ಚುನಾವಣಾ ಆಯೋಗದ ವಿರುದ್ಧ ಆಕ್ರೋಶ: ಬೆಂಗಳೂರಿನಲ್ಲಿ ‘ಪ್ರಜಾಪ್ರಭುತ್ವದ ಶ್ರಾದ್ಧ’ ಆಚರಿಸಿ ನಾಗರಿಕರ ಪ್ರತಿಭಟನೆ.

ಬೆಂಗಳೂರು: ರಾಜಧಾನಿ ಬೆಂಗಳುರಿನ ಶೇಷಾದ್ರಿ ರಸ್ತೆಯಲ್ಲಿರುವ ರಾಜ್ಯ ಮುಖ್ಯ ಚುನಾವಣಾಧಿಕಾರಿಗಳ ಕಚೇರಿ (CEO) ಮುಂಭಾಗದಲ್ಲಿ ರವಿವಾರ ಮುಂಜಾನೆ ಒಂದು ಅಪರೂಪದ ಹಾಗೂ ಕಳವಳಕಾರಿ ಘಟನೆಗೆ ಸಾಕ್ಷಿಯಾಯಿತು. ತಮ್ಮ ದೇಶದ ಸಂವಿಧಾನ ಮತ್ತು ಪ್ರಜಾಸತ್ತಾತ್ಮಕ ಮೌಲ್ಯಗಳ ಕುಸಿತವನ್ನು ಖಂಡಿಸಿ ಜಾಗೃತ ನಾಗರಿಕರ ಗುಂಪೊಂದು ಸಾಂಕೇತಿಕವಾಗಿ “ಪ್ರಜಾಪ್ರಭುತ್ವದ ಸಾವು” ಎಂದು ಘೋಷಿಸಿ ಬೃಹತ್ ಪ್ರತಿಭಟನೆ ನಡೆಸಿತು. ಸ್ವತಂತ್ರ ಹಾಗೂ ಸಂವಿಧಾನಾತ್ಮಕ ಸಂಸ್ಥೆಗಳ ಮೇಲಾಗುತ್ತಿರುವ ಆಕ್ರಮಣ ಮತ್ತು ಪಾರದರ್ಶಕತೆಯ ಕೊರತೆಯನ್ನು ಪ್ರಶ್ನಿಸಿ ಈ ಸೈಲೆಂಟ್ ಮತ್ತು ಶಕ್ತಿಯುತ ಧರಣಿ ನಡೆಯಿತು.

ಕೈಯಲ್ಲಿ “DEATH OF DEMOCRACY” (ಪ್ರಜಾಪ್ರಭುತ್ವದ ಸಾವು) ಎಂಬ ದೊಡ್ಡ ಬ್ಯಾನರ್ ಹಿಡಿದಿದ್ದ ಪ್ರತಿಭಟನಾಕಾರರು, ಪ್ರಜಾಪ್ರಭುತ್ವದ ಉಳಿವಿಗಾಗಿ ಸಂವಿಧಾನಾತ್ಮಕ ಸಂಸ್ಥೆಗಳು ತಕ್ಷಣವೇ ಉತ್ತರದಾಯಿತ್ವ ವಹಿಸಬೇಕು ಎಂದು ಆಗ್ರಹಿಸಿದರು. ಯಾವುದೇ ರಾಜಕೀಯ ಪಕ್ಷದ ಬ್ಯಾನರ್ ಅಥವಾ ಧಾರ್ಮಿಕ ಗುರುತುಗಳಿಲ್ಲದೆ, ಕೇವಲ ದೇಶದ ಜಾಗೃತ ನಾಗರಿಕರಾಗಿ ಬಂದಿದ್ದ ಈ ಪ್ರತಿಭಟನಾಕಾರರು ತಮ್ಮ ಆಕ್ರೋಶವನ್ನು ವ್ಯಕ್ತಪಡಿಸಿದರು.

ಸಾಂಕೇತಿಕ ಶ್ರಾದ್ಧ ಮತ್ತು ಶುದ್ಧೀಕರಣದ ಕಲ್ಪನೆ

ಮಾಧ್ಯಮಗಳೊಂದಿಗೆ ಮಾತನಾಡಿದ ಪ್ರತಿಭಟನಾನಿರತರ ಪ್ರತಿನಿಧಿಯೊಬ್ಬರು, ಈ ಧರಣಿಯು ಕೇವಲ ಒಂದಷ್ಟು ಜನರ ಪ್ರತಿಭಟನೆಯಲ್ಲ, ಬದಲಿಗೆ ದೇಶದ ಪ್ರತಿಯೊಬ್ಬ ನಾಗರಿಕನ ಧ್ವನಿ ಎಂದರು. “ನಾವು ಭಾರತದ ಸಾಮಾನ್ಯ ನಾಗರಿಕರಾಗಿ, ಹೆಸರು-ಗುರುತುಗಳಿಲ್ಲದೆ, ನಮ್ಮ ಕಣ್ಣೆದುರೇ ಪ್ರಜಾಪ್ರಭುತ್ವದ ಮೌಲ್ಯಗಳು ನಾಶವಾಗುತ್ತಿರುವುದಕ್ಕೆ ಶೋಕ ವ್ಯಕ್ತಪಡಿಸಲು ಇಲ್ಲಿ ನೆರೆದಿದ್ದೇವೆ. ಭಾರತೀಯ ಚುನಾವಣಾ ಆಯೋಗವು (ECI) ಸಂವಿಧಾನವನ್ನು ರಕ್ಷಿಸುವ ತನ್ನ ಸ್ವತಂತ್ರ ಮತ್ತು ಸ್ವಾಯತ್ತ ಕರ್ತವ್ಯದಲ್ಲಿ ಸಂಪೂರ್ಣವಾಗಿ ವಿಫಲವಾಗಿದೆ,” ಎಂದು ಅವರು ತೀವ್ರವಾಗಿ ಆರೋಪಿಸಿದರು.

ಜನರನ್ನು ಸಂವಿಧಾನಕ್ಕೆ ಜೋಡಿಸುವ ಏಕೈಕ ಮತ್ತು ಅತ್ಯಂತ ಪ್ರಮುಖ ಸೂತ್ರ ಎಂದರೆ ಅದು “ಮತದಾನದ ಹಕ್ಕು”. ಆದರೆ ಇತ್ತೀಚಿನ ದಿನಗಳಲ್ಲಿ ಈ ಮತದಾನದ ಪ್ರಕ್ರಿಯೆ ಮತ್ತು ಮತದಾರರ ಪಟ್ಟಿಯ ನಂಬಿಕಸ್ಥತೆಯೇ ಅನುಮಾನಾಸ್ಪದವಾಗಿದೆ. ಆಯೋಗವು ನೀಡುತ್ತಿರುವ ವಿವರಣೆಗಳು ಮತ್ತು ಸ್ಪಷ್ಟೀಕರಣಗಳು ಅವರ ತಪ್ಪನ್ನು ತಾವೇ ಒಪ್ಪಿಕೊಂಡಂತೆ ಭಾಸವಾಗುತ್ತಿವೆ ಎಂದು ಪ್ರತಿಭಟನಾಕಾರರು ವಾದಿಸಿದರು.

ಈ ಧರಣಿಯ ಸ್ವರೂಪದ ಬಗ್ಗೆ ಕೇಳಲಾದ ಪ್ರಶ್ನೆಗೆ ಉತ್ತರಿಸಿದ ವಕ್ತಾರರು, “ಈ ಆಚರಣೆಯು ಕೇವಲ ಸಾವಿನ ಸಂಕೇತವಲ್ಲ, ಬದಲಿಗೆ ಭಾರತೀಯ ಪ್ರಜಾಪ್ರಭುತ್ವದ ಶುದ್ಧೀಕರಣದ ಪ್ರಕ್ರಿಯೆ (Cleansing Ritual). ಇಂದು ತಲುಪಿರುವ ಅಧಃಪತನದಿಂದ ದೇಶವನ್ನು ಮೇಲಕ್ಕೆತ್ತಲು ಇದು ಅತ್ಯಗತ್ಯವಾಗಿ ಆಗಬೇಕಿರುವ ಆರಂಭ,” ಎಂದು ಸ್ಪಷ್ಟಪಡಿಸಿದರು. ಧಾರ್ಮಿಕ ಮತ್ತು ಪಕ್ಷಪಾತದ ಗಡಿಗಳನ್ನು ದಾಟಿ, ಪ್ರತಿಯೊಬ್ಬ ಭಾರತೀಯನಾಗಿ ನಿಲ್ಲಬೇಕಾದ ಸಮಯ ಬಂದಿದೆ ಎಂದರು.

ಯುವಜನತೆಗೆ ಜಾಗೃತಿಯ ಕರೆ

ಪ್ರಜಾಪ್ರಭುತ್ವದ ಇತಿಹಾಸದಲ್ಲೇ ಅತ್ಯಂತ ಕಠಿಣ ಮತ್ತು ಆತಂಕಕಾರಿ ಘಟ್ಟದಲ್ಲಿ ನಾವಿದ್ದೇವೆ ಎಂದು ಆತಂಕ ವ್ಯಕ್ತಪಡಿಸಿದ ನಾಗರಿಕರು, ಇದು ದೇಶದ ಯುವಜನತೆಗೆ ಮತ್ತು ಪ್ರತಿಯೊಬ್ಬ ಪ್ರಜೆಗೆ ಎಚ್ಚರಿಕೆಯ ಗಂಟೆಯಾಗಿದೆ ಎಂದು ಹೇಳಿದರು. ಸಂವಿಧಾನ ನೀಡಿದ ಸ್ವತಂತ್ರ ತೂಗುಸ್ತಂಭಗಳನ್ನು (Constitutional Pillars) ಪುನಃ ಮರುಸ್ಥಾಪಿಸಲು ಮತ್ತು ನಮ್ಮ ಹಕ್ಕುಗಳನ್ನು ಮರಳಿ ಪಡೆಯಲು ಪ್ರತಿಯೊಬ್ಬರೂ ಒಗ್ಗೂಡಬೇಕಿದೆ ಎಂದು ಪ್ರತಿಭಟನಾಕಾರರು ಕರೆ ನೀಡಿದರು.

ಸ್ಥಳಕ್ಕೆ ಭೇಟಿ ನೀಡಿದ ಪೊಲೀಸರು ಪ್ರತಿಭಟನಾಕಾರರೊಂದಿಗೆ ಮಾತುಕತೆ ನಡೆಸಿ ಪರಿಸ್ಥಿತಿಯನ್ನು ತಿಳಿಗೊಳಿಸಿದರು. ಆದಾಗ್ಯೂ, ಬೆಳಗಿನ ಜಾವದಲ್ಲಿ ಯಾವುದೇ ಗಲಾಟೆ ಇಲ್ಲದೆ ಶಾಂತಿಯುತವಾಗಿ ನಡೆದ ಈ ಸಾಂಕೇತಿಕ ಪ್ರತಿಭಟನೆಯು ಸಾರ್ವಜನಿಕರಲ್ಲಿ ಮತ್ತು ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಚರ್ಚೆಗೆ ಗ್ರಾಸವಾಗಿದೆ.

ಇತ್ತೀಚಿನ ಲೇಖನಕ್ಕಾಗಿ ಇಲ್ಲಿ ಕ್ಲಿಕ್ ಮಾಡಿ:

ಔಷಧ ದರದಲ್ಲಿ 5000% ಕಮಿಷನ್ ದಂದೆ: 254 ಫಾರ್ಮಾ ಕಂಪನಿಗಳ ಬ್ರಹ್ಮಲೂಟಿ ಬಯಲಿಗೆಳೆದ ಕರ್ನಾಟಕ ಎಫ್‌ಡಿಎ.

ಅಟ್ಟಿಕಾ ಗೋಲ್ಡ್‌ ಮೇಲೆ ಇಡಿ ಸಮರ: 4 ಪ್ರಮುಖ ನಗರಗಳಲ್ಲಿ ದಿಢೀರ್ ದಾಳಿ – ಮಾಲೀಕ ಬೊಮ್ಮನಹಳ್ಳಿ ಬಾಬು ಸೇರಿ ಪ್ರಮುಖರು ತಲೆಮರೆಸು.

₹35.8 ಲಕ್ಷ ಚಿಕಿತ್ಸಾ ವೆಚ್ಚ: ಬೆಂಗಳೂರಿನಲ್ಲಿ ಬಾಂಗ್ಲಾದೇಶಿ ವ್ಯಕ್ತಿಯ ಮೃತದೇಹ ಹಸ್ತಾಂತರಕ್ಕೆ ಆಸ್ಪತ್ರೆ ನಿರಾಕರಣೆ?