ಸ್ವಿಗ್ಗಿ-ಝೊಮ್ಯಾಟೋಗೆ ಬಿಗ್ ಶಾಕ್: ಆಗಸ್ಟ್ 15 ರಿಂದ ಬೆಂಗಳೂರಿನ ಸಾವಿರಾರು ಹೋಟೆಲ್‌ಗಳಿಂದ ಆನ್‌ಲೈನ್ ಫುಡ್ ಡೆಲಿವರಿ ಬಂದ್?

ಐಟಿ ನಗರಿ ಬೆಂಗಳೂರಿನ ಆನ್‌ಲೈನ್ ಫುಡ್ ಡೆಲಿವರಿ ವ್ಯವಸ್ಥೆಯಲ್ಲಿ ಬೃಹತ್ ಸಂಚಲನ ಸೃಷ್ಟಿಯಾಗಿದೆ. ಖ್ಯಾತ ಆಹಾರ ಡೆಲಿವರಿ ಆ್ಯಪ್‌ಗಳಾದ ಸ್ವಿಗ್ಗಿ (Swiggy) ಮತ್ತು ಝೊಮ್ಯಾಟೋ (Zomato) ಸಂಸ್ಥೆಗಳ ವಿರುದ್ಧ ನಗರದ ಸಾವಿರಾರು ಹೋಟೆಲ್ ಹಾಗೂ ರೆಸ್ಟೋರೆಂಟ್ ಮಾಲೀಕರು ಸಿಡಿದೆದ್ದಿದ್ದಾರೆ. ತಮ್ಮ ನ್ಯಾಯಯುತ ಬೇಡಿಕೆಗಳನ್ನು ಈಡೇರಿಸದಿದ್ದರೆ ಮುಂಬರುವ ಆಗಸ್ಟ್ 15 ರಿಂದ ಈ ಎರಡೂ ಆ್ಯಪ್‌ಗಳಿಂದ ಸಂಪೂರ್ಣವಾಗಿ ಹೊರಬರುವುದಾಗಿ ಹೋಟೆಲ್ ಸಂಘಟನೆಗಳು ಕಟ್ಟುನಿಟ್ಟಿನ ಎಚ್ಚರಿಕೆ ನೀಡಿವೆ.

ಈ ನಿರ್ಧಾರದಿಂದಾಗಿ ಸ್ವಾತಂತ್ರ್ಯ ದಿನಾಚರಣೆಯ ನಂತರ ಬೆಂಗಳೂರಿನ ಗ್ರಾಹಕರಿಗೆ ಆನ್‌ಲೈನ್ ಮೂಲಕ ನೆಚ್ಚಿನ ಹೋಟೆಲ್‌ನಿಂದ ಆಹಾರ ತರಿಸಿಕೊಳ್ಳುವುದು ಕಷ್ಟವಾಗುವ ಸಾಧ್ಯತೆ ದಟ್ಟವಾಗಿದೆ.

ಹೋಟೆಲ್ ಮಾಲೀಕರ ಆಕ್ರೋಶಕ್ಕೆ ಮುಖ್ಯ ಕಾರಣಗಳೇನು?

ಬೃಹತ್ ಬೆಂಗಳೂರು ಹೋಟೆಲ್‌ಗಳ ಸಂಘ (BBHA), ಬೆಂಗಳೂರು ಹೋಟೆಲ್ ಅಸೋಸಿಯೇಷನ್ ಹಾಗೂ ಕರ್ನಾಟಕ ಹೋಟೆಲ್ ಅಸೋಸಿಯೇಷನ್ ಸಂಸ್ಥೆಗಳು ಜಂಟಿಯಾಗಿ ಈ ನಿರ್ಧಾರ ಕೈಗೊಂಡಿವೆ. ಹೋಟೆಲ್ ಮಾಲೀಕರ ಪ್ರಕಾರ, ಡೆಲಿವರಿ ಸಂಸ್ಥೆಗಳ ನೀತಿಗಳು ಸಣ್ಣ ಮತ್ತು ಮಧ್ಯಮ ಹೋಟೆಲ್‌ಗಳ ಶೇಕಡಾ 100 ರಷ್ಟು ಲಾಭವನ್ನು ನುಂಗಿಹಾಕುತ್ತಿವೆ.

• ಅತಿಯಾದ ಕಮಿಷನ್ ದರ: ಡೆಲಿವರಿ ಆ್ಯಪ್‌ಗಳು ಪ್ರತಿ ಆರ್ಡರ್ ಮೇಲೆ ಶೇಕಡಾ 8 ರಿಂದ ಶೇಕಡಾ 28 ರವರೆಗೆ ಭಾರಿ ಕಮಿಷನ್ ವಿಧಿಸುತ್ತಿವೆ.
• ಬಲವಂತದ ರಿಯಾಯಿತಿ ಮತ್ತು ಪ್ರಚಾರ ಶುಲ್ಕ: ಮಾಲೀಕರ ಒಪ್ಪಿಗೆಯಿಲ್ಲದೆ ಆ್ಯಪ್‌ಗಳೇ ಗ್ರಾಹಕರಿಗೆ ಡಿಸ್ಕೌಂಟ್ ಘೋಷಿಸಿ, ಆ ಹೊರೆಯನ್ನು ಹೋಟೆಲ್‌ಗಳ ಮೇಲೆ ಹೇರುತ್ತಿವೆ. ಜೊತೆಗೆ ಜಾಹೀರಾತು ಶುಲ್ಕ (CPC/CPA) ಹೆಸರಿನಲ್ಲಿ ಹಣ ಕಡಿತಗೊಳಿಸಲಾಗುತ್ತಿದೆ.
• ಏಕಪಕ್ಷೀಯ ಪಾವತಿ ಕಡಿತ: ಗ್ರಾಹಕರು ದೂರು ನೀಡಿದ ತಕ್ಷಣವೇ ಯಾವುದೇ ತನಿಖೆ ನಡೆಸದೆ ಹೋಟೆಲ್‌ಗಳಿಗೆ ಸೇರಬೇಕಾದ ಹಣವನ್ನು ಸ್ವಯಂಚಾಲಿತವಾಗಿ ಕಡಿತಗೊಳಿಸಲಾಗುತ್ತಿದೆ.
• ಗ್ರಾಹಕರ ಮೇಲೆಯೂ ಹೆಚ್ಚುತ್ತಿರುವ ಹೊರೆ: ಕಮಿಷನ್ ನಷ್ಟ ತುಂಬಿಕೊಳ್ಳಲು ಹೋಟೆಲ್‌ಗಳು ಆ್ಯಪ್‌ಗಳಲ್ಲಿ ಆಹಾರದ ಬೆಲೆಯನ್ನು ಶೇಕಡಾ 30 ರಿಂದ 40 ಕ್ಕಿಂತ ಹೆಚ್ಚು ಏರಿಸಬೇಕಾದ ಅನಿವಾರ್ಯತೆ ಎದುರಾಗಿದೆ. ಇದರಿಂದ ಗ್ರಾಹಕರಿಗೂ ಭಾರಿ ಬೆಲೆ ಏರಿಕೆಯ ಬಿಸಿ ತಟ್ಟುತ್ತಿದೆ.

ಪಿ.ಸಿ. ರಾವ್ ಮತ್ತು ಅಸೋಸಿಯೇಷನ್ ಅಧ್ಯಕ್ಷರ ಸ್ಪಷ್ಟನೆ

ಬೆಂಗಳೂರು ಹೋಟೆಲ್ ಅಸೋಸಿಯೇಷನ್‌ನ ಗೌರವಾಧ್ಯಕ್ಷ ಪಿ.ಸಿ. ರಾವ್ (P.C. Rao) ಈ ಕುರಿತು ಆತಂಕ ವ್ಯಕ್ತಪಡಿಸಿದ್ದಾರೆ.

“ನಾವು ಕಳೆದ 10 ತಿಂಗಳುಗಳಿಂದ ಸ್ವಿಗ್ಗಿ ಮತ್ತು ಝೊಮ್ಯಾಟೋ ಸಂಸ್ಥೆಗಳೊಂದಿಗೆ ಸಾಲು ಸಾಲು ಸಭೆಗಳನ್ನು ನಡೆಸಿದ್ದೇವೆ. ಅವರು ಭರವಸೆ ನೀಡುತ್ತಿದ್ದಾರೆಯೇ ಹೊರತು ಯಾವುದೇ ಕ್ರಮ ಕೈಗೊಂಡಿಲ್ಲ. 1 ಲಕ್ಷ ರೂಪಾಯಿ ಆರ್ಡರ್ ಪಡೆಯುವ ಹೋಟೆಲ್‌ಗೆ ಎಲ್ಲಾ ಕಮಿಷನ್, ಕಡಿತ ಮತ್ತು ಜಾಹೀರಾತು ವೆಚ್ಚ ಕಳೆದ ನಂತರ ಕೈಗೆ ಸಿಗುವುದು ಕೇವಲ 40,000 ರೂಪಾಯಿ ಮಾತ್ರ! ಇಂತಹ ಪರಿಸ್ಥಿತಿಯಲ್ಲಿ ವ್ಯಾಪಾರ ನಡೆಸುವುದು ಸಾಧ್ಯವೇ ಇಲ್ಲ,” ಎಂದು ಪಿ.ಸಿ. ರಾವ್ ಖಾರವಾಗಿ ಪ್ರಶ್ನಿಸಿದ್ದಾರೆ.

ಬೃಹತ್ ಬೆಂಗಳೂರು ಹೋಟೆಲ್‌ಗಳ ಸಂಘದ (BBHA) ಅಧ್ಯಕ್ಷ ಎಸ್. ಸುಬ್ರಹ್ಮಣ್ಯ ಹೊಳ್ಳ ಅವರು ಮಾತನಾಡಿ, “ಹೋಟೆಲ್‌ಗಳಿಗೆ ತಮ್ಮದೇ ಆದ ನಿರ್ದಿಷ್ಟ ವೆಚ್ಚಗಳಿರುತ್ತವೆ. ಆ್ಯಪ್‌ಗಳ ಭಾರಿ ಕಮಿಷನ್‌ನಿಂದಾಗಿ ಆಹಾರದ ಗುಣಮಟ್ಟ ಕಾಪಾಡುವುದು ಸವಾಲಾಗಿದೆ. ಆಗಸ್ಟ್ 15 ರೊಳಗೆ ಈ ಸಂಸ್ಥೆಗಳು ಲಿಖಿತ ರೂಪದಲ್ಲಿ ಸೂಕ್ತ ಪರಿಹಾರ ನೀಡದಿದ್ದರೆ, ನಗರದ 1,000ಕ್ಕೂ ಹೆಚ್ಚು ಪ್ರಮುಖ ಹೋಟೆಲ್‌ಗಳು ಈ ಆ್ಯಪ್‌ಗಳಿಂದ ಸಂಪೂರ್ಣವಾಗಿ ಹೊರಬರಲಿವೆ,” ಎಂದು ಸ್ಪಷ್ಟಪಡಿಸಿದ್ದಾರೆ.

2019ರ “ಲೋಗ್-ಔಟ್” ಚಳವಳಿ ಮತ್ತು 2022ರ CCI ತನಿಖೆಯ ನೆನಪು

ಆಹಾರ ಡೆಲಿವರಿ ಆ್ಯಪ್‌ಗಳು ಹಾಗೂ ಹೋಟೆಲ್ ಮಾಲೀಕರ ನಡುವಿನ ಈ ಸಂಘರ್ಷ ಹೊಸದೇನಲ್ಲ.

• 2019ರ ಲಾಗ್-ಔಟ್ ಅಭಿಯಾನ (Log-Out Campaign): ‘Zomato Gold’ ಮತ್ತು ಇತರ ಡಿಸ್ಕೌಂಟ್ ಕಾರ್ಯಕ್ರಮಗಳ ವಿರುದ್ಧ ದೇಶಾದ್ಯಂತ ಸಾವಿರಾರು ರೆಸ್ಟೋರೆಂಟ್‌ಗಳು ತಮ್ಮ ಸೇವೆ ಹಿಂಪಡೆದು ಬೃಹತ್ ಪ್ರತಿಭಟನೆ ನಡೆಸಿದ್ದವು.
• 2022ರ CCI ತನಿಖೆ: ರಾಷ್ಟ್ರೀಯ ರೆಸ್ಟೋರೆಂಟ್ ಅಸೋಸಿಯೇಷನ್ ಆಫ್ ಇಂಡಿಯಾ (NRAI) ನೀಡಿದ ದೂರಿನ ಮೇರೆಗೆ ಭಾರತೀಯ ಸ್ಪರ್ಧಾತ್ಮಕ ಆಯೋಗವು (CCI) ಸ್ವಿಗ್ಗಿ ಮತ್ತು ಝೊಮ್ಯಾಟೋ ವಿರುದ್ಧ ಮಾರುಕಟ್ಟೆ ಪ್ರಾಬಲ್ಯದ ದುರ್ಬಳಕೆ ಹಾಗೂ ಅಸಮಾನ ಒಪ್ಪಂದಗಳ ಕುರಿತು ತನಿಖೆಗೆ ಆದೇಶಿಸಿತ್ತು.

ಈಗ ಬೆಂಗಳೂರಿನಲ್ಲಿ ಆರಂಭವಾಗಿರುವ ಪ್ರತಿಭಟನೆ, ಹಳೆಯ ಸಂಘರ್ಷ ಮತ್ತೆ ತೀವ್ರ ಸ್ವರೂಪ ಪಡೆದುಕೊಂಡಿರುವುದಕ್ಕೆ ಸಾಕ್ಷಿಯಾಗಿದೆ.

ಸ್ವಿಗ್ಗಿ ಮತ್ತು ಝೊಮ್ಯಾಟೋ ಸಂಸ್ಥೆಗಳ ಪ್ರತಿಕ್ರಿಯೆ ಏನು?

ಹೋಟೆಲ್ ಅಸೋಸಿಯೇಷನ್‌ಗಳು ಆಗಸ್ಟ್ 15 ರ ಗಡುವು ನೀಡಿದ್ದರೂ, ಸ್ವಿಗ್ಗಿ ಮತ್ತು ಝೊಮ್ಯಾಟೋ ಸಂಸ್ಥೆಗಳು ಈವರೆಗೆ ಯಾವುದೇ ಅಧಿಕೃತ ಸಾರ್ವಜನಿಕ ಹೇಳಿಕೆ ಅಥವಾ ಲಿಖಿತ ಪರಿಹಾರವನ್ನು ಬಿಡುಗಡೆ ಮಾಡಿಲ್ಲ. ಆದರೆ, ಸಂಘಟನೆಯ ಪ್ರತಿನಿಧಿಗಳೊಂದಿಗೆ ಮಾತುಕತೆ ನಡೆಸಿ ಸಮಸ್ಯೆಯನ್ನು ಇತ್ಯರ್ಥಪಡಿಸಿಕೊಳ್ಳಲು ಪ್ರಯತ್ನಿಸುತ್ತಿವೆ ಎಂದು ವರದಿಯಾಗಿದೆ.

ಮಾರುಕಟ್ಟೆಗೆ ಕಾಲಿಡುತ್ತಿರುವ ಹೊಸ ಪರ್ಯಾಯಗಳು

ಸ್ವಿಗ್ಗಿ ಮತ್ತು ಝೊಮ್ಯಾಟೋ ಕಂಪನಿಗಳ ಈ ಏಕಸ್ವಾಮ್ಯ ಹಾಗೂ ಭಾರಿ ಕಮಿಷನ್‌ಗೆ ಪರ್ಯಾಯವಾಗಿ ರ್‍ಯಾಪಿಡೋ ಬೆಂಬಲಿತ ‘ಓನ್ಲಿ’ (Ownly), ಒಎನ್‌ಡಿಸಿ (ONDC – Open Network for Digital Commerce) ಹಾಗೂ ಶೀಘ್ರದಲ್ಲೇ ಆರಂಭವಾಗಲಿರುವ ಫ್ಲಿಪ್‌ಕಾರ್ಟ್ ಫುಡ್ ಡೆಲಿವರಿ ಸೇವೆಗಳು ಹೋಟೆಲ್ ಮಾಲೀಕರಿಗೆ ಹೊಸ ಭರವಸೆ ಮೂಡಿಸಿವೆ. ಇವು ಶೂನ್ಯ ಅಥವಾ ಅತ್ಯಂತ ಕಡಿಮೆ ಕಮಿಷನ್ ಮಾದರಿಯಲ್ಲಿ ಕಾರ್ಯನಿರ್ವಹಿಸುತ್ತಿರುವುದರಿಂದ ಹೋಟೆಲ್ ಮಾಲೀಕರು ಇವುಗಳತ್ತ ಗಮನಹರಿಸುತ್ತಿದ್ದಾರೆ.

ಇತ್ತೀಚಿನ ಲೇಖನಕ್ಕಾಗಿ ಇಲ್ಲಿ ಕ್ಲಿಕ್ ಮಾಡಿ:

ಕರ್ತವ್ಯದ ವೇಳೆಯಲ್ಲೇ ಎಣ್ಣೆ ಪಾರ್ಟಿ: ಬೆಂಗಳೂರು ಗ್ರಾಮಾಂತರದ 6 PDOಗಳು ಅಮಾನತು!