ಟವರ್ ಇಲ್ಲ, ಸಿಗ್ನಲ್ ಬೇಕಿಲ್ಲ! ಬಿಎಸ್ಎನ್ಎಲ್ನಿಂದ ಬಂತು ₹1.34 ಲಕ್ಷದ ಸ್ಯಾಟಲೈಟ್ ಫೋನ್: ಯಾರು ಖರೀದಿಸಬಹುದು? ಇದರ ವಿಶೇಷತೆ ಏನು?
ವರದಿಗಾರರು (Reporter)
Hemanth Rajashekar12:22 AM IST
ಗಡಿ ನಿಯಂತ್ರಣ ರೇಖೆಯ ಬಳಿ ಹಿಮದಿಂದ ಆವೃತವಾದ ಸೇನಾ ನೆಲೆಯಿರಲಿ ಅಥವಾ ಕರಾವಳಿಯಿಂದ ಮೂವತ್ತು ಕಿಲೋಮೀಟರ್ ದೂರದಲ್ಲಿರುವ ಮೀನುಗಾರಿಕಾ ದೋಣಿಯಿರಲಿ; ಇಂತಹ ಪ್ರದೇಶಗಳಲ್ಲಿ ನಮ್ಮ ಕೈಯಲ್ಲಿರುವ ಸಾಮಾನ್ಯ ಸ್ಮಾರ್ಟ್ಫೋನ್ಗಳು ಕೇವಲ ಒಂದು ತೂಕದ ವಸ್ತುವಷ್ಟೇ. ಅಲ್ಲಿ ಯಾವುದೇ ನೆಟ್ವರ್ಕ್ ಸಿಗುವುದಿಲ್ಲ. ಇದೀಗ ಇದೇ ಸಮಸ್ಯೆಗೆ ಸರ್ಕಾರಿ ಸ್ವಾಮ್ಯದ ದೂರಸಂಪರ್ಕ ಸಂಸ್ಥೆ ಬಿಎಸ್ಎನ್ಎಲ್ (BSNL) ಒಂದು ಶಾಶ್ವತ ಪರಿಹಾರ ಕಂಡುಕೊಂಡಿದೆ. ಸಾಮಾನ್ಯ ಮೊಬೈಲ್ ಟವರ್ಗಳೇ ಇಲ್ಲದ ದುರ್ಗಮ ಪ್ರದೇಶಗಳಲ್ಲೂ ತಡೆರಹಿತ ಸಂಪರ್ಕ ಕಲ್ಪಿಸುವ ವಿಶೇಷ ಸ್ಯಾಟಲೈಟ್ ಫೋನ್ ಸೇವೆಯನ್ನು ಬಿಎಸ್ಎನ್ಎಲ್ ದೇಶದಾದ್ಯಂತ ವಿಸ್ತರಿಸುತ್ತಿದೆ.
1,34,166 ರೂಪಾಯಿಯ ಫೋನ್! ಇದರ ಹಿಂದಿರುವ ಅಸಲಿ ಕಥೆ ಏನು?
ಈ ಫೋನಿನ ಬೆಲೆ ಕೇಳಿದ ತಕ್ಷಣ ಬಹುತೇಕರು ಆಶ್ಚರ್ಯ ಪಡುವುದು ಸಹಜ. ಏಕೆಂದರೆ ಈ ಮೊತ್ತದಲ್ಲಿ ಒಂದು ಅತ್ಯುತ್ತಮ ಬೈಕ್ ಅಥವಾ ಕಾರಿನ ಡೌನ್ ಪೇಮೆಂಟ್ ಮಾಡಬಹುದು. ಆದರೆ ಇಲ್ಲಿ ನೆನಪಿನಲ್ಲಿಡಬೇಕಾದ ಅಂಶವೆಂದರೆ, ಕೇವಲ ಫೋನಿನ ಹ್ಯಾಂಡ್ಸೆಟ್ ಬೆಲೆ ಮಾತ್ರ ಇಷ್ಟೊಂದು ದುಬಾರಿಯಲ್ಲ. ಫೋನಿನ ಹ್ಯಾಂಡ್ಸೆಟ್ ದರ ಸುಮಾರು 70,000 ರೂ.ನಿಂದ 82,000 ರೂ. ಆಸುಪಾಸಿನಲ್ಲಿದೆ. ವಿಶೇಷ ತಂತ್ರಜ್ಞಾನದ ಹಾರ್ಡ್ವೇರ್ಗೆ ಈ ಬೆಲೆ ಸಾಮಾನ್ಯ.
ಆದರೆ, ಇದರೊಂದಿಗೆ ಸೇರಿಕೊಳ್ಳುವ ಸ್ಪೆಕ್ಟ್ರಮ್ ಶುಲ್ಕಗಳು, ಪರವಾನಗಿ ವೆಚ್ಚಗಳು (Licensing Costs) ಮತ್ತು ಈ ಸೇವೆಗೆ ಅಗತ್ಯವಿರುವ ಕಡ್ಡಾಯ ಸೆಟಪ್ ಪ್ಲಾನ್ಗಳು ಒಟ್ಟಾರೆ ಮೊತ್ತವನ್ನು 1.34 ಲಕ್ಷ ರೂಪಾಯಿಯ ಗಡಿ ದಾಟುವಂತೆ ಮಾಡುತ್ತವೆ.
ಸಿಗ್ನಲ್ ಇಲ್ಲದಿದ್ದರೂ ಇದು ಹೇಗೆ ಕೆಲಸ ಮಾಡುತ್ತದೆ?
ಸಾಮಾನ್ಯ ಮೊಬೈಲ್ ಫೋನ್ಗಳು ಕಾರ್ಯನಿರ್ವಹಿಸಲು ಹತ್ತಿರದ ಮೊಬೈಲ್ ಟವರ್ಗಳ ಅಗತ್ಯವಿರುತ್ತದೆ. ಚಂಡಮಾರುತ, ಪ್ರವಾಹ ಅಥವಾ ಭೂಕಂಪದಂತಹ ನೈಸರ್ಗಿಕ ವಿಕೋಪಗಳ ಸಮಯದಲ್ಲಿ ಈ ಟವರ್ಗಳು ಧರಾಶಾಹಿಯಾಗುತ್ತವೆ ಅಥವಾ ವಿದ್ಯುತ್ ಸಂಪರ್ಕ ಕಡಿತಗೊಂಡು ನೆಟ್ವರ್ಕ್ ಸ್ಥಗಿತಗೊಳ್ಳುತ್ತದೆ.
ಆದರೆ ಬಿಎಸ್ಎನ್ಎಲ್ನ ಈ ಸ್ಯಾಟಲೈಟ್ ಫೋನ್ ಜಾಗತಿಕ ಸ್ಯಾಟಲೈಟ್ ಆಪರೇಟರ್ ಆದ ‘ಇನ್ಮಾರ್ಸ್ಯಾಟ್’ (Inmarsat) ಸಹಯೋಗದೊಂದಿಗೆ ಕೆಲಸ ಮಾಡುತ್ತದೆ. ಇನ್ಮಾರ್ಸ್ಯಾಟ್ನ ನಾಲ್ಕನೇ ತಲೆಮಾರಿನ ಉಪಗ್ರಹಗಳು ‘ಎಲ್-ಬ್ಯಾಂಡ್’ (L-band) ತರಂಗಾಂತರದಲ್ಲಿ ಕಾರ್ಯನಿರ್ವಹಿಸುತ್ತವೆ. ಈ ಎಲ್-ಬ್ಯಾಂಡ್ ತಂತ್ರಜ್ಞಾನದ ವೈಶಿಷ್ಟ್ಯವೆಂದರೆ, ಇದು ಎಂತಹ ಭೀಕರ ಹವಾಮಾನದಲ್ಲೂ ಸಿಗ್ನಲ್ ಕಳೆದುಕೊಳ್ಳುವುದಿಲ್ಲ. ಚಂಡಮಾರುತದ ಭೀಕರ ಗಾಳಿ ಅಥವಾ ಮಳೆ ಸುರಿಯುತ್ತಿದ್ದರೂ ಭೂಮಿಯಿಂದ ಸಾವಿರಾರು ಕಿಲೋಮೀಟರ್ ಎತ್ತರದಲ್ಲಿರುವ ಉಪಗ್ರಹದ ಮೂಲಕ ನೇರವಾಗಿ ಸಿಗ್ನಲ್ ಪಡೆಯುತ್ತದೆ. ಹೀಗಾಗಿ ನೆಲದ ಮೇಲಿನ ವಿದ್ಯುತ್ ಸಂಪರ್ಕ ಕಡಿತಗೊಂಡರೂ ಈ ಫೋನಿನ ಸಂಪರ್ಕಕ್ಕೆ ಯಾವುದೇ ಧಕ್ಕೆಯಾಗುವುದಿಲ್ಲ.
ಈ ಫೋನ್ ಯಾರಿಗೆ ಉಪಯುಕ್ತ? ಯಾರು ಖರೀದಿಸಬಹುದು?
ಈ ಸ್ಯಾಟಲೈಟ್ ಫೋನ್ ಸಾಮಾನ್ಯ ನಾಗರಿಕರು ನಿತ್ಯ ಬಳಸುವ ಸ್ಮಾರ್ಟ್ಫೋನ್ ಅಲ್ಲ. ಇದು ತುರ್ತು ಪರಿಸ್ಥಿತಿಗಳಲ್ಲಿ ಮತ್ತು ದೇಶದ ಭದ್ರತೆಯ ದೃಷ್ಟಿಯಿಂದ ಅತ್ಯಂತ ನಿರ್ಣಾಯಕ ಪಾತ್ರ ವಹಿಸುತ್ತದೆ.
- ರಕ್ಷಣಾ ಪಡೆಗಳು ಮತ್ತು ಸೇನೆ: ಗಡಿ ಪ್ರದೇಶಗಳಲ್ಲಿ ಮತ್ತು ನೆಟ್ವರ್ಕ್ ಇಲ್ಲದ ದುರ್ಗಮ ಬೆಟ್ಟಗಳಲ್ಲಿ ಕರ್ತವ್ಯ ನಿರ್ವಹಿಸುವ ಯೋಧರಿಗೆ ಇದು ಜೀವನಾಡಿ.
- ವಿಪತ್ತು ನಿರ್ವಹಣಾ ತಂಡಗಳು (NDRF): ಪ್ರವಾಹ, ಭೂಕಂಪ ಅಥವಾ ಚಂಡಮಾರುತದ ಸಂದರ್ಭದಲ್ಲಿ ರಕ್ಷಣಾ ಕಾರ್ಯಾಚರಣೆ ನಡೆಸಲು ಈ ಫೋನ್ ಅತ್ಯಗತ್ಯ.
- ಕಡಲ ಯಾನ ಮತ್ತು ಮೀನುಗಾರರು: ಆಳ ಸಮುದ್ರದಲ್ಲಿ ಸಂಚರಿಸುವ ದೊಡ್ಡ ಹಡಗುಗಳು ಮತ್ತು ಮೀನುಗಾರಿಕಾ ದೋಣಿಗಳಿಗೆ ತಟದೊಂದಿಗೆ ಸಂಪರ್ಕದಲ್ಲಿರಲು ಇದು ನೆರವಾಗುತ್ತದೆ.
- ಸರ್ಕಾರಿ ಸಂಸ್ಥೆಗಳು ಮತ್ತು ತೈಲ ಕಂಪನಿಗಳು: ಜನವಸತಿ ಇಲ್ಲದ ಕಾಡುಗಳು ಅಥವಾ ಗಣಿಗಾರಿಕೆ ಪ್ರದೇಶಗಳಲ್ಲಿ ಕೆಲಸ ಮಾಡುವ ಸಿಬ್ಬಂದಿಗೆ ಇದು ಉಪಯುಕ್ತವಾಗಿದೆ.
ಭಾರತದಲ್ಲಿ ಸುರಕ್ಷತೆಯ ಕಾರಣಗಳಿಗಾಗಿ ಸ್ಯಾಟಲೈಟ್ ಫೋನ್ ಬಳಕೆಗೆ ಕಠಿಣ ನಿಯಮಗಳಿವೆ. ಬಿಎಸ್ಎನ್ಎಲ್ ಒದಗಿಸುವ ಈ ಗ್ಲೋಬಲ್ ಸ್ಯಾಟಲೈಟ್ ಫೋನ್ ಸರ್ವಿಸ್ (GSPS) ಅನ್ನು ಸರ್ಕಾರದ ಅಗತ್ಯ ಅನುಮತಿ ಮತ್ತು ಸೂಕ್ತ ದಾಖಲೆಗಳನ್ನು ಒದಗಿಸುವ ಮೂಲಕ ಅಧಿಕೃತವಾಗಿ ಪಡೆದುಕೊಳ್ಳಬಹುದಾಗಿದೆ. ದುರ್ಗಮ ಹಾದಿಯಲ್ಲಿ ಸಾಗುವವರಿಗೆ ಮತ್ತು ತುರ್ತು ಪರಿಸ್ಥಿತಿಯಲ್ಲಿ ದೇಶದ ರಕ್ಷಣೆಗೆ ನಿಲ್ಲುವವರಿಗೆ ಈ ಫೋನ್ ಕೇವಲ ಒಂದು ಸಾಧನವಲ್ಲ, ಅದೊಂದು ಜೀವ ರಕ್ಷಕ ಕವಚ.
ಇತ್ತೀಚಿನ ಲೇಖನಕ್ಕಾಗಿ ಇಲ್ಲಿ ಕ್ಲಿಕ್ ಮಾಡಿ: