CBFC ಗೆ 18 ಹೊಸ ಸದಸ್ಯರ ನೇಮಕ! ಸುನಿಲ್ ಶೆಟ್ಟಿ, ಪ್ರೀತಿ ಜಿಂಟಾ, ಪಂಕಜ್ ತ್ರಿಪಾಠಿ, ರಿಕ್ಕಿ ಕೇಜ್‌ಗೆ ಮಹತ್ವದ ಹೊಣೆ.

ಭಾರತೀಯ ಸಿನಿಮಾ ರಂಗದಲ್ಲಿ ಅತ್ಯಂತ ಪ್ರಭಾವಶಾಲಿ ಹಾಗೂ ನಿರ್ಣಾಯಕ ಪಾತ್ರ ವಹಿಸುವ ಕೇಂದ್ರ ಚಲನಚಿತ್ರ ಪ್ರಮಾಣೀಕರಣ ಮಂಡಳಿ (CBFC) ಯನ್ನು ಕೇಂದ್ರ ಸರ್ಕಾರವು ತಕ್ಷಣದಿಂದ ಜಾರಿಗೆ ಬರುವಂತೆ ಪುನರ್ರಚನೆ ಮಾಡಿದೆ. ಭಾರತೀಯ ಚಲನಚಿತ್ರ ರಂಗದ ವಿವಿಧ ವಿಭಾಗಗಳ ಪ್ರಮುಖ ಗಣ್ಯರು, ನಟ-ನಟಿಯರು, ನಿರ್ದೇಶಕರು ಹಾಗೂ ಸಂಗೀತ ನಿರ್ದೇಶಕರನ್ನು ಒಳಗೊಂಡ 18 ಸದಸ್ಯರ ನೂತನ ಮಂಡಳಿಯನ್ನು ಅಧಿಕೃತವಾಗಿ ಘೋಷಿಸಲಾಗಿದೆ.

ಕೇಂದ್ರ ಮಾಹಿತಿ ಮತ್ತು ಪ್ರಸಾರ ಸಚಿವಾಲಯವು 2026 ರ ಸೆಪ್ಟೆಂಬರ್ 16 ರಂದು ಈ ಕುರಿತು ಅಧಿಕೃತ ಅಧಿಸೂಚನೆಯನ್ನು ಹೊರಡಿಸಿದ್ದು, ಚಲನಚಿತ್ರ ರಂಗದಲ್ಲಿ ಈ ನಿರ್ಧಾರ ಭಾರಿ ಸಂಚಲನ ಮೂಡಿಸಿದೆ.

ಕಾನೂನು ಚೌಕಟ್ಟು ಮತ್ತು ಅಧಿಕಾರಾವಧಿ

ಸಿನಿಮಾಟೋಗ್ರಾಫ್ ಕಾಯ್ದೆ, 1952 ರ ಸೆಕ್ಷನ್ 3 ರ ಸಬ್-ಸೆಕ್ಷನ್ (1) ರ ಅಡಿಯಲ್ಲಿ ನೀಡಲಾದ ಅಧಿಕಾರವನ್ನು ಚಲಾಯಿಸಿ, ಸಿನಿಮಾಟೋಗ್ರಾಫ್ (ಪ್ರಮಾಣೀಕರಣ) ನಿಯಮಗಳು, 2024 ರ ರೂಲ್ 3 ರೊಂದಿಗೆ ಓದಿಕೊಂಡು ಕೇಂದ್ರ ಸರ್ಕಾರವು ಈ ಪುನರ್ರಚನೆಯನ್ನು ಕೈಗೊಂಡಿದೆ.

ನೂತನವಾಗಿ ನೇಮಕಗೊಂಡ ಈ ಮಂಡಳಿಯ ಅಧಿಕಾರಾವಧಿಯು ತಕ್ಷಣದಿಂದ ಜಾರಿಗೆ ಬರುವಂತೆ ಮುಂದಿನ ಮೂರು ವರ್ಷಗಳ ಅವಧಿಗೆ ಅಥವಾ ಮುಂದಿನ ಆದೇಶದವರೆಗೆ ಜಾರಿಯಲ್ಲಿರುತ್ತದೆ. ಚಲನಚಿತ್ರಗಳ ಪ್ರಮಾಣೀಕರಣ ವ್ಯವಸ್ಥೆಯನ್ನು ಮತ್ತಷ್ಟು ಪಾರದರ್ಶಕ ಹಾಗೂ ಪ್ರಸ್ತುತ ಕಾಲಕ್ಕೆ ತಕ್ಕಂತೆ ಸುಗಮಗೊಳಿಸುವ ನಿಟ್ಟಿನಲ್ಲಿ ಈ ಮಹತ್ವದ ಹೆಜ್ಜೆ ಇಡಲಾಗಿದೆ.

18 ಸದಸ್ಯರ ನೂತನ ಮಂಡಳಿಯ ಪೂರ್ಣ ವಿವರ

ಈ ನೂತನ CBFC ಮಂಡಳಿಯಲ್ಲಿ ದೇಶದ ವಿವಿಧ ಭಾಗಗಳ ಪ್ರಖ್ಯಾತ ಚಲನಚಿತ್ರ ವ್ಯಕ್ತಿತ್ವಗಳು ಹಾಗೂ ಸಾಂಸ್ಕೃತಿಕ ಗಣ್ಯರು ಸ್ಥಾನ ಪಡೆದಿದ್ದಾರೆ. ಸದಸ್ಯರ ವಿವರ ಇಲ್ಲಿದೆ:

1. ಶ್ರೀ ವಿನೋದ್ ಅನುಲಮ್ (Shri Vinod Anupam)
2. ಶ್ರೀ ಮನೋಜ್ ಜೋಶಿ (Shri Manoj Joshi)
3. ಶ್ರೀ ಅಭಿಷೇಕ್ ಜೈನ್ (Shri Abhishek Jain)
4. ಶ್ರೀ ರಿಕ್ಕಿ ಕೇಜ್ (Shri Ricky Kej) – ಮೂರು ಬಾರಿಯ ಗ್ರ್ಯಾಮಿ ಪ್ರಶಸ್ತಿ ವಿಜೇತ ಪ್ರಸಿದ್ಧ ಸಂಗೀತ ಸಂಯೋಜಕ.
5. ಶ್ರೀ ಪ್ರಿಯದರ್ಶನ್ (Shri Priyadarshan) – ಭಾರತೀಯ ಚಿತ್ರರಂಗದ ದೈತ್ಯ ನಿರ್ದೇಶಕ.
6. ಶ್ರೀ ಸುನಿಲ್ ಶೆಟ್ಟಿ (Shri Suniel Shetty) – ಬಾಲಿವುಡ್‌ನ ಹಿರಿಯ ನಟ.
7. ಶ್ರೀ ಹಂಸರಾಜ್ ಹಂಸ್ (Shri Hansraj Hans) – ಪ್ರಸಿದ್ಧ ಗಾಯಕ ಹಾಗೂ ರಾಜಕಾರಣಿ.
8. ಶ್ರೀಮತಿ ಸುಪ್ರಿಯಾ ಯಾರ್ಲಗಡ್ಡ (Ms. Supriya Yarlagadda) – ತೆಲುಗು ಚಿತ್ರರಂಗದ ನಿರ್ಮಾಪಕಿ ಹಾಗೂ ನಟಿ.
9. ಶ್ರೀ ಯತೀಂದ್ರ ಮಿಶ್ರಾ (Shri Yatindra Mishra)
10. ಶ್ರೀಮತಿ ರೂಪಾಲಿ ಗಂಗೂಲಿ (Ms. Roopali Ganguly) – ಜನಪ್ರಿಯ ಕಿರುತೆರೆ ಹಾಗೂ ಬೆಳ್ಳಿಪರದೆಯ ನಟಿ.
11. ಶ್ರೀಮತಿ ಪ್ರೀತಿ ಜಿಂಟಾ (Ms. Preity Zinta) – ಬಾಲಿವುಡ್‌ನ ಖ್ಯಾತ ನಟಿ.
12. ಶ್ರೀ ನೀಲ ಮಾಧಬ್ ಪಂಡಾ (Shri Neela Madhab Panda) – ರಾಷ್ಟ್ರ ಪ್ರಶಸ್ತಿ ವಿಜೇತ ಚಲನಚಿತ್ರ ನಿರ್ಮಾಪಕ.
13. ಶ್ರೀ ಪಂಕಜ್ ತ್ರಿಪಾಠಿ (Shri Pankaj Tripathi) – ಬಹುವಿಧ ಅಭಿನಯ ಸಾಮರ್ಥ್ಯವುಳ್ಳ ಪ್ರತಿಭಾವಂತ ನಟ.
14. ಶ್ರೀ ಪ್ರಸೇನ್‌ಜಿತ್ ಚಟರ್ಜಿ (Shri Prosenjit Chatterjee) – ಬೆಂಗಾಲಿ ಚಿತ್ರರಂಗದ ಸೂಪರ್‌ಸ್ಟಾರ್.
15. ಶ್ರೀಮತಿ ಪಲ್ಲವಿ ಜೋಶಿ (Ms. Pallavi Joshi) – ರಾಷ್ಟ್ರ ಪ್ರಶಸ್ತಿ ವಿಜೇತ ನಟಿ.
16. ಶ್ರೀಮತಿ ನಿಶಿಗಂಧ ವಾಡ್ (Ms. Nishigandha Wad)
17. ಶ್ರೀ ವಾಮನ್ ಕೇಂದ್ರೆ (Shri Waman Kendre)
18. ಶ್ರೀ ರಮೇಶ್ ಪತಂಗೆ (Shri Ramesh Patange)

ಚಲನಚಿತ್ರ ರಂಗದ ಮೇಲೆ ಇದರ ಪ್ರಭಾವ

ಈ ಪುನರ್ರಚನೆಯು ಭಾರತೀಯ ಚಿತ್ರರಂಗದಲ್ಲಿ ಹೊಸ ಸಂಚಲನಕ್ಕೆ ಕಾರಣವಾಗಿದೆ. ಈ ಹಿಂದೆ ಸಿಬಿಎಫ್‌ಸಿ ಮಂಡಳಿಗಳು ಕೇವಲ ಸೆನ್ಸಾರ್‌ಶಿಪ್‌ಗೆ ಸೀಮಿತವಾಗಿದ್ದವು ಎಂಬ ಆರೋಪಗಳಿದ್ದವು. ಆದರೆ, ಈ ಬಾರಿ ಕಲಾತ್ಮಕ ಹಾಗೂ ವಾಣಿಜ್ಯತ್ಮಕ ಸಿನಿಮಾಗಳ ಬಗ್ಗೆ ಆಳವಾದ ಜ್ಞಾನವಿರುವ ನಟರು, ನಿರ್ದೇಶಕರು ಮತ್ತು ಸಂಗೀತಗಾರರನ್ನು ಒಳಗೊಂಡಿರುವುದು ಚಿತ್ರರಂಗಕ್ಕೆ ಧನಾತ್ಮಕ ಸಂದೇಶ ರವಾನಿಸಿದೆ.

ವಿಶೇಷವಾಗಿ ಬೆಂಗಳೂರು ಮೂಲದ ಮೂರು ಬಾರಿಯ ಗ್ರ್ಯಾಮಿ ಪ್ರಶಸ್ತಿ ವಿಜೇತ ಸಂಗೀತಗಾರ ರಿಕ್ಕಿ ಕೇಜ್, ಹಿರಿಯ ನಿರ್ದೇಶಕ ಪ್ರಿಯದರ್ಶನ್, ನಟರಾದ ಪಂಕಜ್ ತ್ರಿಪಾಠಿ ಮತ್ತು ಪ್ರೀತಿ ಜಿಂಟಾ ಅವರಂತಹ ವೈವಿಧ್ಯಮಯ ಅನುಭವ ಹೊಂದಿರುವ ವ್ಯಕ್ತಿಗಳು ಮಂಡಳಿಯ ಭಾಗವಾಗಿರುವುದರಿಂದ, ಭಾರತೀಯ ಸಿನಿಮಾಗಳ ಸೆನ್ಸಾರ್‌ಶಿಪ್ ಹಾಗೂ ಪ್ರಮಾಣೀಕರಣ ಪ್ರಕ್ರಿಯೆಯಲ್ಲಿ ಹೊಸ ಆಯಾಮ ದೊರೆಯಲಿದೆ ಎಂದು ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ.

ಇತ್ತೀಚಿನ ಲೇಖನಕ್ಕಾಗಿ ಇಲ್ಲಿ ಕ್ಲಿಕ್ ಮಾಡಿ:

ಹಿರಿಯ ನಟ ಅನಂತ್ ನಾಗ್‌ಗೆ ಭಾರತೀಯ ಸಿನಿರಂಗದ ಅತ್ಯುನ್ನತ ‘ದಾದಾಸಾಹೇಬ್ ಫಾಲ್ಕೆ’ ಪ್ರಶಸ್ತಿ! ಸ್ಯಾಂಡಲ್‌ವುಡ್‌ಗೆ ಒಲಿದ ಮಹಾ ಗೌರವ.

ನಿಯಮ ಉಲ್ಲಂಘಿಸಿದ ಪಿವಿಆರ್, ಫೋರಂ ಮಾಲ್‌ಗೆ ₹1.25 ಲಕ್ಷ ದಂಡ – ಬೆಂಗಳೂರು ದಕ್ಷಿಣ ನಗರ ಪಾಲಿಕೆ!

ಕೋರ್ಟ್ ಅಲೆಯುವ ಕಿರಿಕಿರಿ ಇನ್ಮುಂದೆ ಬಂದ್! ಸೆಪ್ಟೆಂಬರ್ 19ಕ್ಕೆ ದಕ್ಷಿಣ ಕನ್ನಡದಲ್ಲಿ ವರ್ಷಗಳ ಕೇಸ್‌ಗಳಿಗೆ ಉಚಿತ, ಶಾಶ್ವತ ಮುಕ್ತಿ!