ಬ್ರೇಕಿಂಗ್ ನ್ಯೂಸ್: ಭಾರತದಲ್ಲಿ ಭಾರಿ ಸರಣಿ ಸ್ಫೋಟಕ್ಕೆ ಸಂಚು; ಗುಜರಾತ್ ಮತ್ತು ಮಧ್ಯಪ್ರದೇಶದಲ್ಲಿ ‘ಜೈಶ್-ಎ-ಮೊಹಮ್ಮದ್’ ಸಂಘಟನೆಯ 8 ಉಗ್ರರ ಸೆರೆ.

ಭಾರತದ ಆಂತರಿಕ ಭದ್ರತೆಗೆ ಧಕ್ಕೆ ತರಲು ಹೊಂಚು ಹಾಕಿದ್ದ ಪಾಕಿಸ್ತಾನ ಪ್ರೇರಿತ ನಿಷೇಧಿತ ಉಗ್ರಗಾಮಿ ಸಂಘಟನೆ ‘ಜೈಶ್-ಎ-ಮೊಹಮ್ಮದ್’ (JeM) ನೆಟ್‌ವರ್ಕ್ ಮೇಲೆ ಗುಜರಾತ್ ಭಯೋತ್ಪಾದನಾ ನಿರೋಧಕ ದಳ (ATS) ಭರ್ಜರಿ ಕಾರ್ಯಾಚರಣೆ ನಡೆಸಿದೆ. ದೇಶದ ಪ್ರಮುಖ ನಗರಗಳಲ್ಲಿ ಭಾರಿ ವಿಧ್ವಂಸಕ ಕೃತ್ಯಗಳನ್ನು ಎಸಗಲು ಮತ್ತು ಗುಜರಾತ್‌ನಲ್ಲಿ ಸಕ್ರಿಯ ಉಗ್ರರ ಜಾಲವನ್ನು ವಿಸ್ತರಿಸಲು ಯೋಜಿಸಿದ್ದ ಎಂಟು ಮಂದಿ ಜೈಶ್ ಉಗ್ರರನ್ನು ಭದ್ರತಾ ಪಡೆಗಳು ಜಂಟಿ ಕಾರ್ಯಾಚರಣೆಯಲ್ಲಿ ಯಶಸ್ವಿಯಾಗಿ ಬಂಧಿಸುವ ಮೂಲಕ ದೇಶಕ್ಕೆ ಎದುರಾಗಿದ್ದ ದೂಡ್ಡದೊಂದು ವಿಪತ್ತನ್ನು ತಪ್ಪಿಸಿವೆ.

ಗುಜರಾತ್ ಮತ್ತು ನೆರೆಯ ಮಧ್ಯಪ್ರದೇಶದ ವಿವಿಧ ಭಾಗಗಳಲ್ಲಿ ಏಕಕಾಲಕ್ಕೆ ದಾಳಿ ನಡೆಸಿದ ಎಟಿಎಸ್ ಅಧಿಕಾರಿಗಳು ಈ ಪ್ರಮುಖ ಬಂಧನ ಪ್ರಕ್ರಿಯೆಯನ್ನು ಪೂರ್ಣಗೊಳಿಸಿದ್ದಾರೆ. ಈ ಎಂಟೂ ಜನ ಆರೋಪಿಗಳು ನಿಷೇಧಿತ ಜೈಶ್-ಎ-ಮೊಹಮ್ಮದ್ ಸಂಘಟನೆಯ ಸಕ್ರಿಯ ಸದಸ್ಯರಾಗಿದ್ದು, ಭಾರತದಲ್ಲಿ ಸರಣಿ ದಾಳಿಗಳನ್ನು ನಡೆಸಲು ಸಂಚು ರೂಪಿಸುತ್ತಿದ್ದರು ಎಂಬ ಮಹತ್ವದ ಮಾಹಿತಿ ಪ್ರಾಥಮಿಕ ತನಿಖೆಯಿಂದ ಬಹಿರಂಗಗೊಂಡಿದೆ.

ಕಾನೂನುಬಾಹಿರ ಚಟುವಟಿಕೆಗಳ ತಡೆ ಕಾಯ್ದೆಯಡಿ ಪ್ರಕರಣ ದಾಖಲು

ಸುದೀರ್ಘ ಮತ್ತು ಅತ್ಯಂತ ರಹಸ್ಯ ತಾಂತ್ರಿಕ ನಿಗಾ ಹಾಗೂ ತನಿಖೆಯ ನಂತರ ಜುಲೈ 2ರ ಗುರುವಾರದಂದು ಗುಜರಾತ್‌ನ ಎಟಿಎಸ್ ಪೊಲೀಸ್ ಠಾಣೆಯಲ್ಲಿ ಈ ಎಂಟು ಮಂದಿ ಶಂಕಿತ ಉಗ್ರರ ವಿರುದ್ಧ ದೇಶದ ಕಠಿಣ ಕಾನೂನುಗಳ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ.

ಭಯೋತ್ಪಾದನಾ ನಿಗ್ರಹ ಕಾಯ್ದೆಯಾದ ಕಾನೂನುಬಾಹಿರ ಚಟುವಟಿಕೆಗಳ (ತಡೆಗಟ್ಟುವಿಕೆ) ಕಾಯ್ದೆ, 1967 (UAPA) ರ ಸೆಕ್ಷನ್ 13, 17, 18, 38 ಮತ್ತು 39 ರ ಅಡಿಯಲ್ಲಿ ಉಗ್ರರ ವಿರುದ್ಧ ಮೊಕದ್ದಮೆ ಹೂಡಲಾಗಿದೆ. ಇದರೊಂದಿಗೆ, ಭಾರತದ ಹೊಸ ದಂಡ ಸಂಹಿತೆಯಾದ ಭಾರತೀಯ ನ್ಯಾಯ ಸಂಹಿತೆ, 2023 (BNS) ರ ಸೆಕ್ಷನ್ 148 ಹಾಗೂ 61 ರ ಅಡಿಯಲ್ಲಿಯೂ ಸಹ ಕಠಿಣ ಕಾನೂನು ಕ್ರಮಗಳನ್ನು ಜರುಗಿಸಲಾಗಿದೆ. ಭಾರತದಲ್ಲಿ ತನ್ನ ನೆಟ್‌ವರ್ಕ್ ವಿಸ್ತರಿಸಲು ಯತ್ನಿಸುತ್ತಿದ್ದ ಸಂಘಟನೆಯ ಬೆನ್ನೆಲುಬು ಮುರಿಯಲು ಅಧಿಕಾರಿಗಳು ಈ ಕಾನೂನು ಅಸ್ತ್ರಗಳನ್ನು ಪ್ರಯೋಗಿಸಿದ್ದಾರೆ.

ಬಂಧಿತ ಜೈಶ್-ಎ-ಮೊಹಮ್ಮದ್ ಉಗ್ರರ ವಿವರಗಳು:

ಬಂಧಿತ ಎಂಟು ಉಗ್ರರನ್ನು ಈ ಕೆಳಗಿನಂತೆ ಗುರುತಿಸಲಾಗಿದೆ:

• ಅಹಮದ್ ಅಬ್ದುಲ್ಲಾ ಗಾಜಿವಾಲಾ
• ಇಬ್ರಾಹಿಂ ಮೊಹಮ್ಮದ್ ಹುಸೇನ್ ಘಾಘಾ
• ಮುದಸ್ಸಿರ್ ಅಬ್ದುಲ್ಲಾ ಗಾಜಿವಾಲಾ
• ಜಕರಿಯಾ ದುರಾನಿ ಮೊಹಮ್ಮದ್ ಅಮ್ಮರ್ ಘಾಘಾ
• ಮುಫ್ತಿ ಫೌಜಾನ್ ಇಸ್ಮಾಯಿಲ್ ದೌವಾ
• ಮೊಹಮ್ಮದ್ ಅಮೀನ್ ಶೇರಾ
• ಮೊಹಮ್ಮದ್ ಅಬ್ದುಲ್ ರೆಹಮಾನ್ ಸಾವ್ಡಿ
• ಬಿಲಾಲ್ ದುರಾನಿ ಮೊಹಮ್ಮದ್ ಅಮ್ಮರ್ ಘಾಘಾ

ತನಿಖೆ ತೀವ್ರಗೊಳಿಸಿದ ಗುಜರಾತ್ ಎಟಿಎಸ್

“ಬಂಧಿತ ಎಂಟು ಆರೋಪಿಗಳು ನಿಷೇಧಿತ ಭಯೋತ್ಪಾದಕ ಸಂಘಟನೆಯ ಕಟ್ಟರ್ ಸದಸ್ಯರಾಗಿದ್ದು, ಗುಜರಾತ್ ರಾಜ್ಯದಾದ್ಯಂತ ಜೈಶ್-ಎ-ಮೊಹಮ್ಮದ್ ಪರವಾಗಿ ಸಕ್ರಿಯ ಜಾಲವನ್ನು ಸ್ಥಾಪಿಸಲು ಹಗಲಿರುಳು ಶ್ರಮಿಸುತ್ತಿದ್ದರು. ಭಾರತದ ಪ್ರಮುಖ ಮತ್ತು ಸೂಕ್ಷ್ಮ ಪ್ರದೇಶಗಳಲ್ಲಿ ವಿಧ್ವಂಸಕ ಕೃತ್ಯಗಳನ್ನು ಎಸಗುವುದು ಇವರ ಮುಖ್ಯ ಉದ್ದೇಶವಾಗಿತ್ತು,” ಎಂದು ಹಿರಿಯ ಎಟಿಎಸ್ ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.

ಸದ್ಯ ಬಂಧಿತರೆಲ್ಲರನ್ನೂ ತೀವ್ರ ವಿಚಾರಣೆಗೆ ಒಳಪಡಿಸಲಾಗುತ್ತಿದ್ದು, ಇವರ ಹಿಂದೆ ಪಾಕಿಸ್ತಾನದ ಹ್ಯಾಂಡ್ಲರ್‌ಗಳ ಕೈವಾಡ ಹಾಗೂ ಭಾರತದಲ್ಲಿ ಇವರಿಗೆ ಹಣಕಾಸು ಮತ್ತು ಆಶ್ರಯ ನೀಡಿದ ಇತರ ವ್ಯಕ್ತಿಗಳ ಪತ್ತೆಗಾಗಿ ಶೋಧ ಕಾರ್ಯ ತೀವ್ರಗೊಂಡಿದೆ. ಮುಂಬರುವ ದಿನಗಳಲ್ಲಿ ಈ ಜಾಲಕ್ಕೆ ಸಂಬಂಧಿಸಿದಂತೆ ಇನ್ನು ಹಲವು ಪ್ರಮುಖ ಬಂಧನಗಳಾಗುವ ಸಾಧ್ಯತೆ ಇದೆ ಎಂದು ಮೂಲಗಳು ತಿಳಿಸಿವೆ.

ಇತ್ತೀಚಿನ ಲೇಖನಕ್ಕಾಗಿ ಇಲ್ಲಿ ಕ್ಲಿಕ್ ಮಾಡಿ:

ಸರ್ಕಾರಿ ಶಾಲೆಗಳ ಹೈಟೆಕ್ ಮೇಕ್ ಓವರ್‌ಗೆ ADB ಇಂದ ಬರೋಬ್ಬರಿ ₹1,742 ಕೋಟಿ ಬೃಹತ್ ನಿಧಿ ಘೋಷಣೆ.