ಕಾಲೇಜು ವಿದ್ಯಾರ್ಥಿಗಳಿಗೆ ಹೆಚ್‌ಐವಿ ಪರೀಕ್ಷೆ ಕಡ್ಡಾಯವಿಲ್ಲ: 7,000 ಪ್ರಕರಣಗಳ ಸುಳ್ಳು ಸುದ್ದಿಗೆ ಸ್ಪಷ್ಟನೆ ನೀಡಿದ ಆರೋಗ್ಯ ಇಲಾಖೆ (KarSAPS)!

ಬೆಂಗಳೂರು: ರಾಜ್ಯದ ಕಾಲೇಜುಗಳಲ್ಲಿ ಸುಮಾರು 7,000 ವಿದ್ಯಾರ್ಥಿಗಳಿಗೆ ಹೆಚ್‌ಐವಿ ಸೋಂಕು ಪತ್ತೆಯಾಗಿದೆ ಹಾಗೂ ಕಾಲೇಜು ವಿದ್ಯಾರ್ಥಿಗಳಿಗೆ ಹೆಚ್‌ಐವಿ ಪರೀಕ್ಷೆಯನ್ನು ಕಡ್ಡಾಯಗೊಳಿಸಲಾಗಿದೆ ಎಂದು ಸಾಮಾಜಿಕ ಜಾಲತಾಣಗಳು ಮತ್ತು ಕೆಲವು ಮಾಧ್ಯಮಗಳಲ್ಲಿ ಹರಿದಾಡುತ್ತಿರುವ ಸುದ್ದ ಸಂಪೂರ್ಣ ಆಧಾರರಹಿತ ಹಾಗೂ ವದಂತಿ ಎಂದು ಕರ್ನಾಟಕ ರಾಜ್ಯ ಏಡ್ಸ್ ತಡೆಗಟ್ಟುವಿಕೆ ಸೊಸೈಟಿ (KSAPS) ಕಟ್ಟುನಿಟ್ಟಾಗಿ ಸ್ಪಷ್ಟಪಡಿಸಿದೆ.

ಜುಲೈ 29, 2026 ರಂದು ಪ್ರೆಸ್ ಕ್ಲಬ್‌ಗೆ ನೀಡಿದ ಅಧಿಕೃತ ಪ್ರಕಟಣೆಯಲ್ಲಿ, ಕರ್ನಾಟಕ ರಾಜ್ಯ ಏಡ್ಸ್ ತಡೆಗಟ್ಟುವಿಕೆ ಸೊಸೈಟಿಯ ಯೋಜನಾ ನಿರ್ದೇಶಕರಾದ ಪದ್ಮಾ ಬಸವಂತಪ್ಪ ಅವರು ಸಾರ್ವಜನಿಕರಲ್ಲಿ ಮತ್ತು ವಿದ್ಯಾರ್ಥಿಗಳಲ್ಲಿ ಮೂಡಿರುವ ಗೊಂದಲ ಹಾಗೂ ಆತಂಕವನ್ನು ನಿವಾರಿಸಿದ್ದಾರೆ. ಆರೋಗ್ಯ ಇಲಾಖೆಯ ದತ್ತಾಂಶವನ್ನು ತಪ್ಪಾಗಿ ಅರ್ಥೈಸಿಕೊಂಡಿದ್ದರಿಂದ ಈ ರೀತಿಯ ಭೀತಿ ಹುಟ್ಟಿಸುವ ಸುಳ್ಳು ಸುದ್ದಿ ವ್ಯಾಪಿಸಿದೆ ಎಂದು ಅವರು ವಿವರಿಸಿದ್ದಾರೆ.

ಆರೋಗ್ಯ ಇಲಾಖೆಯ ಅಂಕಿಅಂಶಗಳ ತಪ್ಪಾದ ವಿಶ್ಲೇಷಣೆ

ವಿದ್ಯಾರ್ಥಿಗಳಲ್ಲಿ ಭಾರಿ ಪ್ರಮಾಣದಲ್ಲಿ ಸೋಂಕು ಕಾಣಿಸಿಕೊಂಡಿದೆ ಎಂಬ ವದಂತಿಗೆ ವಿವರಣೆ ನೀಡಿರುವ ಕೆಎಸ್‌ಎಪಿಎಸ್, 2004 ರಿಂದ ಇಲ್ಲಿಯವರೆಗೆ ಅಂದರೆ ಕಳೆದ ಎರಡು ದಶಕಗಳಲ್ಲಿ (20 ವರ್ಷಗಳು) 18 ರಿಂದ 35 ವರ್ಷ ವಯೋಮಾನದ ಒಟ್ಟು 39,028 ವ್ಯಕ್ತಿಗಳು ರಾಜ್ಯದಲ್ಲಿ ಆಂಟಿರೆಟ್ರೊವೈರಲ್ ಥೆರಪಿ (ART) ಚಿಕಿತ್ಸೆ ಪಡೆಯುತ್ತಿದ್ದಾರೆ ಎಂಬ ಐತಿಹಾಸಿಕ ದತ್ತಾಂಶವನ್ನು ಉಲ್ಲೇಖಿಸಿದೆ. ಆದರೆ, ಎರಡು ದಶಕಗಳ ಈ ಒಟ್ಟು ಅಂಕಿಅಂಶವನ್ನು ಕೆಲವರು ಪ್ರಸ್ತುತ ಕಾಲೇಜು ವಿದ್ಯಾರ್ಥಿಗಳಲ್ಲಿ ಕಂಡುಬಂದ “7,000 ಸಕ್ರಿಯ ಪ್ರಕರಣಗಳು” ಎಂದು ತಪ್ಪಾಗಿ ವರದಿ ಮಾಡಿರುವುದು ಈ ಗೊಂದಲಕ್ಕೆ ಮುಖ್ಯ ಕಾರಣವಾಗಿದೆ.

ಹೆಚ್‌ಐವಿ ಪರೀಕ್ಷೆ ಸ್ವಯಂಪ್ರೇರಿತ, ಕಡ್ಡಾಯವಲ್ಲ!

ಹೆಚ್‌ಐವಿ ಮತ್ತು ಏಡ್ಸ್ (ತಡೆಗಟ್ಟುವಿಕೆ ಮತ್ತು ನಿಯಂತ್ರಣ) ಕಾಯ್ದೆ 2017ರ (HIV and AIDS Prevention and Control Act, 2017) ಪ್ರಕಾರ ಯಾವುದೇ ವ್ಯಕ್ತಿಗೆ ಅಥವಾ ವಿದ್ಯಾರ್ಥಿಗೆ ಅವರ ಸಮ್ಮತಿಯಿಲ್ಲದೆ ಹೆಚ್‌ಐವಿ ಪರೀಕ್ಷೆಯನ್ನು ಕಡ್ಡಾಯಗೊಳಿಸಲು ಕಾನೂನಿನಲ್ಲಿ ಅವಕಾಶವಿಲ್ಲ. ರಾಜ್ಯದ ಯಾವುದೇ ಶಿಕ್ಷಣ ಸಂಸ್ಥೆ ಅಥವಾ ಸರ್ಕಾರಿ ಸಂಸ್ಥೆಯು ವಿದ್ಯಾರ್ಥಿಗಳಿಗೆ ಬಲವಂತವಾಗಿ ಹೆಚ್‌ಐವಿ ಪರೀಕ್ಷೆ ಮಾಡುತ್ತಿಲ್ಲ ಹಾಗೂ ಮಾಡಲು ಸಾಧ್ಯವೂ ಇಲ್ಲ ಎಂದು ಆರೋಗ್ಯ ಇಲಾಖೆ ಸ್ಪಷ್ಟಪಡಿಸಿದೆ.

Clarification of the false news regarding mandatory HIV testing in colleges as 7000 HIV positive cases have been found among college students in Karnataka by Padma Basavanthappa, Project Director, KSAPShttps://t.co/vUJdYaMiq3

— Karnataka State AIDS Prevention Society (@KarSAPS) July 29, 2026

ಜಾಗೃತಿ ಮತ್ತು ತಡೆಗಟ್ಟುವಿಕೆಗಾಗಿ ಇಲಾಖೆಯ ವಿಶೇಷ ಕ್ರಮಗಳು

ಕಡ್ಡಾಯ ಪರೀಕ್ಷೆಯ ಬದಲಾಗಿ ಸಾರ್ವಜನಿಕರಲ್ಲಿ ಜಾಗೃತಿ ಮೂಡಿಸಲು ಮತ್ತು ಸ್ವಯಂಪ್ರೇರಿತ ಆರೋಗ್ಯ ತಪಾಸಣೆಗೆ ಉತ್ತೇಜನ ನೀಡಲು ಕೆಎಸ್‌ಎಪಿಎಸ್ ಹಲವಾರು ವೈಜ್ಞಾನಿಕ ಕಾರ್ಯಕ್ರಮಗಳನ್ನು ಜಾರಿಗೆ ತಂದಿದೆ:

• ಏಡ್ಸ್ ಸುರಕ್ಷಾ ಅಭಿಯಾನ (MAS) ಹಾಗೂ ರೆಡ್ ರಿಬ್ಬನ್ ಕ್ಯಾಂಪೇನ್: ಕಾಲೇಜು ಯುವಜನರಲ್ಲಿ ಅರಿವು ಮೂಡಿಸಲು ರಾಜ್ಯಾದ್ಯಂತ ‘ಏಡ್ಸ್ ಸುರಕ್ಷಾ ಅಭಿಯಾನ’ ಹಾಗೂ ‘8 ತಿಂಗಳ ರೆಡ್ ರಿಬ್ಬನ್ ಜಾಗೃತಿ ಕಾರ್ಯಕ್ರಮ’ವನ್ನು ಪ್ರಾರಂಭಿಸಲಾಗಿದೆ. ಕಾಲೇಜು ಮಟ್ಟದಲ್ಲಿ ಪ್ರತಿ ತಿಂಗಳು ವೈವಿಧ್ಯಮಯ ಚಟುವಟಿಕೆಗಳ ಮೂಲಕ ವಿದ್ಯಾರ್ಥಿಗಳಿಗೆ ಅರಿವು ನೀಡಲಾಗುತ್ತಿದೆ.
• ಸ್ವಯಂ ಅಪಾಯದ ಮೌಲ್ಯಮಾಪನ (Self-Risk Assessment Tool): ರಾಷ್ಟ್ರೀಯ ಏಡ್ಸ್ ನಿಯಂತ್ರಣ ಸಂಸ್ಥೆಯ (NACO) ಅಂದಾಜಿನಂತೆ ರಾಜ್ಯದಲ್ಲಿ ಸುಮಾರು 56,000 ವ್ಯಕ್ತಿಗಳು ತಮ್ಮಲ್ಲಿರುವ ಹೆಚ್‌ಐವಿ ಸೋಂಕಿನ ಬಗ್ಗೆ ಅರಿವಿಲ್ಲದೆ ಇದ್ದಾರೆ. ಈ ಗ್ಯಾಪ್ ಅನ್ನು ಕಡಿಮೆ ಮಾಡಲು breakfreeindia.org ವೆಬ್‌ಸೈಟ್ ಅಥವಾ QR ಕೋಡ್ ಸ್ಕ್ಯಾನ್ ಮಾಡುವ ಮೂಲಕ ನಾಗರಿಕರು ಗೌಪ್ಯವಾಗಿ ತಮ್ಮ ಅಪಾಯದ ಮಟ್ಟವನ್ನು ಸ್ವಯಂ ಮೌಲ್ಯಮಾಪನ ಮಾಡಿಕೊಳ್ಳಬಹುದು. ಅಗತ್ಯವಿದ್ದಲ್ಲಿ ಹತ್ತಿರದ ಸಮಕಲನ ಸಲಹೆ ಮತ್ತು ಪರೀಕ್ಷಾ ಕೇಂದ್ರಕ್ಕೆ (ICTC) ಭೇಟಿ ನೀಡಲು ಈ ಟೂಲ್ ಮಾರ್ಗದರ್ಶನ ನೀಡುತ್ತದೆ.
• ವಿವಿಧ ಇಲಾಖೆಗಳ ಸಮನ್ವಯ: ಪೊಲೀಸ್, ಸಾರಿಗೆ ಸಂಸ್ಥೆಗಳು (BMTC, KSRTC, NWKRTC, KKRTC), ಉನ್ನತ ಮತ್ತು ತಾಂತ್ರಿಕ ಶಿಕ್ಷಣ ಇಲಾಖೆ, ಕಾರ್ಮಿಕ ಇಲಾಖೆ, ಸಮಾಜ ಕಲ್ಯಾಣ ಹಾಗೂ ಕೈಗಾರಿಕಾ ಇಲಾಖೆಗಳು ಜಿಲ್ಲಾ ಏಡ್ಸ್ ತಡೆಗಟ್ಟುವಿಕೆ ಅಧಿಕಾರಿಗಳೊಂದಿಗೆ (DAPCO) ಕೈಜೋಡಿಸಿ ಸಂಯೋಜಿತ ಆರೋಗ್ಯ ಶಿಬಿರಗಳನ್ನು ಆಯೋಜಿಸುತ್ತಿವೆ.
• ವಿಶೇಷ ಡಿಜಿಟಲ್ ಜಾಗೃತಿ: ಯುವಜನರನ್ನು ಸುಲಭವಾಗಿ ತಲುಪಲು ಕೆಎಸ್‌ಎಪಿಎಸ್ ‘ಮ್ಯಾಸ್ಕಾಟ್’ ಪ್ರಚಾರದ ಜೊತೆಗೆ ಡೇಟಿಂಗ್ ಆಪ್‌ಗಳು ಸೇರಿದಂತೆ ಆಧುನಿಕ ಡಿಜಿಟಲ್ ವೇದಿಕೆಗಳಲ್ಲಿ ಜಾಗೃತಿ ಜಾಹೀರಾತುಗಳನ್ನು ಪ್ರಕಟಿಸುತ್ತಿದೆ.

QR ಕೋಡ್ ಆಧಾರಿತ ಹೆಚ್‌ಐವಿ ಸ್ವಯಂ-ಅಪಾಯ ಮೌಲ್ಯಮಾಪನ ಟೂಲ್

ಖಾಸಗಿತನವನ್ನು ಕಾಪಾಡಲು KSAPS QR Code-based HIV Self-Risk Assessment Tool ಅನ್ನು ಪರಿಚಯಿಸಿದೆ.

• ಈ QR ಕೋಡ್ ಸ್ಕ್ಯಾನ್ ಮಾಡುವ ಮೂಲಕ ತಮ್ಮ ವೈಯಕ್ತಿಕ ವರ್ತನೆ ಮತ್ತು ಅಪಾಯದ ಆಧಾರದ ಮೇಲೆ ತಮಗೆ ಸೋಂಕಿನ ಅಪಾಯವಿದೆಯೇ ಎಂದು ಗೌಪ್ಯವಾಗಿ ತಿಳಿಯಬಹುದು.
• ಅಗತ್ಯವಿದ್ದರೆ, ಈ ಡಿಜಿಟಲ್ ವ್ಯವಸ್ಥೆಯು ಹತ್ತಿರದ ಆರೋಗ್ಯ ಕೇಂದ್ರ ಮತ್ತು ತಪಾಸಣಾ ಕೇಂದ್ರಗಳ ಮಾಹಿತಿಯನ್ನೂ ನೀಡುತ್ತದೆ.

’95-95-99′ ಗುರಿ ಎಂದರೆ ಏನು?

ಈ ಇಡೀ ಜಾಗೃತಿ ಅಭಿಯಾನವನ್ನು ‘ಏಡ್ಸ್ ಸುರಕ್ಷಾಕ್ಕಾಗಿ ಮೊಬಿಲೈಸೇಶನ್’ (MAS) ಕಾರ್ಯಕ್ರಮದ ಅಡಿಯಲ್ಲಿ ನಡೆಸಲಾಗುತ್ತಿದೆ. ಇದರ ಪ್ರಮುಖ ಗುರಿಗಳು:

• ಮೊದಲ 95%: ಹೆಚ್‌ಐವಿ ಹೊಂದಿರುವ ಶೇ. 95ರಷ್ಟು ಜನರಿಗೆ ತಮ್ಮ ಸೋಂಕಿನ ಸ್ಥಿತಿ ತಿಳಿದಿರುವಂತೆ ಮಾಡುವುದು.
• ಎರಡನೇ 95%: ಸೋಂಕು ದೃಢಪಟ್ಟ ಎಲ್ಲರಿಗೂ ವೈದ್ಯಕೀಯ ART ಚಿಕಿತ್ಸೆ ಸಿಗುವಂತೆ ಮಾಡುವುದು.
• 99% ವೈರಲ್ ನಿಯಂತ್ರಣ: ಚಿಕಿತ್ಸೆಯ ಮೂಲಕ ವೈರಸ್ ಹರಡುವಿಕೆಯನ್ನು ಶೇ. 99ರಷ್ಟು ನಿಯಂತ್ರಿಸುವುದು.

ಸಾರ್ವಜನಿಕರಲ್ಲಿ ಹಾಗೂ ವಿದ್ಯಾರ್ಥಿ ಸಮುದಾಯದಲ್ಲಿ ಅನಗತ್ಯ ಭೀತಿ ಮತ್ತು ಗೊಂದಲಗಳನ್ನು ಸೃಷ್ಟಿಸದಂತೆ, ಎಲ್ಲಾ ಮಾಧ್ಯಮ ಸಂಸ್ಥೆಗಳು ಮತ್ತು ಸುದ್ದಿವಾಹಿನಿಗಳು ನೈಜ ಸಂಗತಿಯನ್ನು ಪ್ರಸಾರ ಮಾಡಬೇಕಾಗಿ KSAPS ಯೋಜನಾ ನಿರ್ದೇಶಕರಾದ ಪದ್ಮಾ ಬಸವಂತಪ್ಪ ಮನವಿ ಮಾಡಿದ್ದಾರೆ.

ಇತ್ತೀಚಿನ ಲೇಖನಕ್ಕಾಗಿ ಇಲ್ಲಿ ಕ್ಲಿಕ್ ಮಾಡಿ:

ಸ್ವಿಗ್ಗಿ-ಝೊಮ್ಯಾಟೋಗೆ ಬಿಗ್ ಶಾಕ್: ಆಗಸ್ಟ್ 15 ರಿಂದ ಬೆಂಗಳೂರಿನ ಸಾವಿರಾರು ಹೋಟೆಲ್‌ಗಳಿಂದ ಆನ್‌ಲೈನ್ ಫುಡ್ ಡೆಲಿವರಿ ಬಂದ್?