್ತು. ಈ ವೇಳೆ ಯಾವುದೇ ಪರವಾನಗಿ ಇಲ್ಲದೆ ರಹಸ್ಯವಾಗಿ ನಡೆಯುತ್ತಿದ್ದ ನಕಲಿ ಔಷಧಗಳ ರೀಪ್ಯಾಕಿಂಗ್ (Repackaging) ಮತ್ತು ರೀಲೇಬಲಿಂಗ್ (Relabelling) ಘಟಕ ಬಯಲಿಗೆ ಬಂದಿದೆ.

ದಾಳಿಯ ಸಮಯದಲ್ಲಿ ಅಧಿಕಾರಿಗಳು ಕಂಡ ದೃಶ್ಯ ನೋಡಿ ಬೆಚ್ಚಿಬಿದ್ದಿದ್ದಾರೆ. ನೆರೆ ರಾಜ್ಯಗಳಿಂದ ತೀರಾ ಕಡಿಮೆ ಬೆಲೆಗೆ ತರಿಸಲಾಗುತ್ತಿದ್ದ ಜೆನೆರಿಕ್ (Generic) ಮಾತ್ರೆಗಳು ಮತ್ತು ಇಂಜೆಕ್ಷನ್‌ಗಳನ್ನು ಹೊಸ ವೈಯಲ್‌ಗಳಿಗೆ (Vials) ತುಂಬಿ, ಬಹುರಾಷ್ಟ್ರೀಯ ಫಾರ್ಮಾ ಕಂಪನಿಗಳ ದುಬಾರಿ ಮತ್ತು ಜೀವ ರಕ್ಷಕ ಗಂಭೀರ ಔಷಧಗಳ ನಕಲಿ ಲೇಬಲ್ ಅಂಟಿಸಲಾಗುತ್ತಿತ್ತು. ಗ್ರಾಹಕರು ಹಾಗೂ ಆಸ್ಪತ್ರೆಗಳನ್ನು ನಂಬಿಸಲು ಈ ನಕಲಿ ಲೇಬಲ್‌ಗಳ ಮೇಲೆ ತಾಂತ್ರಿಕವಾಗಿ ಕೆಲಸ ಮಾಡದ ನಕಲಿ QR ಕೋಡ್‌ಗಳನ್ನು ಸಹ ಮುದ್ರಿಸಲಾಗಿತ್ತು.

ಅವಧಿ ಮುಗಿದ ಔಷಧಗಳ ಮಾರಾಟಕ್ಕೆ ಹುನ್ನಾರ

ಈ ಜಾಲದ ಭೀಕರತೆ ಇಷ್ಟಕ್ಕೇ ಮುಗಿಯುವುದಿಲ್ಲ. ದಾಳಿಯ ವೇಳೆ ಕಚೇರಿ ಹಾಗೂ ಗೋದಾಮಿನಲ್ಲಿ ಅಪಾರ ಪ್ರಮಾಣದ ಅವಧಿ ಮುಗಿದ (Expired) ಔಷಧಗಳ ಬಾಕ್ಸ್‌ಗಳು ಪತ್ತೆಯಾಗಿವೆ. ಇವುಗಳ ಲೇಬಲ್ ಹಾಗೂ ದಿನಾಂಕ ಬದಲಾಯಿಸಿ ಮತ್ತೆ ಮುಕ್ತ ಮಾರುಕಟ್ಟೆಗೆ ಹರಿಸಲು ಈ ದಂಧೆಕೋರರು ಸಕಲ ಸಿದ್ಧತೆ ನಡೆಸಿದ್ದರು ಎಂಬುದು ತನಿಖೆಯಲ್ಲಿ ಬಹಿರಂಗವಾಗಿದೆ. ಅಪಾಯಕಾರಿ ರಾಸಾಯನಿಕಗಳನ್ನು ಒಳಗೊಂಡಿರುವ ಇಂತಹ ನಕಲಿ ಔಷಧಗಳು ರೋಗಿಗಳ ಜೀವಕ್ಕೇ ಕಂಠಕವಾಗಿದ್ದವು.

ಜೀವಾವಧಿ ಶಿಕ್ಷೆ ವಿಧಿಸುವ ಕಾನೂನು ಕ್ರಮ

ಈ ಗಂಭೀರ ಪ್ರಕರಣಕ್ಕೆ ಸಂಬಂಧಿಸಿದಂತೆ ಆರೋಗ್ಯ ಇಲಾಖೆಯು ಔಷಧ ಮತ್ತು ಸೌಂದರ್ಯವರ್ಧಕಗಳ ಕಾಯ್ದೆ 1940ರ (Drugs and Cosmetics Act, 1940) ಅಡಿಯಲ್ಲಿ ಕಠಿಣ ಕ್ರಿಮಿನಲ್ ಪ್ರಕರಣ ದಾಖಲಿಸಿದೆ.

• ಕಾಯ್ದೆಯ ಸೆಕ್ಷನ್ 17B: ನಕಲಿ ಹಾಗೂ ವಂಚನೆಯ ಔಷಧಗಳನ್ನು ‘ಸ್ಪೂರಿಯಸ್ ಡ್ರಗ್ಸ್’ (Spurious Drugs) ಎಂದು ವ್ಯಾಖ್ಯಾನಿಸುತ್ತದೆ.
• ಕಾಯ್ದೆಯ ಸೆಕ್ಷನ್ 27: ಇಂತಹ ಔಷಧಗಳ ತಯಾರಿಕೆ, ಸಂಗ್ರಹಣೆ, ವಿತರಣೆ ಹಾಗೂ ಮಾರಾಟವನ್ನು ಗಂಭೀರ ಅಪರಾಧವೆಂದು ಪರಿಗಣಿಸುತ್ತದೆ. ಈ ಸೆಕ್ಷನ್ ಅಡಿಯಲ್ಲಿ ಅಪರಾಧ ಸಾಬೀತಾದರೆ ಕನಿಷ್ಠ 10 ವರ್ಷಗಳಿಂದ ಹಿಡಿದು ಜೀವಾವಧಿ ಜೈಲು ಶಿಕ್ಷೆ ಹಾಗೂ ಭಾರಿ ಮೊತ್ತದ ದಂಡ ವಿಧಿಸಲು ಕಾನೂನಿನಲ್ಲಿ ಅವಕಾಶವಿದೆ.

ಎಸ್ಐಟಿ (SIT) ತನಿಖೆಗೆ ಆದೇಶಿಸಿದ ಸಚಿವರು

ಈ ಅಕ್ರಮ ಜಾಲದ ಕುರಿತು ತೀವ್ರ ಕಳವಳ ವ್ಯಕ್ತಪಡಿಸಿರುವ ಕರ್ನಾಟಕ ಆರೋಗ್ಯ ಸಚಿವ ಯು. ಟಿ. ಖಾದರ್, “ಸಾರ್ವಜನಿಕರ ಜೀವದ ಜೊತೆ ಚೆಲ್ಲಾಟವಾಡುವ ಇಂತಹ ಅಕ್ರಮ ಚಟುವಟಿಕೆಗಳನ್ನು ಸರ್ಕಾರ ಯಾವುದೇ ಕಾರಣಕ್ಕೂ ಸಹಿಸುವುದಿಲ್ಲ,” ಎಂದು ಎಚ್ಚರಿಸಿದ್ದಾರೆ.

ಪ್ರಕರಣದ ಆಳ ಅಗಲ ಮತ್ತು ಇದರ ಹಿಂದೆ ಇರುವ ಪ್ರತಿಯೊಬ್ಬ ಸೂತ್ರಧಾರಿಯನ್ನು ಪತ್ತೆಹಚ್ಚಲು ವಿಶೇಷ ತನಿಖಾ ತಂಡವನ್ನು (SIT) ರಚಿಸಲಾಗಿದೆ. ಜಾಲದ ಸಂಪೂರ್ಣ ಜಾಲವನ್ನು ಬುಡಮೇಲು ಮಾಡಲು ಮತ್ತು ತಪ್ಪಿತಸ್ಥರಿಗೆ ಕಠಿಣ ಶಿಕ್ಷೆ ಕೊಡಿಸಲು ಎಸ್‌ಐಟಿ ಹಗಲಿರುಳು ಕಾರ್ಯಾಚರಣೆ ಮುಂದುವರಿಸಿದೆ.

ಆರೋಗ್ಯ ಇಲಾಖೆಯು ಸಾರ್ವಜನಿಕರಿಗೆ ಎಚ್ಚರಿಕೆ ನೀಡಿದ್ದು, ಅಧಿಕೃತ ಪರವಾನಗಿ ಹೊಂದಿರುವ ಮೆಡಿಕಲ್ ಶೋ ರೂಂಗಳಿಂದ ಮಾತ್ರ ಸರಿಯಾದ ಬಿಲ್ ಪಡೆದು ಔಷಧಗಳನ್ನು ಖರೀದಿಸುವಂತೆ ಮತ್ತು ಯಾವುದೇ ಅನುಮಾನಾಸ್ಪದ ಪ್ಯಾಕಿಂಗ್ ಕಂಡುಬಂದಲ್ಲಿ ತಕ್ಷಣವೇ ಅಧಿಕಾರಿಗಳಿಗೆ ದೂರು ನೀಡುವಂತೆ ಮನವಿ ಮಾಡಿದೆ.

ಇತ್ತೀಚಿನ ಲೇಖನಕ್ಕಾಗಿ ಇಲ್ಲಿ ಕ್ಲಿಕ್ ಮಾಡಿ:

ಸೌಜನ್ಯ ಕೊಲೆ ಪ್ರಕರಣದ ಮರುತನಿಖೆಗೆ ಸುಪ್ರೀಂ ಆದೇಶ: ಡಾ. ವೀರೇಂದ್ರ ಹೆಗ್ಗಡೆ ವಿರುದ್ಧ ನಡೆದಿತ್ತಾ ಭಾರಿ ಸಂಚು? ಚಿನ್ನಯ್ಯ ಬಿಚ್ಚಿಟ್ಟ ಸತ್ಯ.

ಕುಶಾಲನಗರ-ಮಡಿಕೇರಿ ಹೆದ್ದಾರಿಯಲ್ಲಿ ಸರಣಿ ಅಪಘಾತ: ಗಣೇಶ ವಿಸರ್ಜನೆ ಮುಗಿಸಿ ಮರಳುತ್ತಿದ್ದ ಮೂವರ ಸಾವು, ಏಳು ಜನರಿಗೆ ಗಂಭೀರ ಗಾಯ.

ರಾಕಾ ಸಿನಿಮಾಗೆ ಗಿನ್ನೆಸ್ ವಿಶ್ವ ದಾಖಲೆಯ ಗರಿ: ಮೊಷನ್ ಕ್ಯಾಪ್ಚರ್‌ನಲ್ಲಿ ಹೊಸ ಇತಿಹಾಸ ಬರೆದ ಅಲ್ಲು ಅರ್ಜುನ್ – ಅಟ್ಲಿ ಕಾಂಬಿನೇಷನ್.