ಆರ್ಚರಿ ವಿಶ್ವಕಪ್ 2026: ಒಲಿಂಪಿಕ್ ಚಾಂಪಿಯನ್‌ಗಳನ್ನು ಧೂಳೀಪಟ ಮಾಡಿ ಧೀರಜ್-ಕುಮ್ಕುಮ್ ಜೋಡಿಗೆ ಬಂಗಾರದ ಪದಕ.

ಟರ್ಕಿಯ ಅಂಟಲ್ಯದಲ್ಲಿ ನಡೆಯುತ್ತಿರುವ ಆರ್ಚರಿ ವಿಶ್ವಕಪ್ 2026ರ (Archery World Cup 2026 Antalya) ಮೂರನೇ ಹಂತದ ಸ್ಪರ್ಧೆಯಲ್ಲಿ ಭಾರತೀಯ ಬಿಲ್ಲುಗಾರರು ಇತಿಹಾಸ ಪುಟಗಳಲ್ಲಿ ತಮ್ಮ ಹೆಸರನ್ನು ಸುವರ್ಣಾಕ್ಷರಗಳಲ್ಲಿ ಬರೆದಿದ್ದಾರೆ. ಭಾನುವಾರ ನಡೆದ ರಿಕರ್ವ್ ಮಿಶ್ರತಂಡ ಹಾಗೂ ವೈಯಕ್ತಿಕ ವಿಭಾಗದ ಫೈನಲ್ ಪಂದ್ಯಗಳಲ್ಲಿ ಭಾರತದ ಧೀರಜ್ ಬೊಮ್ಮದೇವರ (Dhiraj Bommadevara) ಅದ್ಭುತ ಪ್ರದರ್ಶನ ನೀಡಿ ದೇಶಕ್ಕೆ ಎರಡು ಚಿನ್ನದ ಪದಕಗಳನ್ನು ತಂದುಕೊಟ್ಟಿದ್ದಾರೆ.

ಒಲಿಂಪಿಕ್ ಚಾಂಪಿಯನ್‌ಗಳಿಗೆ ಶಾಕ್ ನೀಡಿದ ಧೀರಜ್-ಕುಮ್ಕುಮ್ ಜೋಡಿ!

ಮಿಶ್ರತಂಡದ (Recurve Mixed Team) ಫೈನಲ್ ಪಂದ್ಯದಲ್ಲಿ ಭಾರತದ ಧೀರಜ್ ಬೊಮ್ಮದೇವರ ಮತ್ತು 17 ವರ್ಷದ ಯುವ ಆಟಗಾರ್ತಿ ಕುಮ್ಕುಮ್ ಮೊಹೊದ್ (Kumkum Mohod) ಜೋಡಿ ವಿಶ್ವದ ಬಲಿಷ್ಠ ದಕ್ಷಿಣ ಕೊರಿಯಾ ತಂಡಕ್ಕೆ ಶಾಕ್ ನೀಡಿತು. ಹಾಲಿ ಒಲಿಂಪಿಕ್ ಚಾಂಪಿಯನ್ಸ್ ಆದ ದಕ್ಷಿಣ ಕೊರಿಯಾದ ಓ ಯೇಜಿನ್ ಮತ್ತು ಕಿಮ್ ಜೆ-ಡಿಯೋಕ್ ಜೋಡಿಯನ್ನು 5-1 ಸೆಟ್‌ಗಳ ಭರ್ಜರಿ ಅಂತರದಿಂದ ಮಣಿಸಿದ ಭಾರತದ ಜೋಡಿ ಚಿನ್ನದ ಪದಕಕ್ಕೆ ಮುತ್ತಿಕ್ಕಿತು. ಈ ಮೂಲಕ ಆರ್ಚರಿ ವಿಶ್ವಕಪ್ ಇತಿಹಾಸದಲ್ಲಿ ಮಿಶ್ರ ರಿಕರ್ವ್ ವಿಭಾಗದಲ್ಲಿ ಚಿನ್ನ ಗೆದ್ದ ಭಾರತದ 3ನೇ ಜೋಡಿ ಎಂಬ ಹೆಗ್ಗಳಿಕೆಗೆ ಇವರು ಪಾತ್ರರಾಗಿದ್ದಾರೆ.

Picture by World Archery.

5 ವರ್ಷಗಳ ಬಳಿಕ ಭಾರತಕ್ಕೆ ವೈಯಕ್ತಿಕ ರಿಕರ್ವ್ ಚಿನ್ನದ ಗರಿ!

ಮಿಶ್ರತಂಡದಲ್ಲಿ ಚಿನ್ನ ಗೆದ್ದ ಕೆಲವೇ ಗಂಟೆಗಳಲ್ಲಿ ಧೀರಜ್ ಬೊಮ್ಮದೇವರ ವೈಯಕ್ತಿಕ ವಿಭಾಗದಲ್ಲೂ ಕಮಾಲ್ ಮಾಡಿದರು. ಪುರುಷರ ವೈಯಕ್ತಿಕ ರಿಕರ್ವ್ ಫೈನಲ್‌ನಲ್ಲಿ ಧೀರಜ್, ಒಲಿಂಪಿಕ್ ಕಂಚಿನ ಪದಕ ವಿಜೇತ ದಕ್ಷಿಣ ಕೊರಿಯಾದ ಲೀ ವೂ-ಸಿಯೋಕ್ ವಿರುದ್ಧ 7-3 ಅಂತರದ ಭರ್ಜರಿ ಜಯ ಸಾಧಿಸಿದರು.

ಈ ಗೆಲುವಿನೊಂದಿಗೆ ಧೀರಜ್ ತಮ್ಮ ವೃತ್ತಿಜೀವನದ ಮೊದಲ ವೈಯಕ್ತಿಕ ವಿಶ್ವಕಪ್ ಚಿನ್ನದ ಪದಕವನ್ನು ಮುಡಿಗೇರಿಸಿಕೊಂಡಿದ್ದಾರೆ. ಅಷ್ಟೇ ಅಲ್ಲದೆ, ಕಳೆದ ಐದು ವರ್ಷಗಳಲ್ಲಿ ಆರ್ಚರಿ ವಿಶ್ವಕಪ್‌ನ ಪುರುಷರ ವೈಯಕ್ತಿಕ ರಿಕರ್ವ್ ವಿಭಾಗದಲ್ಲಿ ಚಿನ್ನ ಗೆದ್ದ ಮೊದಲ ಭಾರತೀಯ ಬಿಲ್ಲುಗಾರ ಎಂಬ ಐತಿಹಾಸಿಕ ಸಾಧನೆಗೆ ಧೀರಜ್ ಪಾತ್ರರಾಗಿದ್ದಾರೆ. ಕೊನೆಯ ಬಾರಿಗೆ 2021 ರಲ್ಲಿ ಅತಾನು ದಾಸ್ ಈ ಸಾಧನೆ ಮಾಡಿದ್ದರು.

ಧೀರಜ್ ಆರ್ಚರಿ ಹಾದಿ ಮತ್ತು ಪದಕಗಳ ಬೇಟೆ

24 ವರ್ಷದ ಧೀರಜ್ ಬೊಮ್ಮದೇವರ ಅವರಿಗೆ ವಿಶ್ವಕಪ್ ವೇದಿಕೆಯಲ್ಲಿ ಇದು ಒಟ್ಟಾರೆ 4ನೇ ಪದಕವಾಗಿದೆ. ಇದಕ್ಕಿಂತ ಮುಂಚೆ ಅವರು ಆರ್ಚರಿ ವಿಶ್ವಕಪ್‌ಗಳಲ್ಲಿ 3 ಕಂಚಿನ ಪದಕಗಳನ್ನು ಗೆದ್ದಿದ್ದರು. ಆದರೆ ಅಂಟಲ್ಯದ ಮಣ್ಣಿನಲ್ಲಿ ಶರವೇಗದಲ್ಲಿ ಗುರಿ ನೆಟ್ಟ ಧೀರಜ್, ಒಂದೇ ದಿನ ಎರಡು ಬಂಗಾರದ ಪದಕಗಳನ್ನು ಗೆದ್ದು ಅಪ್ರತಿಮ ಸಾಧನೆ ಮಾಡಿದ್ದಾರೆ.

ಅಂಟಲ್ಯದಲ್ಲಿ ಭಾರತೀಯ ಆರ್ಚರಿ ಪಡೆ ತೋರಿರುವ ಈ ಅಮೋಘ ಪ್ರದರ್ಶನವು ಮುಂಬರುವ ಏಷ್ಯನ್ ಗೇಮ್ಸ್‌ಗೆ ಭಾರತದ ಆತ್ಮವಿಶ್ವಾಸವನ್ನು ಮತ್ತಷ್ಟು ಹೆಚ್ಚಿಸಿದೆ. ಒಲಿಂಪಿಕ್ ಜಗತ್ತನ್ನೇ ಆಳುವ ದಕ್ಷಿಣ ಕೊರಿಯಾವನ್ನು ಭಾರತೀಯರು ಮಣಿಸಿರುವುದು ಇಡೀ ದೇಶವೇ ಹೆಮ್ಮೆ ಪಡುವಂತಹ ವಿಷಯವಾಗಿದೆ.

ಇತ್ತೀಚಿನ ಲೇಖನಕ್ಕಾಗಿ ಇಲ್ಲಿ ಕ್ಲಿಕ್ ಮಾಡಿ:

ಟೇಕ್ ಆಫ್ ಆದ ಕೆಲವೇ ಕ್ಷಣಗಳಲ್ಲಿ ಅಮೆರಿಕದ ಬಿ-52 ಬಾಂಬರ್ ಯುದ್ಧ ವಿಮಾನ ಪತನ; 8 ಯೋಧರು ಸಜೀವ ದಹನ ಶಂಕೆ!