2026ರ ಫಿಫಾ ವಿಶ್ವಕಪ್‌ಗೆ ಅದ್ಧೂರಿ ಚಾಲನೆ!

ವಿಶ್ವದ ಅತ್ಯಂತ ದೊಡ್ಡ ಕ್ರೀಡಾ ಹಬ್ಬವಾದ ಫಿಫಾ ವಿಶ್ವಕಪ್ 2026 ಮೆಕ್ಸಿಕೋ ಸಿಟಿಯ ಐತಿಹಾಸಿಕ ಅಜ್ಟೆಕಾ ಸ್ಟೇಡಿಯಂನಲ್ಲಿ ಅತ್ಯಂತ ಅದ್ಧೂರಿಯಾಗಿ ಆರಂಭಗೊಂಡಿದೆ. ಜೂನ್ 11ರಂದು ನಡೆದ ಉದ್ಘಾಟನಾ ಸಮಾರಂಭವು ಜಾಗತಿಕ ಫುಟ್‌ಬಾಲ್ ಪ್ರೇಮಿಗಳ ಕಣ್ಣು ಕೋರೈಸುವಂತೆ ಮಾಡಿತು. ಬಣ್ಣ ಬಣ್ಣದ ಲೇಸರ್ ಶೋ, ಸಾಂಸ್ಕೃತಿಕ ಪ್ರದರ್ಶನಗಳು ಮತ್ತು ಕ್ರೀಡಾಂಗಣದ ಮಧ್ಯದಲ್ಲಿ ತಲೆಎತ್ತಿದ ದೈತ್ಯ ವಿಶ್ವಕಪ್ ಟ್ರೋಫಿ ಪ್ರೇಕ್ಷಕರ ರೋಮಾಂಚನವನ್ನು ಮುಗಿಲು ಮುಟ್ಟಿಸಿತ್ತು.

ವೇದಿಕೆ ಮೇಲೆ ಶಕೀರಾ, ಬರ್ನಾ ಬಾಯ್ ಧಮಾಕಾ

ಈ ಬಾರಿಯ ಉದ್ಘಾಟನಾ ಸಮಾರಂಭದ ಪ್ರಮುಖ ಆಕರ್ಷಣೆಯಾಗಿದ್ದು ಕೊಲಂಬಿಯಾದ ಖ್ಯಾತ ಗಾಯಕಿ ಶಕೀರಾ ಮತ್ತು ನೈಜೀರಿಯಾದ ಪಾಪ್ ಸ್ಟಾರ್ ಬರ್ನಾ ಬಾಯ್. 2010ರ ವಿಶ್ವಕಪ್‌ನಲ್ಲಿ ಶಕೀರಾ ಹಾಡಿದ್ದ ‘ವಾಕಾ ವಾಕಾ’ ಗೀತೆ ಜಾಗತಿಕ ಮಟ್ಟದಲ್ಲಿ ಸೃಷ್ಟಿಸಿದ್ದ ಹವಾ ಎಲ್ಲರಿಗೂ ಗೊತ್ತೇ ಇದೆ. ಈ ಬಾರಿಯೂ ಅದೇ ಹಳೆಯ ನೆನಪುಗಳನ್ನು ಮರುಕಳಿಸುವಂತೆ ಮಾಡಿದ ಶಕೀರಾ, ಬರ್ನಾ ಬಾಯ್ ಜೊತೆಗೂಡಿ ಈ ವರ್ಷದ ವಿಶ್ವಕಪ್ ಗೀತೆ ‘ದಾಯ್ ದಾಯ್’ (Dai Dai) ಹಾಡಿಗೆ ಭರ್ಜರಿ ಹೆಜ್ಜೆ ಹಾಕಿದರು.

ಅಜ್ಟೆಕಾ ಸ್ಟೇಡಿಯಂನಲ್ಲಿ ನೆರೆದಿದ್ದ ಹಸಿರು ಮತ್ತು ಹಳದಿ ಜೆರ್ಸಿ ಧರಿಸಿದ ಲಕ್ಷಾಂತರ ಅಭಿಮಾನಿಗಳು ಶಕೀರಾ ವೇದಿಕೆಗೆ ಬರುತ್ತಿದ್ದಂತೆ ಜೋರಾಗಿ ಕೂಗಿ ಜಯಘೋಷ ಮಾಡಿದರು. ಶಕೀರಾ ಅವರ ಅದ್ಭುತ ನೃತ್ಯ ಮತ್ತು ಗಾಯನಕ್ಕೆ ಇಡೀ ಕ್ರೀಡಾಂಗಣವೇ ತಲೆದೂಗಿತು. ಇಬ್ಬರೂ ಗಾಯಕರು “ಡೇಲ್, ಅಲೆಜ್, ಲೆಟ್ಸ್ ಗೋ!” ಎಂದು ಹಾಡನ್ನು ಮುಗಿಸುತ್ತಿದ್ದಂತೆ ಚಪ್ಪಾಳೆಗಳ ಸುರಿಮಳೆಯೇ ಆಯಿತು.

ಮೆಕ್ಸಿಕೋ ವಿರುದ್ಧ ಸೌತ್ ಆಫ್ರಿಕಾ: ಆತಿಥೇಯರಿಗೆ ಭರ್ಜರಿ ಜಯ

ಉದ್ಘಾಟನಾ ಪಂದ್ಯದಲ್ಲಿ ಆತಿಥೇಯ ಮೆಕ್ಸಿಕೋ ಮತ್ತು ದಕ್ಷಿಣ ಆಫ್ರಿಕಾ ತಂಡಗಳು ಮುಖಾಮುಖಿಯಾಗಿದ್ದವು. ಸ್ಟೇಡಿಯಂನಲ್ಲಿದ್ದ ಅಭಿಮಾನಿಗಳ ಭಾರಿ ಬೆಂಬಲದೊಂದಿಗೆ ಕಣಕ್ಕಿಳಿದ ಮೆಕ್ಸಿಕೋ 2-0 ಗೋಲುಗಳ ಅಂತರದಿಂದ ದಕ್ಷಿಣ ಆಫ್ರಿಕಾವನ್ನು ಮಣಿಸಿ ಟೂರ್ನಿಯಲ್ಲಿ ಶುಭಾರಂಭ ಮಾಡಿದೆ.

ಪಂದ್ಯದ 9ನೇ ನಿಮಿಷದಲ್ಲಿಯೇ ಮೆಕ್ಸಿಕೋದ ಜೂಲಿಯನ್ ಕ್ವಿನೋನ್ಸ್ ಈ ಬಾರಿಯ ವಿಶ್ವಕಪ್‌ನ ಮೊದಲ ಗೋಲು ದಾಖಲಿಸಿ ಇತಿಹಾಸ ಬರೆದರು. ಆ ಬಳಿಕ ರೌಲ್ ಜಿಮೆನೆಜ್ ಎರಡನೇ ಗೋಲು ಹೊಡೆಯುವ ಮೂಲಕ ಮೆಕ್ಸಿಕೋ ತಂಡದ ಗೆಲುವನ್ನು ಖಚಿತಪಡಿಸಿದರು. ಈ ಗೆಲುವಿನ ಮೂಲಕ ಗ್ರೂಪ್ ಎ ಪಟ್ಟಿಯಲ್ಲಿ ಮೆಕ್ಸಿಕೋ ಬಲಿಷ್ಠ ಸ್ಥಾನ ಪಡೆದುಕೊಂಡಿದೆ.

ಹದಿನೇಳರ ಹರೆಯದ ಗಿಲ್ಬರ್ಟೊ ಮೊರಾ ಹೊಸ ದಾಖಲೆ

ಈ ಪಂದ್ಯದಲ್ಲಿ ಮೆಕ್ಸಿಕೋ ಪರ ಕಣಕ್ಕಿಳಿದ ಗಿಲ್ಬರ್ಟೊ ಮೊರಾ ಫುಟ್‌ಬಾಲ್ ಇತಿಹಾಸದ ಪುಟ ಸೇರಿದರು. ಕೇವಲ 17 ವರ್ಷ 240 ದಿನಗಳ ಪ್ರಾಯದ ಮೊರಾ, ವಿಶ್ವಕಪ್ ಇತಿಹಾಸದಲ್ಲಿ ಕಣಕ್ಕಿಳಿದ ಆರನೇ ಅತ್ಯಂತ ಕಿರಿಯ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು. ಫುಟ್‌ಬಾಲ್ ದಂತಕಥೆ ಪೀಲೆ (17 ವರ್ಷ 235 ದಿನ) ಸೇರಿದಂತೆ ಸ್ಯಾಮ್ಯುಯೆಲ್ ಎಟೊ ಅವರಂತಹ ದಿಗ್ಗಜರು ಈ ಪಟ್ಟಿಯಲ್ಲಿ ಮೊರಾಗಿಂತ ಮುಂಚೂಣಿಯಲ್ಲಿದ್ದಾರೆ.

ಒಂದೇ ಪಂದ್ಯದಲ್ಲಿ 3 ರೆಡ್ ಕಾರ್ಡ್: ವೈರಲ್ ಆದ ರೆಫರಿ ವಿಲ್ಟನ್ ಸಂಪಾಯೊ!

ಮೆಕ್ಸಿಕೋ ಮತ್ತು ದಕ್ಷಿಣ ಆಫ್ರಿಕಾ ನಡುವಿನ ಪಂದ್ಯವು ಕೇವಲ ಗೋಲುಗಳಿಂದ ಮಾತ್ರವಲ್ಲದೆ ಭಾರಿ ಹೈಡ್ರಾಮಾದಿಂದಲೂ ಸುದ್ದಿಯಾಯಿತು. ಬ್ರೆಜಿಲ್ ದೇಶದ ರೆಫರಿ ವಿಲ್ಟನ್ ಸಂಪಾಯೊ ಈ ಪಂದ್ಯದ ಹೀರೊ ಆಗಿ ಹೊರಹೊಮ್ಮಿದ್ದಾರೆ. ಮೈದಾನದಲ್ಲಿ ಆಟಗಾರರ ನಡುವೆ ತೀವ್ರ ಪೈಪೋಟಿ ನಡೆದು ಪಂದ್ಯವು ಗದ್ದಲಕ್ಕೆ ತಿರುಗಿದಾಗ, ರೆಫರಿ ಸಂಪಾಯೊ ಕಠಿಣ ನಿರ್ಧಾರ ಕೈಗೊಂಡು ಬರೋಬ್ಬರಿ 3 ರೆಡ್ ಕಾರ್ಡ್‌ಗಳನ್ನು ಪ್ರದರ್ಶಿಸಿದರು.

ರೆಫರಿಯ ಈ ದಿಟ್ಟ ನಿರ್ಧಾರ ಮತ್ತು ಅವರು ಧರಿಸಿದ್ದ ಭವಿಷ್ಯದ ತಂತ್ರಜ್ಞಾನದ ಹೆಡ್‌ಸೆಟ್ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿದ್ದು, ಮೆಂಸ್ (Memes) ಮಹಾಪೂರವೇ ಹರಿದುಬರುತ್ತಿದೆ. ನೆಟ್ಟಿಗರು ಪಂದ್ಯದ ಆಟಗಾರರಿಗಿಂತ ರೆಫರಿ ಸಂಪಾಯೊ ಅವರನ್ನೇ ಉದ್ಘಾಟನಾ ರಾತ್ರಿಯ ನಿಜವಾದ ಸ್ಟಾರ್ ಎಂದು ಕೊಂಡಾಡುತ್ತಿದ್ದಾರೆ. ಒಟ್ಟಾರೆಯಾಗಿ 2026ರ ಫಿಫಾ ವಿಶ್ವಕಪ್ ಮೊದಲ ದಿನವೇ ಭರಪೂರ ಮನರಂಜನೆ ಮತ್ತು ರೋಮಾಂಚನವನ್ನು ನೀಡುವ ಮೂಲಕ ಕ್ರೀಡಾ ಪ್ರೇಮಿಗಳಿಗೆ ಜಾಗತಿಕ ಹಬ್ಬದ ರಸದೌತಣ ಉಣ ಬಡಿಸಿದೆ.

ಇತ್ತೀಚಿನ ಲೇಖನಕ್ಕಾಗಿ ಇಲ್ಲಿ ಕ್ಲಿಕ್ ಮಾಡಿ:

ಬೆಂಗಳೂರಿಗೆ ₹26,000 ಕೋಟಿ ಪ್ಯಾಕೇಜ್, ಮೇಕೆದಾಟು ಹಾಗೂ ಮೆಟ್ರೋಗೆ ಗ್ರೀನ್ ಸಿಗ್ನಲ್ ನೀಡಿ: ಸಿಎಂ ಆಗಿ ಮೊದಲ ಭೇಟಿಯಲ್ಲೇ ಪ್ರಧಾನಿ ಮೋದಿಗೆ ಡಿ.ಕೆ.ಶಿ ಬೇಡಿಕೆ.